Read Navajo I SAMUEL 12 Bible Online

I SAMUEL 12 - Navajo bible

I SAMUEL 12

¹Áko Sámuel éí Ízrel dine'é t'áá ałtso ábizhdííniid, Ádashidooniidígíí t'áá ałtso nihá diséts'ą́ą́', áko aláahgo naat'áanii nihinant'áago ánihiishłaa.

²Shoo, k'ad éí aláahgo naat'áanii nihá yigááł; shí éí hasistihgo shitsii' yiiba'; jó, shiye'ké nihił yikah, índa shí éí t'áá ániid naasháádą́ą́' díí jį́įjį' nihinááł níyá.

³Shoo, kǫ́ǫ́ sézį́; Bóhólníihii binááł áádóó ak'ah yik'i yayiiziidgo yiyíísį́į'ii binááł shaa dahołne'. Háishą' bibéégashii bigha nishtį́? Háishą' bitélii bigha nishtį́? Háishą' bi'délo'? Háishą' bide íinisin? Háishą' bee naho'diiniihii sheinínilgo shíni' ííłdingo áyiilaa? Éí nihił k'éédahodeeshdǫǫł.

⁴Áko ádahodííniid, Doo nihinisínílo' da, doodaii' t'áadoo nihide íininizį́į' da, doodaii' t'áadoo le'é ła' t'áadoo diné bigháínídláa da.

⁵Áko ábizhdííniid, Bóhólníihii éí oo'íinii nilį́ áádóó díí jį́ ak'ah yik'i yayiiziidgo yiyíísį́į'ii éí oo'íinii nilį́įgo ha'át'íhída t'áadoo shílák'eedóó nídadooláa da, áko ádaaní, Jó, bí oo'íinii nilį́į́ lá.

⁶Áko Sámuel éí diné áyidííniid, Bóhólníihii éí Mózes áádóó Éran niinínilgo danihizhé'é yę́ę Ííjip kéyahdę́ę́' ch'íiní'eezh.

⁷Éí bąą k'ad hazhó'ó nidasoozį́; Bóhólníihii binááł t'áá ákogi át'éego Bóhólníihii nihá áát'įįdígíí áádóó danihizhé'é yę́ę yá áát'įįdígíí bídadéét'i'ii bee nihich'į' haasdziih.

⁸Áko Ííjip kéyahgóó Jéíkab ííyáago áádóó danihizhé'é yę́ę Bóhólníihii nídayooskango Bóhólníihii éí Mózes áádóó Éran ákǫ́ǫ́ yiyííł'aadgo Ííjip kéyahdę́ę́' danihizhé'é yę́ę ch'íiní'eezh áádóó díí kéyahgi kééhojit'į́įgo áhoolaa.

⁹Nidi Bóhólníihii haDiyin God baa dadziyooznah, áko Héízor kin haal'áádóó siláo binanit'a'í Sísera áádóó Filístiya dine'é índa Mó'ab dine'é binanit'a'í bich'į' nidaho'diiznii'go bił da'ahijigą́ą́ nít'éé'.

¹⁰Áko Bóhólníihii nídayookąąhgo ádadííniid, Ádił nida'ayiilzíihgo Bóhólníihii yóó'adadiit'ą́ą́ lá, áádóó eda'alyaii Béíyal wolyéii índa Áshtarath wolyéii bá nideiil'a' nít'éé'. Nidi k'ad nihida'ana'í bílák'eedę́ę́' háánihí'níiłgo ná nideiil'a' doo.

¹¹Áko Jerabéíyal áádóó Bíídan áádóó Jéfthah índa Sámuel éí Bóhólníihii dabííł'aadgo nihi'ana'í bits'ą́ąjį' yisdádanihiiznil, áko hasih haz'ą́ągi kéédahoht'į́.

¹²Áko Áman dine'é aláahgo binanit'a'í Néíhash wolyéii nihich'į' nídiibaa'go ádashidooniid, Doodayéi, aláahgo naat'áanii yee' ła' nihinant'áa doo, azhą́ Bóhólníihii nihiDiyin God aláahgo nihinant'áa nidi ákódadooniid.

¹³Éí bąą k'ad aláahgo naat'áanii nídadoołtíinii danół'į́, eii dahonohsinii ájít'į́; jó, Bóhólníihii aláahgo naat'áanii jílíinii nihinazhnit'áago áhoolaa.

¹⁴Bóhólníihii dadíínóhsinígíí bá nidaał'a'go áádóó bizaad bik'eh dahonoł'į́įgo índa Bóhólníihii bibik'eh ó'oo'níi łii doo bich'į' nidaałteehgóogo nihí áádóó aláahgo naat'áanii nihinant'áago Bóhólníihii nihiDiyin God bikéé' dayínóhkáah dooleeł.

¹⁵Nidi Bóhólníihii bizaad doo bik'eh dahonoł'į́į́góogo índa bibik'eh ó'oo'níiłii bich'į' nidaałteehgo Bóhólníihii danihizhé'é yę́ę atíyííł'įįd yę́ęgi át'éego yee atí'éł'íinii yee nihik'ijį' nilį́į doo.

¹⁶Éí bąą k'ad hazhó'ó nisoozį́įgo t'áadoo le'é ayóó át'éii dadínóoł'įįł; éí Bóhólníihii nihinááł íidoolííł.

¹⁷Díí jį́į́sh doo tł'oh naadą́ą́' dadiigaii da? Bóhólníihii baa néideeshkąąłgo adi'níigo nahałtingo íidoolííł, áko baa ákodadínóohsįįłígíí índa dadínóoł'įįłígíí éí ts'ídá ayóó át'éego doo yá'áshónígi ádaot'įįdígíí yee' Bóhólníihii binááł ádaot'įįd; jó, aláahgo naat'áanii ádá dayínóokeed.

¹⁸Ákohgo Sámuel éí Bóhólníihii náyooskango t' áá éí bijį́ Bóhólníihii éí adi'níigo nahałtingo áyiilaa; nít'éé' diné t'áá ałtso ayóó át'éego Bóhólníihii índa Sámuel yik'ee bił yéé' dahazlį́į́'.

¹⁹Áko diné t'áá ałtso Sámuel ádeidííniid, Ná naal'a'í niidlíinii, Bóhólníihii niDiyin God bich'į' nihá ná'iinikąąh, áko doo dadíníi'néeł da, háálá t'óó yówehda ádił ninááda'ayiilzíihgo doo yá'áshónígi áńdeiit'įįhgo aláahgo naat'áanii ádá nídeíníiki'.

²⁰Áko Sámuel éí diné áyidííniid, T'áadoo ádił dahonołyé'í; ts'ídá doo yá'áshónígi ánáádaaht'į́įgo t'áadoo yee' t'ą́ąjį' dahohjahí; Bóhólníihii bikéé' dayínóhkááh, ákót'éego nihijéí t'áá át'é bee Bóhólníihii bá nidaał'a'.

²¹Áádóó t'áadoo t'ą́ą́' anáhóhjeehí; éí t'áadoo nídandlíní da; doo bee íná'iideeł da, índa doo bee yisdáhóót'i' da, háálá éí t'áadoo nídandlíní da.

²²Jó, Bóhólníihii bidine'é ts'ídá doo yóó'iidó'ááł át'éégóó bízhi' ayóó át'éego bee baa ha'niih doo, háálá Bóhólníihii bił hózhǫ́ǫgo t'áá bí ádá bidine'é danohłį́įgo ánihidoolííł.

²³Áádóó ałdó' díí ts'ídá doo nisin da: nihá sodiszingo nideesht'ihígíí bee Bóhólníihii bich'į' ádił adeesih, nidi nizhónígo índa yá'át'éehgo dahinohnáa dooleełii t'éiyá bínanihinishtin doo.

²⁴T'áá hazhó'ó Bóhólníihii t'éí dadíínóhsin, áádóó nihijéí t'áá át'é bee ts'ídá t'áá aaníinii bik'ehgo bá chodaoh'į́, háálá nabik'ítsáhákeesgo ts' ídá ayóó ádaat'éii nihá áyiilaa.

²⁵Nidi doo yá'áshónígi ánáádaaht'į́į́ ládą́ą́' éí aláahgo nihinanit'a'í t'áá bił ádanihidi'dooldįįł.