Read Navajo I SAMUEL 11 Bible Online

I SAMUEL 11 - Navajo bible

I SAMUEL 11

¹Áman dine'é ła' Néíhash yolyéego bidine'é yił Jéíbesh-gíliyad kin haal'áhígíí bich'į' anaa' ádahodoolíiłgo yik'ijį' danilį́įgo yinaagóó nidahaazná, áádóó Jéíbesh dine'é t'áá ałtso Néíhash ádeidííniid, Nihił ahadi'nít'aahgo ná nideiilnish doo.

²Nidi Néíhash éí Áman dine'é nilíinii Jéíbesh dine'é ábizhdííniid, Díí áhoot'éhígíí bee nihił ahadadi'nisht'ą́ągo danihináá' nish'náájíígíí habídi'yeeshxish, áko índa Ízrel dine'é t'áá ałtso baa yáhásinígi íishłaa doo.

³Jéíbesh dine'é yá aląąjį' naazíinii ádadííniid, Tsosts'id jį́ nihadi'ní'aahgo Ízrel dine'é bitahgóó t'áá át'é hane' ádadiilnííł. Doo ła' yisdánihónííł át'éégóogo éí t'óó naa ádadidiit'ááł.

⁴Ákohgo Saul bikin haal'áii Gíbiyah kin haal'áadi nidaal'a'í hane' haa deiz'ą́ągo diné t'áá ałtso bee bił dahóóne' áádóó diné t'áá ałtso hadadeeshghaazhgo dááchxa.

⁵Áko dá'ák'ehdę́ę́' Saul éí béégashii bee nihwiildlaadii bikéé' níjoodáałgo ázhdííniid, Dinéshą' bich'į' haa dahóót'įįdgo daachxa? Ákohgo Jéíbesh dine'é baa hane' yee hoł dahoolne'.

⁶Áko Diyin God biNíłch'i Saul bik'i hoole'go hane' yidiizts'ą́'ígíí bik'ee ayóó át'éego báhóóchįįd.

⁷Saul éí béégashii bee nihwiildlaadii neistseedgo niyiishgizh, áko naal'a'í danilíinii éí Ízrel dine'é kéédahat'į́į́góó adayiizhjaa'go ádaaní, T'áá háiida Saul índa Sámuel doo bikéé' dashdiiyáhígíí éí habéégashii ałdó' bich'į' ákóhodoonííł. Ákohgo diné éí ayóó át'éego Bóhólníihii yik'ee bił yéé' dahazlį́į'go t'áá łahjį' ch'íníjéé'.

⁸Áko Bíízek kin shijaa'jį' diné ch'íheezhjé'ígíí jííłta'; nít'éé' Ízrel dine'é éí táadi neeznádiindi mííl yilt'éé lá, índa Júdah dine'é éí tádiindi mííl lá.

⁹Áko naal'a'í yíkaígíí ádeiłní, Jéíbesh-gíliyad dine'é ádabididoohniił, Yiską́ągo honiigaigo yisdádoohkah. Áko naal'a'í yíkaigo Jéíbesh-gíliyad dine'é hane' yee yił dahoolne'go t'áá íiyisí yaa bił dahóózhǫǫd.

¹⁰Éí bąą Jéíbesh dine'é éí Néíhash ádeidííniid, Yiską́ągo t'áá nihí t'óó nihich'į' diikahgo t'áá nihí danohsinígi ádanihidoohłííł.

¹¹Áko náábiiskání Saul éí diné táa'go dah yinéełgo áyiilaa, áádóó baa jíishjée' doo biniyé Áman dine'é dah deínéhígi abínígo jíkai, áko ałníní'ą́ąjį' bik'i jiijée'go nidadzistseed; ch'éékaígíí éí taozhjée'go nidilt'é nidi doo ła' t'ááłáhígi naa'aash da nít'éé'.

¹²Ákohgo Ízrel dine'é éí Sámuel ádeidííniid, Háishą' ánihiłní, Da' Saul wolyéiísh nihinant'áa doo? Éí diné ádanihizhdííniidígíí náhodii'éeshgo nidahodiiltsxił.

¹³Nidi Saul ání, Díí jį́ diné doo ła' diyoolyéeł da, háálá díí jį́ Bóhólníihii éí Ízrel dine'é yee yisdádookahii áyiilaa.

¹⁴Nít'éé' Sámuel éí diné áyidííniid, Tį', Gílgal haz'ánígóó diikahgo áadi aláahgo bee óhólníihii ániidí áńdadiilnííł.

¹⁵Ákohgo diné t'áá ałtso Gílgalgóó dah diikai, áádóó Gílgalgi Bóhólníihii binááł Saul éí aláahgo naat'áanii ádayiilaa. Áadi nááhidoonihii hózhǫ́ǫ́jí nááhániihii Bóhólníihii binááł náádayiisnii', áko áadi Saul índa Ízrel dine'é t'áá ałtso ayóó át'éego bił dahóózhǫǫd.