Read Navajo RUTH 2 Bible Online

RUTH 2 - Navajo bible

RUTH 2

¹Áko Neiyómii hahastiin yę́ę Elímelek wolyéii ła' diné ayóó át'é at'íinii yik'éí nilį́; éí Bó'az wolyé.

²Áko Ruth éí Mó'ab asdzání nilíinii Neiyómii áyidííniid, Shíni'dii k'ad dá'ák'ehgóó dishááh; tł'oh naadą́ą́' bidee'í daagizhgi ajooba' bee shich'oha'néego shąąh tsídookosígíí bikéé' nahodishdáa doo. Áko ábijiní, Nílááhánee', shich'é'é.

³T'áá áko dah diiyáago dá'ák'ehgi da'ayizhii bikéé'góó nahozhdidá, áko Bó'az éí Elímelek yę́ę bik'éí nilį́įgo bidá'ák'ehjį' ajííyá.

⁴Áádóó jó, Béthlehem kin shijaa'dę́ę́' Bó'az níyáago da'ayizhígíí áyidííniid, Bóhólníihii nihił hólǫ́ǫ doo. Áko áńdahodoo'niid, Bóhólníihii nik'ijidlí.

⁵Ákohgo Bó'az éí bá naal'a'í bik'ehgo da'jiyizhígíí áyidííniid, Díísh háí bich'ikę́ę́h át'į́?

⁶Naal'a'í bik'ehgo da'agizhígíí ánáádoo'niid, Mó'ab dine'é ch'ikę́ę́h át'į́, Mó'ab kéyahdę́ę́' Neiyómii yił nát'áázh.

⁷Éí ání, Nánooshkąąh, shíni' ahanda'iiljoołgo da'ayizhii t'áá bikéé'góó nahodishdáa doo. Ákohgo jiníyáago abínídóó wóshdę́ę́' t'ááłáhígi ájít'į́, t'áá hazhó'ó t'óó kónízahíjį' kin góne' háájoolyį́į́'.

⁸Ákohgo Bó'az éí Ruth ábijiní, K'ad shíísíníłts'ą́ą́', shitsi', díí dá'ák'eh bits'ą́ąjį' náánáłahdi nínááhodídáa doo biniyé dah doóya' lágo, nidi ch'ikę́ę́h shá nidaal'a'ígíí t'éiyá bíighahgóó nanináa doo.

⁹Jó, dá'ák'ehgi da'ayizhgóó t'éí díní'į́į́', ákǫ́ǫ́ bikéé' nahodídá. Tsíłkéí hazhó'ó ábidishní, T'áadoo baa nídaaht'íní. Ákohgo dibáá' nánídleehgo tsíłkéí tó háádayiikáhígi nánídáahgo ná'ídlį́įh doo.

¹⁰Ákohgo yaa azhnoolne'go ni'jį' yaa ádziidzaago ábijiní, Ha'át'éegoshą' ajooba' bee shich'oha'néego shiníníł'į́? Jó, shaa ákoninizį́į'go dé'éyóní nishłį́.

¹¹Nidi Bó'az ánáhodoo'niid, Nahastiin daaztsą́ą́dóó wóshdę́ę́' bizháá'áád nílíní t'áá át'é bá íinidzaaígíí bee shił hóóne'. Nizhé'é áádóó nimá índa nikéyah bits'ą́ą́' dah diniyáago doo ééhonísingi yíníyáá lá.

¹²Íinidzaaígíí éí Bóhólníihii yik'é nich'į' niná'doodlééł, áádóó Ízrel dine'é biBóhólníihii Diyin God nich'į' ni'doolééł; bit'a' biyaajį' nííníyáago baa jiisíníli' lá.

¹³Áko ázhdííniid, Háni'dii náásgóó shich'ohasne'go shiníníł'į́į doo, bóhonishníihii; jó, shik'éé hwííníłtaa', áádóó jiiníba'go ch'ikę́ę́h ná naal'a'í bich'į' háínídzíí'; azhą́ ná naal'a'í doo nishłį́į da nidi ádíní.

¹⁴Áko Bó'az áhodííniid, Hágo, ida'niidą́ą'jį' ahoolzhiizh; bááh ła' dííyį́į́ł; ch'il na'atł'o'ii bitoo'da béé'í'áahgo niyą́. Ákohgo da'ayizhii bíighahgi dzineezdáago shą́ą́' niilt'é hayaa nizhníką́, áádóó ajííyą́ą'go hwiih dzizlį́į́', índa ła' t'áá bi'oh nizh'níyą́ą́'.

¹⁵Ninááhozhdidoodaał biniyé nízhdii'na'go Bó'az be'ashiiké yich'į' haadzíi'go ání, Bíni'dii bida'astł'ónígíí nidi bitahgóó ninááhodidá. T'áadoo t'óó baa yáhásinígi ádabidohníní.

¹⁶Bíni'dii álák'ee hadeezbin bíighahgo tł'oh naadą́ą́' bidee'í nidaahnilgo éí ádá náyiidláah doo. T'áadoo nidadohteehí.

¹⁷Ákohgo dá'ák'ehgi nahodidáago i'íí'ą́, áko náyiizlá'ígíí níłk'íyí'neesxaalgo tł'oh naadą́ą́' bidee'í bee naakáhí íífa wolyéhígíí t'ááłá'í bíighahgo áyiilaa.

¹⁸Éí néidiiką́ągo kintahgóó anáádzá; nihizdeesnilígíí bizháá'áád jílį́į́ nít'é'ígíí bich'į' ííshją́ą́ ájiilaa áádóó ch'iyáán bi'oh ajííyą́'ígíí baazhnínil.

¹⁹Bizháá'áád jílíinii áháłní, Jį́į́dą́ą́' háadishą' ninááhodínídzá? Háadi lá nínáá'iyínídláá'? Diné naa ákoniizį́'ígíí bik'ihojidlíi doo. Ákohgo bizháá'áád jílíinii bił hojoolne'go bił ajííyizhígíí baa hojoolne'go ázhdííniid, Jį́į́dą́ą́' bił íiyizhígíí éí Bó'az wolyé.

²⁰Neiyómii hazháá'áád ábizhdííniid, Éí Bóhólníihii bik'ijidlíi doo; bijooba' éí dahináanii índa daneeznáanii doo yóó'iidi'aah da. Neiyómii ánááhodoo'niid, Éí diné nihik'éí át'é; ahánígo nihik'éí nilį́.

²¹Áko Ruth éí Mó'ab dine'é jílíinii ázhdííniid, Kwe'é ałdó' kóshidííniid, Shidá'ák'ehgi ałtso da'ííyizhjį' tsíłkéí shá nidaal'a'í t'éí bíighahgi nanináa doo.

²²Neiyómii éí Ruth hazháá'áád ábizhdííniid, Éí yá'át'ééh, shich'é'é, nílááh, ch'ikéí bá nidaal'a'í bił nanikaigo doo łahdi dá'ák'ehgi ninááhodídáa da doo.

²³Ákohgo Bó'az bá ch'ikéí nidaal'a'ígíí t'éí bíighahgi nijigháago tł'oh naadą́ą́' bidee'í áádóó tł'oh naadą́ą́' ałtso daagizh; bizháá'áád jílíní bił kééhojit'į́į́ nít'éé'.