Read Navajo REVELATION 19 Bible Online

REVELATION 19 - Navajo bible

REVELATION 19

¹Kódzaadóó bik'ijį' yá'ąąshdi ayóó ázhnéelą́ą'go hadazhdeeshghaazhígi át'éego iinéé' ayóó íits'a'go diséts'ą́ą́' kódaaníigo, Bóhólníihii baa dahohniih! Yisdá'iildééh áádóó ayóó é'ét'é [áádóó ił ídlį́] índa adziil éí nihiDiyin God bíí' ádaat'é!

²Bee ánihwijii'aahii t'áá aaníí áádóó ts'ídá t'áá ákogi ádaat'é! Háálá ałjiłnii ná'áyóó át'éii na'ageh yee tsi'naagháago yee nahasdzáán yiyííłchǫ' yę́ę baa nídzíst'įįdgo bá nihozhní'ą́, áádóó há nidaal'a'í dabidił bits'ádaazlį́įgo áyiilaago biniinaa k'éézhdiidlaa.

³Náá'áłdó' hanáádadeeshghaazh, Bóhólníihii baa dahohniih! Kin haal'áii dook'ą́ąłgo bilid hool'áágóó ahóyéel'áágóó dego i'iijooł.

⁴Ákohgo naadiin dį́į́' hastóí áádóó ha'át'íí shį́į́ dahináanii dį́'ígíí tsé'yaa daneeshjoolgo Diyin God éí bikáá'dóó nahat'áii yikáá' dah sidáii yich'į' nidahasáago kódaaní, T'áá ákót'ée doo! Bóhólníihii baa dahohniih!

⁵Nít'éé' bikáá'dóó nahat'áii bits'ą́ą́dóó iinéé' kódííniid, Diyin God bá nidaał'a'ii t'áá ánółtso, a'ohgo ádanoht'éii áádóó ayóó ádanoht'éii dahodíínóhsinii, nihiDiyin God baa dahohniih!

⁶Nít'éé' ayóó ázhnéelą́ą'go hadazhdeeshghaazhígi át'éego, tó t'óó ahayóí hadah yiilį́įgo diits'a'ígi át'éego índa t'óó báhádzidgo da'di'nínígi át'éego kóníigo náádiséts'ą́ą́', Bóhólníihii baa dahohniih! Háálá Bóhólníihii nihiDiyin God Ayóó'át'éii éí nant'á!

⁷Haa'íshą' nihił dahózhǫ́ǫ doo áádóó t'áá íiyisí nihił dahózhǫ́ǫgo baa dahwii'niih doo! Háálá Dibé Yázhí nilíinii adooyehjį' ahoolzhiizh, índa yá'dooyehii hasht'e'í'diilyaa.

⁸Áłts'óózígo yisdizígíí bee na'at'ą́hí łigaii dits'idgo ályaii bídazdilid índa ts'ídá chin bąąh ádinii yee hadidooníiłgo baa deet'ą́. Jó, díí naak'ą' ałgaígíí éí Diyin God bidiyį́į́' ts'ídá t'áá ákogi ádaadzaii át'é.

⁹Nít'éé' diyingo naal'a'í áshidííniid, Díí bee ak'e'íłchí: Dibé Yázhí nilíinii iiyehgo ada'niidą́ą'jį' bida'iisnii'ii bik'idahojidlí. Áádóó ánááshidoo'niid, Díidí Diyin God t'áá aaníígóó áníinii ádaat'é.

¹⁰Áko biyaajį' nitsidinígo' bich'į' nahodeeshłaał biniyé, nidi áshidííniid, T'áadoo ánít'íní! Ni áádóó nik'isóó Jesus baa hane'ii dayoodlánígíí yił nidaal'a'í ła' ásht'į́. Diyin God bich'į' nahółá! Háálá Jesus baa hane'ii bee náásgóó ádahodooníiłii bee baa dahojilne'.

¹¹Nít'éé' yá'ąąshii ąą ádzaago, jó'akon, łį́į́łgaii léi' yiiłtsą́! Yik'i dah sidáii éí Ba'ahódlíii índa T'áá Aaníinii wolyé, áádóó ts'ídá t'áá ákogi át'éego ánihodoo'ááł índa anaa' ííł'į́.

¹²Bináá' éí kǫ' dah nídíno'ígíí nahalin, naat'á ch'ah t'óó ahayóigo bitsiits'iin bąąh sinil. Yízhí ła' bee bik'e'ashchį́, éí t'áadoo bił bééhóziní da, nidi t'áá bí t'éiyá.

¹³Éé' dił bénástsoozgo yee hadít'é. Diyin God bizaad bee bi'dójí.

¹⁴Yá'ąąshdę́ę́' siláo yíl'áii, éí áłts'óózígo yisdizígíí bee na'at'ą́hí łigaii dits'idgo ályaii ts'ídá chin bąąh ádaadinii yee hadadít'éego łį́į́' daalgaii yee bikéé' yinééł.

¹⁵Diltłish deeníinii bizéé'dę́ę́' hadzisihgo ał'ąą dine'é bił dah nidahaz'ą́ą́góó yee yik'eh didoodleeł áádóó béésh hał yee yinant'áa doo; ch'il na'atł'o'ii bee yiljizhii bee Diyin God Aláahgo Ayóó'ábóodziilii t'óó báhádzidgo bibee até'él'íinii yąąh haidoonih.

¹⁶Bi'éé' bikáa'gi áádóó bitsoosk'idgi kót'éego yízhí bee bik'e'ashchį́, Aláahgo naat'áanii danilíinii yiNanit'a'í índa bídahólníihii bee Bóhólníihii át'į́.

¹⁷Nít'éé' diyingo naal'a'í jį́honaa'éí yii' sizį́įgo náánéiłtsą́. Áko nidaat'a'ii yót'áahdi naaldeehii ayóó íits'a'go kóníigo yich'į' ání, Hágo, ayóó át'éego Diyin God bá ada'niidą́ą'gi baa áłah hohłeeh!

¹⁸Aláahgo naat'áanii danilíinii dabitsį', siláo binanit'a'í danilíinii dabitsį', diné ayóó ábóodziilii dabitsį', łį́į́' áádóó bik'i dah naazdáii dabitsį', índa diné t'áá ałtso, doo naalte' danilíinii áádóó naalte' danilíinii, índa diné a'ohgo ádaat'éii áádóó ayóó ádaat'éii dabitsį' dadoołghał biniyé áłah hohłeeh.

¹⁹Nít'éé' naaldlooshii naayéé' nilíinii áádóó nahasdzáán bikáá'góó aláahgo naat'áanii danilíinii bisiláo t'áá bił, éí łį́į́' yik'i dah sidáhígíí bisiláo bił yik'ijį' anaa' ádeidoolííł biniyé áłah silį́į'go yiiłtsą́.

²⁰Áko naaldlooshii naayéé' nilíinii bił ni'deedéél áádóó t'óó áhodil'į́įgo halne'ii, éí naaldlooshii naayéé' nilíinii binááł álílee k'ehgo bee éédahózinii áyiilaago bee naaldlooshii naayéé' nilíinii bibee í'diidlííd bee bída'diidlidígíí áádóó t'áá éí be'elyaii yich'į' nidahałáá nít'éé' yę́ę álílee k'ehgo bee éédahózinii yee yi'deezlo'ii ałdó' bił ni'deedéél. Éí t'áá áłah t'áá hináago kǫ' be'ek'id tsékǫ' bił dook'ą́ąłii biyi' góne' aheestł'ííd.

²¹Áko łį́į́' yik'i dah sidáii bizéé'dę́ę́' diltłish hadzisihii bee dine'é daadziihígíí nidaaztseed, índa dabitsį'ígíí nidaat'a'ii t'áá át'é nídeineesdą́ą́'.