Read Navajo RUTH 3 Bible Online

RUTH 3 - Navajo bible

RUTH 3

¹Ákohgo Neiyómii bizháá'áád nilíní áyidííniid, Shich'é'é, da' hooghanísh doo ná hásht'į́į da doo? Éí ná yá'át'éehii át'é.

²Áko k'ad Bó'az éí t'áá aaníí nihik'éí jílį́; éí há nidaal'a'í ch'ikéí bił nanikai. Jó, díí tł'éé' ha'al'éesgi tł'oh naadą́ą́' bidee'í yąąh yoołch'íih doo.

³Éí bąą tá'ádígisgo tłashchíín bee ádíltłah, áádóó ni'éé' agháago yá'át'éehii bee hadínééh áádóó ha'al'éés góyaa díínááł, ákondi doo t'áá hooshch' į' diné bich'į' ádééhodíílzįįł da, ałtso ííyą́ą'go índa.

⁴Áko neeztį́įgo neeztį́įgi hazhó'ó hasht'e'nibídíílyęsh, áádóó yah adíínáałgo bikee'jį' bik'i didííłtsosgo ákǫ́ǫ́ díníítééł, áko ádííníiłgi yee nił hodoolnih.

⁵Áko ánááhodoo'niid, T'áá ádíníígóó ááshníi ł doo.

⁶Áko ha'al'éés góyaa dashdiiyá áádóó bizháá'áád jílíní t'áá áhodííniidígi ádziidzaa.

⁷Áko áádóó Bó'az ííyą́ą́' áádóó oodlą́ą'go bijéí bił hózhǫ́ǫgo tł'oh naadą́ą́' bidee'í t'óó ałk'i yanáa'á bíighahgi neeztį́. Áádóó hazhóó'ógo yah aji'yííts'i'go bikee'jį' bik'izdííłtsoozgo ákwii dzineeztį́.

⁸Tł'é'ííłníi'go diné deesyizgo náhaashjish, nít'éé' jó, hakee'jigo asdzání léi' sitį́į́ lá.

⁹Háishą' ánít'į́? hodííniidgo ázhdííniid, Ruth, ch'ikę́ę́h ná naal'a'í ásht'į́; ná naal'a'í ni'éé' bik'íníłtih, háálá áhánígo nihik'éí nílį́.

¹⁰Áko ábijiní, Bóhólníihii nik'ijidlíi doo, shitsi', díí ajooba' akée'diígíí átséhígíí biláahgo ayóó át'éego shaa jiisíníba'; jó, tsíłkéí bahajoobá'íii, doodaii' at'íiniida t'áadoo ła' bikéé' dah diniyáa da.

¹¹K'ad shitsi', t'áadoo nił yé'í, yíníkeedígíí t'áá ałtso ná bi'eeshłíił doo, háálá shidine'é kintahgóó t'áá ałtso néédahósingo, asdzání ílíinii nílį́.

¹²T'áá aaníí áhánígo nihik'éí nishłį́, ákondi náánáła' shiláahgo áhánígo nihik'éí nilíinii ałdó' hólǫ́.

¹³Hayííłką́ąjį' t'áá akǫ́ǫ́ sínítį́, áko abínígo éí ak'éí nilíinii yaa nidaakaígíí ná yaa naayáago, éí yá'át'ééh; bíni'dii ákónééh, nidi éí t'áadoo ná ádzaagóogo, ts'ídá t'áá aaníí Bóhólníihii hiná; ákót'éego shí ts'ídá t'áá aaníí akéé' góne' ak'éí nilíinii yaa nidaakaígíí ná ádeeshłííł. Hayííłką́ąjį' t'óó sínítį́.

¹⁴Hakee'jigo dziztį́įgo hayííłką́, áko t'ah doo ła' haa ákoniizįįhgóó nízhdii'na', áádóó áhozhdííniid, Ha'al'éesgi asdzání níyáhígíí doo ła'da bił bééhodoozįįł da.

¹⁵Áko ánáábizhdi'ní, Beeldládí éé' bee nanináhígíí de'níłtsóosgo kwe'é dah diiłtsóós. Áko ákwii dashdiiłtsooz índa tł'oh naadą́ą́' bidee'í azis ałní'neel'ą́ bíighahgo há hééł áyiilaago hazéidéíyį́, áádóó kin haal'áágóó jiníyá.

¹⁶Áko índa bizháá'áád jílíní baa nídzídzáago áhodííniid, Shich'é'é, haa hóót'įįd? Áko diné há ádzaaígíí t'áá át'é bee bił hojoolne'go

¹⁷ájíní, Díí tł'oh naadą́ą́' bidee'í hastą́ądi haką́ągo sheiníjaa', háálá áshíłní, Bizháá'áád nílíní bich'į' doo t'áá ákóhígo nihéédíídáał da.

¹⁸Áko ázhdííniid, Haa'íshą', shich'é'é, t'óó hasht'e'sínídá; nił bééhoozingo hait'į́į dooleeł; jó, díí jį́ daats'í t'áadoo hasht'edit'eehí ałtso nidoolnish.