Read Navajo REVELATION 3 Bible Online

REVELATION 3 - Navajo bible

REVELATION 3

¹Sárdisgi da'oodlání áłah nádleehii bidiyingo naal'a'í kót'éego bich'į' ak'e'íłchí: Diyin God biNíłch'i tsosts'idgoígíí índa sǫ' tsosts'id dah yoojihii kóní: Baa nidaahkaii shił bééhózin; dahinohnáago danihi'dójíi nidi dasinoonáago át'é.

²Ch'éédanohdzííd, daadziihii k'adę́ę daninée nidi dabidziilgo áńdaahdle', háálá baa nidaahkaii shiDiyin God binááł t'ah doo hadaałt'éego yiistséeh da.

³Áko na'nitin nihee dahazlį́'ígíí áádóó dasidoots'ą́'ígíí béédaałniihgo dayínóhtą', índa łahgo át'éego tsínáhodiikees bida'ohłééh. Doo ch'éédanohdzíídgóogo ani'įįhiigi át'éego deeshááł, áko hoolzhishgi nihaa deesháłígíí ts'ídá doo nihił béédahózin da doo.

⁴Nidi Sárdisgi nihitahgóó t'ah doo bi'éé' deiłchǫǫhii t'áá díkwíí dabízhi' t'ahdii béédahózin; éí algaigo hadadít'éego shił yikah doo, háálá éí yą́ą́h danilį́.

⁵T'áá ak'eh deesdlį́'ígíí algaigo hadadít'ée doo, áádóó iináájí naaltsoos biyi'dóó házhi' ts'ídá doo k'éé'deeshchǫǫł da. ShiTaa' índa bidiyingo nidaal'a'í dabinááł házhi' bee ádee hadideesdzih.

⁶T'áá háiida daz'diits'a'ii Níłch'i Diyinii éí da'oodlání áłah nídaadleehii kwííłníigo yee yił halne'ígíí háni'dii dajíists'ą́ą́'.

⁷Filadélfiyagi da'oodlání áłah nádleehii bidiyingo naal'a'í kót'éego bich'į' ak'e'íłchí: Diyin nilíinii, t'áá aaníinii nilíinii, David bibee ąą ńdítį́hí neitinii, ąą yidinítą́ągo ła'da doo dáń'di'doołkałii índa dádi'níłkaalgo ła'da doo ąą néididootį́įłii kóní:

⁸Baa nidaahkaii shił bééhózin. Jó'akon, nihidáahgi dáádílkał ąą át'éego áshłaa, éí ła'da doo dá'dółkaał át'ée da; bee adziilii t'áá áłts'íísígo nihee hólónígíí shił bééhózin, nidi shizaad bik'eh dahonoł'į́įgo, Házhi' doo bééhasin da, t'áadoo dashidooniid da.

⁹Jó'akon éí, Jew dine'é daniidlį́, daaníigo nidi doo éí danilį́į́góó dabiyooch'íidii níłch'i bida'iiníziinii binanit'a'í yaa áłah nádleehii danilíinii, éí nihaa dookahgo nihiyaajį' nitsidadidoogohgo ayóó'ádanihíínísh'nínígíí bił béédahózingo ádeeshłííł.

¹⁰Nízaadgóó hada'íínółní, nihidishnínígíí bik'eh dahonoł'į́įgo bąą shí ałdó' nahasdzáán t'áá si'ą́ą́ nít'éé' ach'į' nahwii'ná bee bich'į' hoolzhishígíí, éí nihokáá' dine'é bee bóhontááh át'éii, bits'ą́ąjį' nihííníshtą' doo.

¹¹Jó'akon, tsį́įłgo deeshááł. Diyin God k'ehgo nihee dahólónígíí yéego dayínóhtą', áko nihinaat'á ch'ah ła'da doo nihighaidoot'áał da.

¹²T'áá ak'eh deesdlį́'ígíí shiDiyin God bikin bii' sohodizin biyi' áyah nii'áii nahojílingo áhodeeshłííł, áko áádóó doo ch'ínáázhdoodáał da, áádóó shiDiyin God bízhi', índa shiDiyin God bikin haal'áii bízhi', éí Jerúsalem ániidíii yá'ąąshdę́ę́' shiDiyin God bits'ą́ą́dóó hadahodooleełii, índa t'áá shí shízhi' ániidíígíí hakáa'gi bee bik'e'deeshchííł.

¹³T'áá háiida daz'diits'a'ii Níłch'i Diyinii éí da'oodlání áłah nídaadleehii kwííłníigo yee yił halne'ígíí háni'dii dajíists'ą́ą́'.

¹⁴Leiyodisíyagi da'oodlání áłah nádleehii bidiyingo naal'a'í kót'éego bich'į' ak'e'íłchí: T'áá Ákót'ée Dooleeł nilíinii, éí ba'ahódlíigo t'áá aaníí halne'ii, t'áá éí Diyin God ádayiilaii bee deezt'i'ii kóní:

¹⁵Baa nidaahkaii shił bééhózin; doo dasinoohk'az da índa doo dasinoohdoh da. Dasinoohk'az, doodaii' dasinoohdoh dooleeł yę́ę nisin!

¹⁶Áko doo dasinoohk'azgóó, doodaii' doo dasinoohdohgóó, nidi t'óó dasoozílígo t'óó nihídideeshkoh.

¹⁷Háálá, Asht'į́, asist'įįd, t'áadoo bídin nishłíní da, dadohní, nidi hojooba' ádanoht'éego, áádóó nihaa dayíníigo, áádóó té'é'į́ danohłį́įgo, áádóó doo da'oh'į́į́góó índa t'áá łichí'ígo nidaahkaígíí doo nihił béédahózin da.

¹⁸Éí bąą kónihidishní, da'dooht'įįł biniyé kǫ' bee óola ániidí ánályaii shaa nidahołniih, t'óó baa yáhásingo t'áá łichí'ígo nidaahkaígíí doo yit'į́į da ádoolníłígíí biniyé ééłgaii bee hadadidoohníiłii ałdó' shaa nidahołniih, áádóó da'oh'į́į dooleeł biniyé tłah anáá' bąąh ál'íinii ałdó' shaa nidahołniih.

¹⁹Ayóó'ádaósh'níinii nídadishteh índa atídaashłe'go nidanishtin; éí bąą yéego ádaaht'į́ índa łahgo át'éego tsíńdahidohkeesgo yéego bídanoohdlį́.

²⁰Jó'akon, ch'é'étiindę́ę́' sézį́įgo dáádílkał nánísts'in; t'áá háiida shidiizts'ą́'ígíí índa ąą yidinítánígíí bił yah adeesháałgo bił adeeshį́į́ł índa shił adooyį́į́ł.

²¹T'áá ak'eh deesdlį́'ígíí shí ak'eh déshdlį́į'go shiTaa' bibikáá'dóó nahat'áii bikáa'gi bił dah níkéhígi át'éego, shibikáá'dóó nahat'áii bikáá'dóó shił dah dínóokeełgo baa dideesh'ááł.

²²T'áá háiida daz'diits'a'ii Níłch'i Diyinii éí da'oodlání áłah nídaadleehii kwííłníigo yee yił halne'ígíí háni'dii dajíists'ą́ą́'.