Read Navajo I SAMUEL 10 Bible Online

I SAMUEL 10 - Navajo bible

I SAMUEL 10

¹Ákohgo Sámuel éí ak'ah néidiiką́ągo hatsiit'áagi yayiiziid, áádóó hazts'ǫsgo áhodííniid, Bóhólníihii éí Ízrel dine'é néidiinilgo bíí' silį́į'ii binanit'a'í dííleełgo nidoosįh biniyé ásht'į́.

²Díí jį́ shits'ą́ą́' dah doo'áazhgo Réíchel yóó'ályaaígi Zélzahdi Bénjamin dine'é bikéyahgi diné nidilt'éego yi'ashgo bidááh dooh'ash, áádóó ánihididooniił, Télii há anootą́ą́' yę́ę éí shónáozt'e', áádóó nizhé'é éí télii yaa yooznahgo nijígo t'áá íiyisí nikéé' bíni' íí'á, kóníigo, Shiye' shónéidoot'eeł biniyé k'adshą' haa deeshnííł?

³Áádóó nówehjį' náás dah náádooht'áazhgo Téíbor chéch'il sikaadíjį' woh'ashgo diné tált'éego Béthel haz'ání góde Diyin God yich'į' nidahodoohłaał yiniyé yikahgo bidááh dooh'ash: ła' éí tł'ízí yázhí táa'go yoojih doo, náánáła' éí bááh táa'go yoojih doo, áádóó náánáła'ígíí éí tó abid yee wáin yoołtsos doo.

⁴Áko, Yá'át'ééh, danihididooniiłgo bááh naakigo nihaidooniłígíí nídidoohnił.

⁵Áádóó bik'ijį' Diyin God biyanáalk'idjį' hadooh'ash; ákwe'é Filístiya dine'é bisiláo dah yinééł, áádóó áadi k'adę́ę kintahjį' ch'ínóh'aashgo yanáalk'idę́ę́' Diyin God yá dahalne'ii náá'néełgo tsin tł'óół neeznáá bąąh daneelzhee'go bee nida'a'néii áádóó ásaa' yilghaałígíí áádóó tsin bee í'dílzoołí índa tsin tł'óół naakits'áadah bąąh daneelzhee'go bee nida'a'néii yee nidaanéhígíí alą́ąjį' deíkáah doo. Bikéédę́ę́' éí Diyin God yá dahalne'ii dahalne'go deíkáah doo.

⁶Índa Bóhólníihii biNíłch'i Diyinii nik'i hwiidooleełgo ni ałdó' Diyin God yá dahalne'ii atah dííleełgo Diyin God bá hólne' doo, áádóó diné łahgo át'éii dííleeł.

⁷Áko díí bee éédahózinii nich'į' ádzaago baa nidíínaałígíí baa nanináa doo, háálá Diyin God nił hólǫ́.

⁸Áko Gílgal haz'ání góyaa shilą́ąjį' díínááł, áádóó, jó, shí ałdó' ákóyaa nich'į' deesháałgo didlidgo nááhániihii áádóó nááhidoonihii hózhǫ́ǫ́jí nááhániihii ałdó' nááhidiilnih. Tsosts'id jį́ shiba' sínídáa doo; naa níyáago índa ádíílíłígíí nił bééhodeesįįł.

⁹Áádóó Sámuel bits'ą́ą́' dashdiiyáago Diyin God éí Saul hajéí łahgo ánáyiidlaa, áádóó díí bee éédahózinii t'áá ałtso t'áá éí bijį́ bidahoolyaa.

¹⁰Áko yanáalk'idjį' jiní'áazhgo, shoo, Diyin God yá dahalne'ii hadááh yíkai, áádóó Diyin God biNíłch'i Diyinii hak'i hoole'go éí bitahgi Diyin God bá hojoolne'.

¹¹Áádóó diné t'áá ałtso hwéédahósinii Diyin God yá dahalne'ii éí bił Diyin God bá hojilne'go dahoołtsą́, áko díí diné áda'ahidoo'niid, Kish biye'shą' ha'át'íí yee atah náánásdlį́į́'? Saul wolyéiísh ałdó' Diyin God yá dahalne'ii yidiiyáá lá?

¹²Áko diné léi' t'áá áádóó naagháhígíí ádííniid, Háíyee' bizhé'égo ádaat'į́? Éí bąągo diné t'áá ałtso kódaaní silį́į́', Da' Saul wolyéiísh ałdó' Diyin God yá dahalne'ii yidiiyáá lá?

¹³Ákohgo Diyin God bá ałtso nahodzisne'go yanáalk'idjį' hajiyá.

¹⁴Saul áádóó bá naal'a'í t'áá bił Saul bizhé'é yázhí nabídééłkid, Háágóoshą' nishoo'áázh? Áko ázhdííniid, Télii haniitáá nít'éé', nidi t'áadoo shónéísiilt'e'góó t'óó Sámuel baa niit'áázh.

¹⁵Áádóó Saul bizhé'é yázhí ánááhodoo'niid, Nánooshkąąh shił hólne', Sámuelshą' ha'át'íí nihidííniid?

¹⁶Áádóó Saul hazhé'é yázhí ábizhdííniid, Sámuel hazhó'ó nihił hoolne'go ánihidííniid, Télii éí shónídaozt'e'. Nidi Saul éí aláahgo naat'áanii jidooleełgo Sámuel hoł hoolne'ii t'áadoo bee hazhé'é yázhí bił hojoolne' da.

¹⁷Áko Sámuel éí diné hágo bizhdííniidgo Mízpeh kin shijaa'gi Bóhólníihii bá áłah ájiilaa,

¹⁸áádóó Ízrel dine'é ábizhdííniid, Ízrel dine'é biBóhólníihii Diyin God kóníigo haadzíí', Ííjip kéyahdę́ę́' Ízrel dine'é ch'íní'eezh, áko Ííjip dine'é bílák'eedóó índa aláahgo yee bídahólníihgo bił haz'áanii yee nihide ádahósinii bits'ą́ąjį' yisdánihíínil.

¹⁹Nidi díí jį́ nihiDiyin God doo danoozį́į' da; éí yee nihik'ijį' danilíinii t'áá ałtso áádóó bik'ee ti'dahoohníihii yits'ą́ąjį' t'áá bí yisdánihíínil, nidi nihí ádabidooniid, Doo nił daniidlį́į da; aláahgo naat'áanii ła' nihá ółééh. Éí bąą k'ad dine'é danohłíinii índa mííl danołt'é bik'ehgo Bóhólníihii binááł ádéé dahonołzįįh.

²⁰Áko Sámuel éí Ízrel dine'é t'áá ałtso át'áahjį' áłah ájiilaa. Áko Bénjamin dine'é éí nídii'nil.

²¹Sámuel éí Bénjamin dine'é t'ááłá'í hooghandóó danilíinii át'áahjį' áłah ánáájiidlaa, áádóó Méítrai ba'áłchíní nídii'nil, áadi índa Sámuel éí Méítrai ba'áłchíní át'áahjį' áłah ánáájiidlaago Kish biye' Saul nídiiltį́. Nidi Saul há dahozdéez'į́į́' nít'éé' t'áadoo shójoozt'e' da.

²²Éí bąą Bóhólníihii nídayookąąhgo nidayídééłkid, Díí dinéésh kwe'é níyá? Áádóó Bóhólníihii ádííniid, Jó, hééł tahgi ná'ádees'į́į́'.

²³Áko ákǫ́ǫ́ níjée'go áádę́ę́' hoł nídaaskai, áádóó diné bitahgi dziizį' nít'éé' t'áá hawosígo ádaníłtsogo diné t'áá ałtso bilááh ázníłnééz.

²⁴Áádóó Sámuel éí diné t'áá át'é áyidííniid, Shoo, dahonół'į́. Eii Bóhólníihii nihá náhodiiłtį́. Diné t'áá ałtso bitahgi doo ła' hógi át'ée da. Áko diné t'áá ałtso hadadeeshghaazhgo ádaaní, Aláahgo naat'áanii as'ahgóó hináa le'!

²⁵Ákohgo Sámuel éí aláahgo naat'áanii yinant'áa dooígíí bee diné bił hojoolne', áádóó Sámuel éí naaltsoos yikáá' áyiilaago Bóhólníihii yinááł niiní'ą́. Índa Sámuel éí diné, T'áá ánółtso nídayínóhkááh, bizhdííniidgo t'ááłá'í nítínígo t'áá bí bighangóó anídahaaskai.

²⁶Saul ałdó' Gíbiyah kin haal'áadi bighango ákǫ́ǫ́ dah nídiidzá áádóó Diyin God éí diné bijéí deidiisná'ígíí ałdó' ákǫ́ǫ́ hoł nákai.

²⁷Nidi diné doo yá'ádaashóonii ádadííniid, Hait'éegoshą' díí diné yisdánihidoonił? Áádóó dahojoołxáago bąą t'áadoo hada'iiznil da. Nidi t'áadoo baa nídzíst'įįd da.