Read Navajo REVELATION 22 Bible Online

REVELATION 22 - Navajo bible

REVELATION 22

¹Nít'éé' Diyin God índa Dibé Yázhí nilíinii bibikáá'dóó nahat'áii bits'ą́ą́dóó tooh niłtólígo tséghádi'nídínii bik'i yazdiiłtólígi át'éego bik'i yazdiiłtóolgo iiná tó ch'ínílį́įgo shich'į' áyiilaa.

²Éí kintahgi hahodiit'i'ígíí ałníí'góó nílį́. Tooh nílínígíí ałts'ą́ą́hjí iiná tsin t'ááłá'í sikaad, bineest'ą' naakits'áadahgo t'áá da'níł'ąą ádaat'éego bąąh náhoodleeł, t'ááłá'í náhidizííd bik'eh bineest'ą' bąąh náhinoot'į́į́ł, áádóó bit'ąą'ígíí éí ał'ąą dine'é bił dah nidahaz'áanii néidiyiiłjeehii át'é.

³Díí kin haal'áadi atíbidi'doolníiłgo bá ha'doodzihii ts'ídá ádin doo. Diyin God índa Dibé Yázhí nilíinii bibikáá'dóó nahat'áii áadi hólǫ́ǫ doo, áádóó bá nidaal'a'ii bich'į' nidahałáa doo.

⁴Hanii' dayoo'į́į doo, índa dabítáa'gi házhi' bik'idaasdzoh doo.

⁵Áádóó ákwe'é tł'éé' ádin doo; bee hool'iní, doodaii' jį́honaa'éí t'áágéedgo bíighah, háálá Bóhólníihii Diyin God t'áá bí bee adinídíinii nilį́į doo, áádóó hool'áágóó ahóyéel'áágóó nidant'áa doo.

⁶Áádóó áshidííniid, Díí saad t'áá aaníinii áádóó bada'ahódlíii ádaat'é. Índa Diyin God yá dahalne'ii biBóhólníihii, éí bá nidaal'a'ii t'óó hodíína'go ádahodooníiłii yich'į' íidoolííł biniyé bidiyingo naal'a'í yich'į' ayííł'a'.

⁷Jó'akon, shí tsį́įłgo nishááh! Díí naaltsoos biyi'dóó saad ádahodooníiłii bee baa dahóóne'ii bik'eh hojíł'ínígíí éí hak'ihojidlí, ní Jesus.

⁸Díí yidiizts'ą́'ígíí áádóó yiyiiłtsánígíí éí shí John ásht'į́. Áko díí dasidéts'ą́ą'go áádóó deiłtsą́ągo diyingo naal'a'í díidí shił ííshją́ą́ áyiilaii bich'į' nahodeeshłaał biniyé biyaajį' nitsidinígo'.

⁹Nidi áshidííniid, T'áadoo ánít'íní! Ni áádóó nik'isóó Diyin God yá dahalne'ii índa díí naaltsoos biyi'dóó saad yik'eh dahół'ínígíí yił nidaal'a'í ła' ásht'į́. Diyin God bich'į' nahółá!

¹⁰Áádóó áshidííniid, Díí naaltsoos biyi'dóó saad ádahodooníiłii bee baa dahóóne'ígíí t'áadoo naníł'iní, háálá k'adę́ę baa hoolzhíísh.

¹¹Doo ákǫ́ǫ́ ájooníiłii háni'dii doo ákǫ́ǫ́ ájooníił da doo, áádóó haa'ihii háni'dii haa'ih doo, áádóó ts'ídá t'áá ákogi ájít'éii háni'dii ts'ídá t'áá ákogi ájooníił doo, índa jidiyinii éí háni'dii jidiyin doo.

¹²Jó'akon, aa hideeshłéełii tsį́įłgo bił nishááh! T'ááłá'í jinítínígo baa nidadziskaii bik'ehgo haa da'diyeeshłééł.

¹³Álfa áádóó Oméga, bee hodeezt'i'ii áádóó bee nihonít'i'ii, áłtséhígíí áádóó akée'diígíí shí éí nishłį́, ní Jesus.

¹⁴Ha'éé' dadzizgisii hoł dahózhǫ́. Éí iiná tsin sikaadii baa dahizhdookahgo, áádóó kin haal'áagi ch'é'étiin góne' yah adahizhdookahgo bee há nahaz'ą́.

¹⁵Nidi łééchąą'í áádóó binda'adlo'go álílee k'ehgo nidahałáii áádóó na'ageh yee tsi'nidaakaii áádóó diné nideiłtseedii áádóó e'elyaii yich'į' nidahałáii, índa t'ááłá'í nítínígo wooch'ííd ayóó'ádayó'níinii éí t'áá ałtso tł'óo'di naaldeeh, ní Jesus.

¹⁶Shí Jesus nishłíinii da'oodlání áłah nídaadleehii díí hane'ígíí bee bił hodoonih biniyé shidiyingo naal'a'í nihich'į' ííł'a'. David bihétł'óól índa bits'ą́ą́dóó yichíiłii, yikáít'áahjį' sǫ' bits'ádi'nílíidgo haagháahii nishłį́.

¹⁷Níłch'i Diyinii índa bá'iigehii, Hágo! ní. Azdiits'a'ii háni'dii, Hágo! jiní. Dibáá' jílíinii háni'dii jíghááh; iiná tó jinízinii háni'dii t'áá jíík'e jidlą́.

¹⁸Díí naaltsoos biyi'dóó saad ádahodooníiłii bee baa dahóóne'go dazdiizts'ą́'ígíí t'ááłá'í jinítínígo ho'nishnííh: ła'da saad bíjii'ą́ągo, Diyin God ałdó' díí naaltsoos bii' bee ach'į' nidahwiiłnáanii yaa hoolne'ígíí yee atíhodoolííł.

¹⁹Áádóó díí naaltsoos biyi'dóó saad ádahodooníiłii bee baa dahóóne'ígíí ła'da bizhdíí'ą́ągo, iiná tsin sikaadii índa diyingo kin haal'áii díí naaltsoos biyi' baa hane'ii łahjį' hóó' dooleeł yę́ę Diyin God hats'ą́ą́' nahjį' kwíidoolííł.

²⁰Díí t'áá ałtso t'áá aaníigo yaa halne'ígíí ání, T'áá aaníí tsį́įłgo nishááh! T'áá ákót'ée doo. Lą́'ąą Bóhólníihii Jesus nínááh!

²¹Bóhólníihii Jesus Christ bibee ajooba' yee Diyin God bidiyį́į́' [danohłíinii t'áá ánółtso] nihik'ijidlíi doo. T'áá ákót'ée doo.