Read Navajo REVELATION 8 Bible Online

REVELATION 8 - Navajo bible

REVELATION 8

¹Dibé Yázhí nilíinii bee ída'diiljeehí naaltsoos bee bidáda'deeshjée'ii tsosts'id góne'ígíí ąą yidinízǫ́ǫzgo, yá'ąąshdi tádiin dahalzhinjį' daats'í hodiiyeel.

²Nít'éé' diyingo naal'a'í tsosts'idgo Diyin God yidááhdę́ę́' naazį́įgo, índa béésh łitsoii dilní tsosts'idgo bitaas'nii'go yiiłtsą́.

³Náánáła' diyingo naal'a'í óola łeets'aa' biyi'dóó tsin bijeeh dilidgo łikání halchinii dilidii dah yoo'áałgo, bikáá' náá'iiniihí yíighahjį' niníyáago yiizį'. Éí óola bikáá' náá'iiniihí bikáá'dóó nahat'áii bidáahgi si'ánígíí bikáa'gi tsin bijeeh dilidgo łikání halchinígíí Diyin God bidiyį́į́' t'áá ałtso bisodizin yił ałtaanéidooził biniyé lą'í baa yíjaa'.

⁴Áádóó diyingo naal'a'í bílák'eedóó éí tsin bijeeh dilidgo łikání halchinii bilid Diyin God bidiyį́į́' bisodizin bił, Diyin God bidáahjį' i'iijooł.

⁵Diyingo naal'a'í éí bikáá' náá'iiniihí bikáá'dóó éí łeets'aa' kǫ' yii' haidééłbįįdgo, nahasdzáán bikáá'góó ayííłkaad, áko da'di'ní, áádóó iinéé' dadiists'ą́ą́', áádóó atsiniltł'ish anídahata' índa ni' naha'ná.

⁶Nít'éé' diyingo nidaal'a'í tsosts'idgo dilní tsosts'id bik'eh nítą́ągo dah dayíjáhígíí yee ádadidooniiłgo hasht'e'ádadiilyaa.

⁷Diyingo naal'a'í átséhígíí bidilní yee ádííniidgo, bikéé'dę́ę́' níló índa kǫ', dił bił ałtahgo, nahasdzáán bikáa'jį' nááłtą́. Áko nahasdzáán táá'góó ałts'áádzooígíí t'ááłáhígo haadzo ałtso díílid, áádóó tsin táá'góó ałts'áádzooígíí t'ááłáhígo haadzo adíík'ą́ą́', índa tł'oh dayítsoii ałtso adahideezk'ą́ą́'.

⁸Diyingo naal'a'í naaki góne'ígíí bidilní yee ádííniidgo, ha'át'íí shį́į́ dził ayóó áníłtsogo dook'ą́ą́ł nahalingo tónteel biyi' góne' ahoolghan, áko tónteel táá'góó ałts'áádzooígíí t'ááłáhígo haadzo dił silį́į́',

⁹tónteel biyi'di dahináanii táá'góó ałts'áá'nilii t'ááłáhígo sinil bíighahgo daneezná, índa tsinaa'eeł táá'góó ałts'áá'nilii t'ááłáhígo sinil ásdįįd.

¹⁰Diyingo naal'a'í táá' góne'ígíí bidilní yee ádííniidgo, yá'ąąshdę́ę́' sǫ' ayóó áníłtso léi', honooyééł dook'ą́łígi át'éego dook'ą́ąłgo naalts'id, éí tooh táá'góó ałts'áádzooígíí t'ááłáhígo haadzo áádóó tó hadaazlíinii bik'ijį' naalts'id.

¹¹Sǫ' éí Dích'íi'ii wolyé. Áko tóhígíí táá'góó ałts'áádzooígíí t'ááłáhígo haadzo dích'íí' silį́į́', éí dích'íí' silį́'ígíí biniinaa diné lą'í daneezná.

¹²Diyingo naal'a'í dį́į́' góne'ígíí bidilní yee ádííniidgo, jį́honaa'éí áádóó tł'éhonaa'éí índa sǫ' táá'góó ałts'áádzooígíí t'ááłáhígo haadzo haa shį́į́ daadzaago bił chadahasxéél; jį́įgo adinídínígíí táá'góó ałts'áádzooígíí t'ááłáhígo haadzo bíighahgo doo adinídíin da silį́į́', tł'ée'goígíí ałdó' t'áá ákódzaa.

¹³Ákohgo déé'į́į́' nít'éé' diyingo naal'a'í léi' yá ałníi'gi yit'ahgo ayóó íits'a'go áníigo diséts'ą́ą́', nahasdzáán bikáa'gi kéédahat'ínígíí bich'į', Doo hojooba' ájíníi da! doo hojooba' ájíníi da! doo hojooba' ájíníi da! níigo, háálá diyingo nidaal'a'í táa'go k'adę́ę dilní yee ádaaniih.