Read Navajo REVELATION 21 Bible Online

REVELATION 21 - Navajo bible

REVELATION 21

¹Nít'éé' yádiłhił ániidíii índa nahasdzáán ániidíii yiiłtsą́. Yádiłhił áłtséhígíí índa nahasdzáán áłtséhígíí bił yóó'ahóóyá, áádóó tónteel ałdó' ádin.

²Áko yá'ąąshdę́ę́' Diyin God bits'ą́ą́dóó diyingo kin haal'áii, Jerúsalem ániidíii, bá'iigehii bahastiin yiba' hasht'e'ádiilyaagi át'éego hasht'e'ádiilyaago hadahooleełgo yiiłtsą́.

³Áko bikáá'dóó nahat'áii bits'ą́ą́dóó ayóó íits'a'go iinéé' kóníigo diséts'ą́ą́', Jó'akon, Diyin God yii' kééhat'íinii diné bił hólǫ́. Éí bił kééhojit'į́į doo, áádóó bidine'é dajílį́į doo. Diyin God t'áá bí hoł hólǫ́ǫ doo, índa haDiyin God nilį́į doo.

⁴Dabinák'eeshto' t'áá ałtso yá yidoot'oł, aniné ádin doo, áádóó atínáhodinidleeh ádin doo, áádóó cha ádin doo índa adiniih ádin doo, háálá áłtséédą́ą́' dahólóonii bił yóó'ahóóyá.

⁵Bikáá'dóó nahat'áii yikáá'dóó dah sidáii ání, Jó'akon, t'áá ałtsoní ániidígo ánáshdlééh! Áádóó ałdó' ánáádí'ní, Díí bee ak'e'íłchí, háálá díí saad t'áá aaníinii áádóó bada'ahódlíii ádaat'é.

⁶Áádóó áshidííniid, K'ad lą́ą ałtso ádzaa! Álfa áádóó Oméga, bee hodeezt'i'ii índa bee nihonít'i'ii shí éí nishłį́. Dibáá' jílíinii iiná tó háálį́į́dóó t'áá jíík'e tó haa deeshkááł.

⁷T'áá ak'esdeesdlį́'ígíí díí hóó' dooleeł: haDiyin God nishłį́į doo, índa hó shiye' jílį́į doo.

⁸Nidi ninádanihinilyéesii, doo da'oodlání, doo daaldinígi ádaat'íinii, diné nideiłtseedii, ałjiłnii, binda'adlo'go álílee k'ehgo nidahałáii, e'elyaii yich'į' nidahałáii índa dabiyooch'íidii t'áá ałtso éí kǫ' tsékǫ' bił be'ek'id dook'ą́ąłii biyi' góne' bá nahaz'ą́, áko éidíígíí naakidi ná'ní'né át'é.

⁹Nít'éé' diyingo nidaal'a'í tsosts'idgo, bee ach'į' nidahwiiłnáanii tsosts'idgo akée'diígíí łeets'aa' tsosts'id hadadeezbingo dah dayíkaahii ła' shaa níyáago kóníigo shich'į' haadzíí', Tį', bá'ásgehii, Dibé Yázhí nilíinii be'asdzą́ą́ dínííł'įįł.

¹⁰Áádóó Níłch'i Diyinii shił hólǫ́ǫgo dził ayóó áníłtso léi' bighą́ą'jį' hasistį́įgo, yá'ąąshdę́ę́' Diyin God bits'ą́ą́dóó Jerúsalem diyingo kin haal'áii hadah hooleełgo shich'į' yit'íní áyiilaa.

¹¹Éí Diyin God bee bits'ádi'nílíidii bee bits'ádi'nílíidgo, bits'ádi'nílídígíí tsé ílíinii bik'i nizdidlaadígíigi át'é, jásper wolyéhígíí nahalingo, tséghádi'nídíniigi át'éego niłtólí.

¹²Ayóo da'át'é áádóó wódahgo ditą́ągo binaa ahéé'ítł'in, naakits'áadahgóó ch'é'étiin, áko naakits'áadahgóó ch'é'étiinígíí diyingo naal'a'í yik'eh nízį́, éí naakits'áadahgo ch'é'étiin bikáa'gi Ízrel ba'áłchíní naakits'áadahgo dine'é danilíinii dabízhi' t'áá da'níł'ąą bee bik'ida'ashchį́.

¹³Ha'a'aahdę́ę'go táa'go ch'é'étiin, náhookǫsdę́ę'go ałdó' táa'go ch'é'étiin, shádi'ááhdę́ę'go ałdó' táa'go ch'é'étiin, e'e'aahdę́ę'go ałdó' táa'go ch'é'étiin.

¹⁴Áádóó kin haal'á ditą́ągo binaa ahéé'ítł'inii bee hadaastł'inii naakits'áadah lá, áko éí bikáa'gi Dibé Yázhí nilíinii bá daal'aadii naakits'áadahgoígíí dabízhi' t'áá da'níł'ąą bee bik'ida'ashchį́.

¹⁵Áádóó shich'į' yájíłti'ii óola bee ída'neel'ąąhí éí kin haal'áhígíí áádóó ch'ída'iiztiingóó índa ditą́ągo binaa ahéé'ítł'inígíí bee bídazhdí'nóoł'ąąłgo dah jootį́į́ł.

¹⁶Kin haal'áhígíí t'áá dį́į́'góó dik'ą́, náásee áádóó naaniigo t'áá aheeníłtso. Habee'ída'neel'ąąhí bee kin haal'áhígíí bízh'nééł'ąądgo ashdla'áadahdi neeznádiin tsin sitą́ą́ lá; náásee, naaniigo áádóó dego éí t'áá aheedaníłtso.

¹⁷Ahéé'ítł'inígíí ałdó' bízh'nééł'ąąd, nít'éé' ach'oozhlaa'dóó ála' bílátahjį' áníłtsoígíí éí t'ááłáhídi neeznádiindóó ba'aan dízdiindóó ba'aan dį́įdi ahą́ą́h dí'á áníłtso lá, éí diné k'ehgo í'neel'ąąhígíí k'ehgo, t'áá éí diyingo naal'a'í k'ehgo í'neel'ąąh át'é.

¹⁸Ahéé'ítł'inii jásper bee ályaa, kin haal'áhígíí éí tsésǫ' bigházdiníłtólígíí nahalingo óola t'áá bízhání bee ályaa.

¹⁹Kin haal'á ditą́ągo binaa ahéé'ítł'inígíí bee hadaastł'inii nitł'iz ałtaas'éí t'áá ał'ąą ádaat'éii bee nidaashch'ąą', áłtséhígíí jásper, naakiígíí sáfair, tá'ígíí kalsédonii, dį́'ígíí émerald,

²⁰ashdla'ígíí sardániks, hastánígíí sárdiyas, tsosts'idígíí krísolait, tseebíígíí béril, náhást'éígíí tópaz, neeznánígíí krísopreiz, ła'ts'áadahígíí jéísinth, naakits'áadahígíí ámethist.

²¹Naakits'áadahgo ch'é'étiinígíí éí diichiłí bee ádaalyaa, ch'ída'iiztiinígíí t'áá át'é diichiłí bee ádaalyaa. Kintahgóó hahodiit'i'ígíí éí tsésǫ' bigházdiníłtólígíí nahalingo óola t'áá bízhání bee ályaa.

²²Kin haal'áhígi kin bii' sohodizin doo ła' yiiłtsą́ą da, háálá Bóhólníihii Diyin God Aláahgo Ayóó'ábóodziilii índa Dibé Yázhí nilíinii éí ákwii t'áá bí kin bii' sohodizin nilį́.

²³Éí kin haal'áadi jį́honaa'éí, doodaii' tł'éhonaa'éí ádin, háálá Diyin God bee bits'ádi'nílíidii bee adinídíín, áádóó Dibé Yázhí nilíinii bee adinídíinii nilį́.

²⁴Ał'ąą dine'é bił dah nidahaz'áanii adinídíinii yii' dayíkáah doo, áádóó nahasdzáán bikáá'dóó aláahgo naat'áanii danilíinii yee ayóó ádaat'éii yił, yah adahakáah dooleeł.

²⁵Áadi aańdaditį́į́hgóó ts'ídá doo dádadi'doolkał da, háálá áadi tł'éé' ádin doo.

²⁶Ał'ąą dine'é bił dah nidahaz'áanii yee ayóó ádaat'éii índa yee ił danilíinii yił yah adahakáah dooleeł.

²⁷Nidi ha'át'íida t'óó baa'ihii ts'ídá doo biih hodooleeł da, índa doo yildingóó naagháii áádóó biyooch'íidii ts'ídá doo yiih doogáał da, nidi iiná naaltsoos Dibé Yázhí nilíinii bíhígíí biyi' dabízhi' bik'idaasdzohii t'éiyá yiih dookah.