Read Navajo REVELATION 9 Bible Online

REVELATION 9 - Navajo bible

REVELATION 9

¹Diyingo naal'a'í ashdla' góne'ígíí bidilní yee ádííniidgo, yá'ąąshii biyi'dę́ę́' nahasdzáán bikáa'jį' sǫ' ła' naalts'idgo yiiłtsą́, áko a'áán doo nihoodzáanii yah ahool'áagi bibee ąą ńdítį́hí baa yítą́.

²A'áán doo nihoodzáanii ąą áyiilaa, áko hótsaago déédíljahdóó łidígíí nahalingo łid ha'ííjool, éí a'áán doo nihoodzą́ą́dę́ę́' łidígíí éí jį́honaa'éí índa níłch'i bił adahiidziihígíí yiyiishį́į́'.

³Áko łidígíí biyi'dę́ę́' nahasdzáán bikáa'jį' nahachagiitsoh áłah silį́į́', éí nahasdzáán bikáa'gi séígo' bidziilígi át'éego bee adziilii baa dadeest'ą́.

⁴Nahasdzáán bikáá'góó tł'oh, doodaii' nanise' dadootł'izhii, doodaii' tsinda ła' atídaohłééh lágo, dabi'doo'niid, nidi diné bítáa'gi Diyin God bibee í'diidlííd doo bik'i naaznilígíí t'éiyá atídaohłééh.

⁵Ashdla' nídeezidjį' t'óó atídeił'į́į dooleełgo baa deet'ą́, nidi nideidoołtsiłgo éí dooda, éí séígo' diné yiyiishishgo atí'éł'ínígi át'éego atída'ał'į́.

⁶Éí yoołkáałdi diné dadeestsaał ch'ééh danízin doo, nidi doo daninée da doo; dadzótsa' laanaa danízin nidi, aniné bits'ąą nidaalyiz doo.

⁷Nahachagiitsoh éí łį́į́' anaa' biniyé hasht'edaalyaaígíí nidahalin; ha'át'íí shį́į́ óola naat'á ch'ah nidahalingo dabitsii'káa'gi naaz'ą́, dabinii' éí nihokáá' dine'é dabinii' nidahalin.

⁸Dabitsii' asdzání bitsii' nidahalin, dabiwoo' náshdóítsoh bitsiijį' daditł'ooígíí biwoo' nidahalin.

⁹Dabijéíts'iin gónaa béésh bąąh naaz'ą́ nidahalin, łį́į́' t'óó ahayóí anaa'góó tsinaabąąs bijáád naakiígíí yił yijahígíí nahalingo bit'a' dadiits'a'.

¹⁰Dabitsee' séígo' bitsee' nidahalin, áádóó bizǫ́ǫ́z dahólǫ́, ashdla' nídeezidjį' diné atídeił'į́į doogo dabitsee' yee dabidziil.

¹¹A'áán doo nihoodzą́ą́dę́ę́' diyingo naal'a'í éí nahachagiitsoh aláahgo yinanit'a'í nilį́. Éí Hííbrew k'ehjí Abádan wolyé, Gríik k'ehjí Apáliyan wolyé.

¹²Áłtsé yéé' silį́į'ii bibahodooshzhiizh; jó'akon, kodóó yéé' naaki náádoodleełii baa nááhodoolzhish.

¹³Diyingo naal'a'í hastą́ą́h góne'ígíí bidilní yee ádííniidgo, óola bikáá' náá'iiniihí Diyin God bidááhdóó si'ánígíí dį́į'go naanídaaz'áhígíí bits'ą́ą́dóó iinéé' diséts'ą́ą́'.

¹⁴Hastą́ą́h góne' diyingo naal'a'í dilní dah yootį́łígíí kwííłní, Tooh ayóó át'éii, Yufréítiiz nílį́įdi dį́į'go diyingo nidaal'a'í bida'astł'ónígíí bidahidíchííd.

¹⁵Áko diyingo nidaal'a'í dį́lt'éego oolkiłii, yoołkáałii, yiziłii, índa yihahii biyi', diné táá'góó ałts'áá'nilígíí t'ááłáhígo dah yikah nideidoołtsił biniyé hasht'e'ádadólzinii bidadeeshchid.

¹⁶Łį́į́' yee siláo dah dayínéhígíí naakidi neeznádiindi mííl nitsaaígíí ákónéelą́ą'go yéélta'go diséts'ą́ą́'.

¹⁷Shił áhoodzaaígíí biyi' kót'éego łį́į́' deiłtsą́: łį́į́' yikáá' dah naazdáhígíí kǫ' áádóó tséghádi'nídínii dootł'izhígíí índa tsékǫ' nidahalingo bijéíts'iin gónaa bąąh naaznil, áádóó łį́į́' dabitsiits'iin éí náshdóítsoh bitsiijį' daditł'ooígíí dabitsiits'iin nidahalin, índa dabizéé'dę́ę́' kǫ' áádóó łid índa tsékǫ' hadadzisih.

¹⁸Díí táa'go bee ach'į' nidahwiilnáanii, kǫ' áádóó łid índa tsékǫ' dabizéé'dóó hadadzisihígíí diné táá'góó ałts'áá'nilígíí t'ááłáhígo dah yikah bee nidaaztseed.

¹⁹Háálá łį́į́' dabizéé' índa dabitsee' yee dabidziil; dabitsee' éí tł'iish nidahalin, bitsiits'iin dahólǫ́ǫgo, éí yee atída'ał'į́.

²⁰Diné łahjį' díí ach'į' nidahwiilnáanii t'áadoo bee nidaaztseedii, éí eda'alyaii t'áá bí ádayiilaii t'áadoo łahgo át'éego yąąh tsíńdadeezkéez da, áko níłch'i bida'iiníziinii yich'į' nidahałáhígíí t'áadoo yóó'adeideez'ą́ą da, éí óola áádóó béésh łigaii áádóó béésh łitsoii áádóó tsé índa tsinda e'elyaago ádaalyaago doo da'oo'į́į da, áádóó doo da'diits'a' da, índa doo nidaakai da nidi, yich'į' nidahałáa doogo t'áadoo yits'áhaaskai da.

²¹Diné nideistseedii, doodaii' binda'adlo'go álílee yee nidahasáhígíí, doodaii' na'ageh yee tsi'nidaaskaii, doodaii' da'neez'į́į'ii t'áadoo łahgo át'éego yąąh tsíńdadeezkéezgo yóó'adeideez'ą́ą da.