Read Navajo REVELATION 5 Bible Online

REVELATION 5 - Navajo bible

REVELATION 5

¹Bikáá'dóó nahat'áii bikáá'dóó dah sidáii nish'náájí bílák'eegi naaltsoos yisdisii yiiłtsą́. Éí biyi'dę́ę́' áádóó bikáá'dę́ę́' bik'e'ashchį́įgo, bee ída'diiljeehí tsosts'id bee bidáda'deeshjéé'.

²Áádóó diyingo naal'a'í ayóó ábóodziilii yiiłtsą́. Éí ayóó íits'a'go ání, Háíyee' díí naaltsoos bee bidáda'deeshjée'ii ąą deididoozǫ́ǫsgo ąą íidoolíiłgo yą́ą́h nilį́?

³Nít'éé' yá'ąąshdi, doodaii' nahasdzáán bikáa'gi, doodaii' nahasdzáán biyi'di, ła'da naaltsoos ąą ázhdoolíiłgo biyi' góne' jidídóo'įįłgo doo bízhneel'ání da lá.

⁴Áko t'áá íiyisí yícha, háálá ła'da naaltsoos ąą ázhdoolíiłgo [yízhdóołtah, éí doodago] biyi' góne' jidídóo'įįłgo ts'ídá doo bą́ą́h jílíní da lá.

⁵Nít'éé' hastóí ła' áshidííniid, T'áadoo nichaí; jó'akon, Náshdóítsoh Bitsiijį' Ditł'ooígíí Júdah bidine'é bits'ą́ą́dóó nilíinii, t'áá éí David Bihétł'óól nilíinii ak'eh deesdlį́'ígíí, éí naaltsoos áádóó bee ída'diiljeehí tsosts'id bee bidáda'deeshjée'ii ąą íidoolíiłgo yíneel'ą́.

⁶Bikáá'dóó nahat'áii áádóó ha'át'íí shį́į́ dahináanii dį́'ígíí índa hastóí danilíinii bitahgi, Dibé Yázhí nilíinii seesyį́į́ nít'éé' nahalingo sizį́įgo yiiłtsą́, éí bidee' tsosts'id, bináá' ałdó' tsosts'id, anáá' tsosts'idígíí éí Diyin God biNíłch'i tsosts'idgoígíí nahasdzáán bikáá'góó t'áá níłtéél nít'éé' tadabi'doos'a'ígíí ádaat'é.

⁷Dibé Yázhí nilíinii éí bikáá'dóó nahat'áii bikáá'dóó dah sidáii yich'į' dah diiyáago nish'náájígo bílák'eedóó naaltsoos néidii'ą́.

⁸Naaltsoos néidii'ą́ągo, ha'át'íí shį́į́ dahináanii dį́'ígíí índa naadiin dį́į́' hastóí t'ááłá'í nítínígo tsin tł'óół bąąh daneelzhee'go bee nida'a'néii dah dayítįįh, índa óola łeets'aa' biyi'dóó tsin bijeeh dilidgo łikání halchinígíí bii' hadadeezbingo dah dayíkaah, éí Diyin God bidiyį́į́' bisodizin ádaat'éego, éí yił Dibé Yázhí nilíinii bidáahjį' tsé'yaa daneeshjool.

⁹Kódaaníigo sin ániidíii yee dahóótáál: Naaltsoos nídidíí'áałgo bee ída'diiljeehí bee bidáda'deeshjée'ii ąą ádadíílíiłgo bą́ą́h nílį́, háálá ni'diisyį́į́ nít'ée'go ał'ąą dine'é áádóó bizaad ał'ąą ádaat'éii áádóó nihokáá' dine'é danilíinii índa ał'ąą dine'é bił dah nidahaz'áanii t'áá át'éé nít'éé' bitahdę́ę́' Diyin God bá nidił bee diné bik'é niná'íínídlá.

¹⁰Índa nihiDiyin God yá aláahgo naat'áanii danilį́įgo áádóó Diyin God yá nááda'iiłniihii danilį́įgo íinilaa, áko nahasdzáán bikáa'gi bídahólníihgo nidant'áa doo.

¹¹Áko déé'į́į'go bikáá'dóó nahat'áii áádóó ha'át'íí shį́į́ dahináanii índa hastóí danilíinii binaadę́ę́' t'óó ahayóí diyingo nidaal'a'í, t'áadoo bee néelą́'ígóó míildi míilgo

¹²dabiinéé' ayóó íits'a'go diséts'ą́ą́', kódaaníigo, Dibé Yázhí seesyį́ nilíinii éí óhólnííh, at'į́, hódzą́, adziil, ił ídlį́, ayóó é'ét'é índa aa ha'niih bee hodooleełgo yą́ą́h nilį́!

¹³Nít'éé' yá'ąąshdi áádóó nahasdzáán bikáa'gi áádóó nahasdzáán biyi'di índa táyi'di nidaaldeehii, áádóó biyi'di dahólóonii t'áá ałtso kódaaníigo diséts'ą́ą́', Bikáá'dóó nahat'áii bikáá'dóó dah sidáii índa Dibé Yázhí nilíinii éí aa ha'niih, ił ídlį́, ayóó é'ét'é índa adziil hool'áágóó ahóyéel'áágóó bíí' dooleeł!

¹⁴Áádóó ha'át'íí shį́į́ dahináanii dį́'ígíí, T'áá ákót'ée doo! dadííniid, índa naadiin dį́į́' hastóí danilíinii tsé'yaa daneeshjoolgo hool'áágóó ahóyéel'áágóó hináanii yich'į' nidahasá.