Read Navajo REVELATION 2 Bible Online

REVELATION 2 - Navajo bible

REVELATION 2

¹Éfesasgi da'oodlání áłah nádleehii bidiyingo naal'a'í kót'éego bich'į' ak'e'íłchí: Bíla' nish'náájí yee sǫ' tsosts'idgo dah yoojihii, t'áá éí tsosts'idgo bee hool'iní bá yadaa'áhígíí óola bee ádaalyaii yitaagháii kóní:

²Baa nidaahkaii, yéego nihinaanish danilíinii índa nízaadgóó hada'íínółníigo shił bééhózin, áádóó diné ba'át'e' dahólóonii doo bich'į' hada'íínółníígóó, índa daal'aadii yee ádadójíii nidasoołkáa'go, áko dabiyooch'íidii danilį́įgo nihił béédahoozinígíí shił bééhózin.

³Shízhi' bee hada'íínółnínígíí áádóó bídanołdzilígíí índa doo dasidínóołna'góó shił bééhózin.

⁴Nidi átséédą́ą́' nihi'ayóó'ó'ó'ni' yę́ę bits'áhisoohkaigo át'é, éí t'éiyá nihik'ijį' séł'ą́.

⁵Éí bąą bits'áhisoohkaígíí béédaałniihgo, łahgo át'éego tsíńdadohkeesgo átséédą́ą́' baa nisoohkaii yę́ę t'áá éí baa nináánáhkai. Doodago éí nihaa deesháałgo nihibee hool'iní bá yadaa'áhígíí nahjį' kódeeshłííł.

⁶Nidi díí kódanoht'é, jó, éí Nikoléíyatanz yaa nidaakaii bik'ee dadinohniih, éí shí ałdó' bik'ee dinishniih.

⁷T'áá háiida daz'diits'a'ii Níłch'i Diyinii éí da'oodlání áłah nídaadleehii kwííłníigo yee yił halne'ígíí háni'dii dajíists'ą́ą́'! T'áá ak'eh deesdlį́'ígíí Diyin God bikéyah hózhónígi iiná tsin sikaadii bąąhdóó adooyį́įłgo baa dideesh'ááł.

⁸Smírnagi da'oodlání áłah nádleehii bidiyingo naal'a'í kót'éego bich'į' ak'e'íłchí: Áłtséhígíí áádóó akée'diígíí, t'áá éí daaztsą́ą́ nít'éé' nidi daaztsą́ą́dę́ę́' náádiidzáii kóní:

⁹Baa nidaahkaii áádóó nihich'į' nidahwii'nánígíí shił bééhózin. Té'é'į́ danohłínígíí shił bééhózin, nidi da'oht'į́įgo át'é! Jew dine'é daniidlį́, daaníinii nidi doo éí danilį́į́góó t'áá ádzaagóó nihaa nidahalne'ígíí shił bééhózin, éí níłch'i bida'iiníziinii binanit'a'í Séítan wolyéii yaa áłah nádleehii danilį́!

¹⁰Bik'ee ti'dahwiidoohnihgo bich'į' hoolzhishígíí t'áadoo bik'ee nihił daayé'í. Jó'akon, nihí dahodínóotahígíí biniyé níłch'i bida'iiníziinii binanit'a'í k'adę́ę nihí ła' awáalyaa góne' anihiiłtł'iid, áádóó nihich'į' nidahwii'náago neeznáá yidoołkááł. T'áá dasinoonáajį' hada'íínółní, áko iináájí naat'á ch'ah nihitaa deeshnih.

¹¹T'áá háiida daz'diits'a'ii éí Níłch'i Diyinii da'oodlání áłah nídaadleehii kwííłníigo yee yił halne'ígíí háni'dii dajíists'ą́ą́'! T'áá ak'eh deesdlį́'ígíí naakidi ná'ní'néhígíí doo bidééłníi da doo.

¹²Pérgamasgi da'oodlání áłah nádleehii bidiyingo naal'a'í kót'éego bich'į' ak'e'íłchí: Diltłish t'áá ałch'ishjigo deeníinii dah yootį́įłii kóní:

¹³[Baa nidaahkaii shił bééhózin, áádóó] níłch'i bida'iiníziinii binanit'a'í Séítan wolyéii bibikáá'dóó nahat'áii si'ą́ągi kééhoht'į́įgo shił bééhózin. Shízhi' yéego dayínóhtą', áádóó Ántipas, ba'ahódlíigo shá halne'ii, éí nihitahgi níłch'i bida'iiníziinii binanit'a'í kééhat'į́įgi bi'diisyíinii bíyoołkááł yę́ędą́ą́' doo haa dadzííníidlíi da, t'áadoo dashidooniid da.

¹⁴Nidi t'áá díkwííhígo haz'ą́ t'éí bee nihik'íhásh'ááh, jó, éí Béílam bina'nitin Ízrel dine'é dabidínóołtł'ahígíí, éí e'elyaii bich'į' náádahaaznii'ii deiyą́ą doogo, índa na'ageh yee tsi'nidaakai doogo Béílak yee neineeztą́ą'ii nihitahgi ła' dayótą'.

¹⁵T'áá ákót'éego ałdó' Nikoléíyatanz bina'nitin nihitahgi ła' dayótą' [éí bik'ee dinishniih].

¹⁶Éí bąą ákódaat'éhígíí łahgo át'éego bąąh tsíńdahidohkeesgo bits'áhóhkááh. Doo ákódaaht'į́į́góó t'áá k'ad tsį́įłgo nihaa deeshááł, áko shizéé'dóó diltłish bee hach'į' anaa' hodeeshłeeł.

¹⁷T'áá háiida daz'diits'a'ii Níłch'i Diyinii éí da'oodlání áłah nídaadleehii kwííłníigo yee yił halne'ígíí háni'dii dajíists'ą́ą́'! T'áá ak'eh deesdlį́'ígíí mána nanil'inii ła' haa deeshnił, áádóó tsé łigaii haa deesh'ááł, bikáa'gi yízhí ániidíii bik'iisdzohgo éí doo ła' hoł bééhóziní da, nidi baa yít'ánígíí t'éiyá.

¹⁸Thaiyatáíragi da'oodlání áłah nádleehii bidiyingo naal'a'í kót'éego bich'į' ak'e'íłchí: Diyin God biYe', bináá' kǫ' nahalingo dah nídíno'ii, bikee' béésh łitsoii bízdílidgo ályaa nahalinii kóní:

¹⁹Baa nidaahkaii shił bééhózin. Nihe'ayóó'ó'ó'ni' áádóó nihe'oodlą' áádóó chodaah'ínígíí áádóó nízaadgóó nihiha'ahóní, índa átsé baa nisoohkaii yę́ę t'ah biláhídi át'éii baa naahkaigo shił bééhózin.

²⁰Nidi asdzání Jézebel, Diyin God yá halne'ii nilį́įgo ádójíii, éí shá nidaal'a'í na'ageh yee tsi'nidaakai doogo, índa eda'alyaii bich'į' náádahaaznii'ii deiyą́ą doogo neinitingo t'áá áhoodzaagóó ayii'éeshgo bee bá nahosooł'ánígíí, éí t'éí nihik'ijį' séł'ą́.

²¹Áko asdzání na'ageh yee tsi'naagháhígíí łahgo át'éego yąąh tsíńdookosgi ch'ééh bee bá hooł'a', nidi doo t'áá k'ad yi'iilaa da.

²²Jó'akon, hatah hodínéeshgahgo hodínéeshtééł, áádóó bił da'ahizhdilyéego bił baa nijikaígíí doo łahgo át'éego bąąh tsíńdazdikeesgo yóó'adazhdi'aahgóó éí ayóó át'éego hach'į' nidahwii'náago ádeeshłííł.

²³Áádóó asdzání ba'áłchíní bits'ą́ą́' nideestsił. Áko da'oodlání áłah nídaadleehii t'áá ałtso éí diné bintsíkees índa bijéí haisíidii nishłį́įgo bił béédahodoozįįł. Índa t'ááłá'í nootínígo ádaoht'įįdígíí bik'ehgo k'ééhodidoodlííł.

²⁴Nidi Thaiyatáíragi díí nichxǫ́'ógo na'nitin doo dayínóhtą'ii, níłch'i bida'iiníziinii binanit'a'í binahat'a' bidziil deiłníinii doo bídahooł'ą́ą'ii, nihí ánihidishní, Náánáła' doo nihiyéél nihá ánáádeeshdlíił da.

²⁵Nidi níyáajį' oodlą' nihee dahazlį́'ígíí yéego dayínóhtą'.

²⁶T'áá ak'esdeesdlį́'ígíí índa nihoolzhiizhjį' íinisinii ájoolíłígíí éí ał'ąą dine'é bił dah nidahaz'áanii bee hóhólníihgo áhodeeshłííł.

²⁷T'áá shiTaa' bits'ą́ą́dę́ę́' bee óhólníihii shee hazlį́'ígi át'éego bee hóhólníihgo áhodeeshłííł. Béésh hał bee binazhnit'áa doo; ásaa' ííł'íinii bileets'aa' nihídazdeestsxis nahalingo nihídadidooltsxisgo ałtso dadidoozéí.

²⁸Áádóó yikáít'áahjį' sǫ'tsoh haagháhígíí haa deesh'ááł.

²⁹T'áá háiida daz'diits'a'ii Níłch'i Diyinii éí da'oodlání áłah nídaadleehii kwííłníigo yee yił halne'ígíí háni'dii dajíists'ą́ą́'.