Read Navajo I SAMUEL 14 Bible Online

I SAMUEL 14 - Navajo bible

I SAMUEL 14

¹Ákódzaago ła'a jį́ Saul biye' Jánathan éí dinééh habee na'abaahí há neijaahígíí ábizhdííniid, Tį', Filístiya dine'é dah yinéłígóó hidiit'ashgo bik'i ahi'díníilchééł. Nidi hazhé'é t'áadoo bił hojilne'í ájít'į́.

²Saul éí Gíbiyah kin haal'áhí biyeijígo Mígran haz'ánígi tsin sikaadii pámgrenit wolyéii biyaagi nijighá. Diné hastą́ądi neeznádiin daats'í yilt'éego hoł naakai.

³Íílai biye' Fíniyas wolyéii biye'ké Aháítab áádóó Íkabad wolyé. Áko Aháítab biye' éí Aháíjah joolyéii Sháílohgi Bóhólníihii bá náá'iiłniihii jílį́įgo íífad wolyéii biih níjídááh nít'éé'. Áko Jánathan dah diiyáhígíí diné doo bił béédahózin da.

⁴Áádóó Jánathan éí Filístiya dine'é baa nihizhdoodááł biniyé tséta' góne' ajííyáago, łahjí tsé dah deeshzhago deez'áii éí Bózez wolyé, łahjígo deez'áhígíí éí Sííneh wolyé.

⁵Ła' tsé deez'áhígíí éí náhookǫsjí Míkmash báhátis bich'į'go deez'á, ła'ígíí éí shádi'ááhjí Gíbiyah kin haal'áii bich'į'go deez'á.

⁶Jánathan éí dinééh habee na'abaahí há neijaahígíí ábizhdííniid, Hágo, doo bąąh nídahineeshgizhii dah yinéłígíí baa nihidiit'ash. Bóhólníihii nihá nidoolnishgo da'át'é, háálá Bóhólníihii t'áadoo binółtł'ahígóó lą'ígo, doodaii' t'áá díkwíhí nidi choyooł'į́į doo biniyé yisdáyiinííł.

⁷Áko habee na'abaahí há neijaahígíí áhodííniid, Nijéí bee baa nitsíníkeesígíí t'áá át'é ánílééh, áádóó jó, baa nitsíníkeesii bik'ehgo nił honishłǫ́.

⁸Ákohgo Jánathan ájíní, Shoo, diné bich'į' tsé'naa diit'ash, áádóó t'áá nihí bich'į' ádééhodiilzįįł.

⁹T'áá ákwe'é sooké danihidííniidgo éí t'áá ákwe'é siikée doo, índa doo ákóde bich'į' diit'ash da.

¹⁰Nidi, Hágo, nihaa noh'aash, danihidííniidgo éí ákóde bich'į' diit'ash, háálá Bóhólníihii nihílák'ee hodíí'ą́ą doo, áko éí bee ééhózin doo.

¹¹Ákohgo Filístiya dine'é dah yinéełii bich'į' yit'íní ízh'diilyaa, áádóó Filístiya dine'é ádadííniid, Shoo, Hííbrew dine'é léi' adahasdzą́ą́góó ná'ádees'į́į́'dę́ę́' haazh'áázh lá.

¹²Áko diné dah yinéłígíí éí Jánathan áádóó habee na'abaahí há neijaahígíí ádeidííniid, Hágo, nihaa noh'aash. Díí dínóoł'įįł. Áko Jánathan éí habee na'abaahí há neijaahígíí ábizhdííniid, Hágo shikéé' yínááł, háálá Bóhólníihii éí Ízrel dine'é yílák'ee hodíí'ą́.

¹³Áádóó Jánathan éí hála' áádóó hakee' bee hadzis'na' áádóó habee na'abaahí há neijaahígíí ałdó' hakéé' haas'na'. Áko Jánathan éí siláo na'ayídziisxaal áádóó habee na'abaahí há neijaahígíí hakéé'dę́ę́' yigáałgo ałtso neistseed.

¹⁴Áko Jánathan áádóó habee na'abaahí há neijaahígíí bił ts'ídá áłtsé diné nidzistseedígíí éí dá'ák'ehgi t'ááłá'í náhásdzo ałníí' bíighahgo bikáa'gi naadiingo diné nidzistseed.

¹⁵Áádóó ákwii diné dah deínéhígíí bitah dahoditłid áádóó diné t'áá ałtso bitahgóó, índa siláo hat'ááh doojahii ałdó' bitah dahoditłid; ni' nahaasnáá', áko ayóó át'éego bił dahóóląądgo bitah dahoditłid.

¹⁶Áádóó Bénjamin bikéyah biyi' Gíbiyahgi Saul biha'asídí dadéé'į́į́' nít'éé', shoo, t'óó ahojíyóí na'ahídeizhnilghaałgo atída'ahizhdil'į́.

¹⁷Ákohgo Saul éí diné bił naakaígíí áyidííniid, Diné deínółta'. Háí lá nihits'áníyáá lá? Áko diné dajííłta' nít'éé'. Jó, Jánathan áádóó bibee na'abaahí bá neijaahígíí doo hatah naa'aash da lá.

¹⁸Áko Saul éí Aháíjah áyidííniid, Diyin God bitsits'aa' dílzinii nídii'aah; jó, ákwii hoolzhish yę́ędą́ą́' Diyin God bitsits'aa' dílzinii Ízrel dine'é ba'ałk'ee si'ą́.

¹⁹Áádóó Saul éí náá'iiłniihii bich'į' yájíłti'go Filístiya dine'é dah yinéłídę́ę́' t'óó yówehda hahodíídláád. Áko Saul éí náá'iiłniihii ííłní, Níla' yaa kónánídlééh.

²⁰Ákohgo Saul áádóó diné t'áá ałtso hoł naakaígíí ahíikaigo anaa' baa na'aldeeh góne' ííjéé', áádóó jó, diné t'ááłá'í nítínígo diltłish yee bik'is nideiłtseed, índa ayóó át'éego t'óó bił dahóóląąd.

²¹Hííbrew dine'é ła' Filístiya dine'é dah yinéłíjí da'jítah nít'éé' yę́ę Ízrel dine'é éí Saul áádóó Jánathan yił naakaígíí bitah nídziiskai.

²²T'áá ákót'éego Dził Íífreiyimgi Ízrel dine'é t'áá ádzíłtso nídazdeest'į́į́' yę́ę Filístiya dine'é dadínéezhchą́ą'go baa dahozdiizts'ą́ą́', áko hó ałdó' bikéé' dah dazhdiibaa'.

²³Ákohgo éí bijį́ Bóhólníihii éí Ízrel dine'é yisdáyíínil; Beth-éíven kin shijaa'jį' bił da'ahijoogą́ą́'.

²⁴Áádóó éí bijį́ Ízrel dine'é t'áá íiyisí niseekai, háálá Saul łahgo haz'ą́ yee hooł'a'go diné yich'į' haadzíi'go ání, T'áadoo e'e'aahí diné ajííyą́ą'ii éí hóyée'go há hadoodzih, áko shi'ana'í dajílínígíí ts'ídá t'áá k'éédahodideeshdlíłí. Áko diné t'áadoo da'ayání i'íí'ą́.

²⁵Áko tsintahgi diné t'áá át'é nidahaaskai; ákwii tsés'ná bitł'izh ni'góó hólǫ́ǫ́ lá.

²⁶Áko tsintahgi diné neheeskaigo, jó, tsés'ná bitł'izh nidahidilch'ą́ą́ł, nidi diné t'áadoo ła' yił ázadoolchid da, háálá hóyée'go áha'oodzíi'ii bik'ee hoł daayéé'.

²⁷Nidi Jánathan hazhé'é éí hóyée'go diné bá ha'doodzihgo yee haadzíi'ii t'áadoo dzidiizts'ą́ą' da, áko hagish hálák'ee sitánígíí bee tsés'ná bitł'izh biih dzíítsigo bił ázazhdoolchid. Áádóó nít'éé' hoł ch'ídi'nídláád.

²⁸Áko Ízrel diné ła' ádííniid, Nizhé'é díí t'áá íiyisí yee hooł'a'go ání, Díí jį́ diné ła' ajííyą́ą'ii hóyée'go bá ha'doodzihii jílį́. Áko diné t'áá íiyisí bąąh nidahwiiskaad.

²⁹Áádóó Jánathan ájíní, Shizhé'é díí kéyahgi diné bich'į' hozdiisnáá', shoo, nánooshkąąh, tsés'ná bit ł'izh sélįhígíí bąą shił ch'ídi'nídláád.

³⁰Dooládó' t'ah yówehgo ana'í bindaalye'é yik'ídaaskaigo níík'eh díí jį́ dayííyą́ą'go haadashą' néelą́ą́' ana'í naaztseed dooleeł nít'éé'. Jó, k'ad Filístiya dine'é bitahgi alááh ánéelą́ą'goósh ábi'disdįįd?

³¹Íídą́ą́' Míkmash báhátisdóó Áíjalan kin haal'áajį' Filístiya dine'é ádeisdįįd, áádóó Ízrel dine'é t'áá íiyisí bąąh nidahwiiskaad.

³²Áko t'áá bizááká ana'í bindaalye'é bich'į' ajiizhjée'go dibé áádóó dóola índa béégashii yáázh nidadzistseedgo dił t'áá bił dajííyą́ą́'.

³³Áko Saul yił dahoolne'go ádaaní, Shoo, diné éí Bóhólníihii yich'į' ádił da'asiih, dił t'áá yił da'ííyą́ą́' lá! Áko ábijiní, Bee haz'áanii ádił nidahooti'. Aadę́ę́' díí jį́ tsé ayóó áníłtsxoii shich'į' ninołmáás.

³⁴Áko Saul ájíní, Diné bitahgóó dadohkáahgo ádabidohní, Diné t'ááłá'í nítínígo bidóola, doodaii' bidibéda nideidiyoo'ishgo nideidoołtsił áádóó t'áá kǫ́ǫ́ deidooyį́į́ł, ákondi Bóhólníihii doo bich'į' ádił nida'ayohsíih da doogo atsį' t'áá bił dił t'áadoo daahsání. Ákohgo t'áá éí bitł'éé' diné t'ááłá'í nítínígo bidóola nidayiizh'eezhgo ákwii nideistseed.

³⁵Áko Saul éí bikáá' náá'iiniihí Bóhólníihii yá áyiilaa, jó, éí ts'ídá áłtsé Bóhólníihii yá áyiilaa.

³⁶Áádóó Saul ájíní, Sołtį', díí tł'éé' Filístiya dine'é bikéé' hidiikah, áádóó nideiltsxeedgo hwiidool'įįł; háni'dii doo ła' doodzih da. Áko ádaaní, T'áá nił yá'át'éhígi át'éego ánínééh. Nidi náá'iiłniihii ání, Haa'íshą' Diyin God bich'į' nidiikahgo sodadidiilzįįł.

³⁷Áko Saul éí Diyin God kót'é ha'níinii yíyókeedgo ání, Filístiya dine'é daats'í bich'į' anaa' áháshłééh? Ízrel dine'é daats'í bílák'ee dabididíí'ááł? Nidi éí bijį́ t'áadoo hach'į' haadzíi' da.

³⁸Saul ání, Haa'íshą' diné yá aląąjį' naazíinii danohłíinii t'áá ánółtso, hágo, áko nihił béédahodoozįįł áádóó dadínóoł'įįł háishą' jį́į́dą́ą́' ádił ni'iidzííh yaa naayá.

³⁹Jó, ts'ídá t'áá aaníí Bóhólníihii Ízrel dine'é yisdáyiiníiłii hiná; ákót'éego shiye' Jánathan ádił asiihgo nidi ts'ídá t'áá aaníí dazdootsaał. Nidi diné bitahdę́ę́' t'áadoo ła' hach'į' haadzí'í da.

⁴⁰Ákohgo Ízrel dine'é t'áá ałtso ábizhdííniid, T'ááłáhíjí nooł'áa doo, áko shí áádóó shiye' Jánathan bił łahjí siidzį́į doo. Áko diné éí Saul ádeidííniid, T'áá nił yá'át'éhígi át'éego ánínééh.

⁴¹Éí bąą Saul éí Ízrel dine' é biBóhólníihii Diyin God ábijiní, T'áá aaníí yáá'iilt'e' nihá ánílééh. Áko Saul áádóó Jánathan bik'i hodiit'ą́, nidi Ízrel dine'é éí t'áadoo baa hwiiníst'įįd da.

⁴²Áádóó Saul ájíní, Shí áádóó shiye' Jánathan nihita'gi yáá'iilt'e' ánílééh. Nít'éé' Jánathan bik'i hodiit'ą́.

⁴³Áko Saul éí Jánathan áyidííniid, Baa nisíníyáhígíí bee shił hólne'. Áádóó Jánathan hoł hoolne'go ání, Shigish shílák'ee sitánígíí bee tsés'ná bitł'izh biih yítsigo sélįh. Kǫ́ǫ́ sézį́, t'áá aaníí dadeestsaał.

⁴⁴Áko Saul ání, Shígoyee' Diyin God ákóshidoolííł áádóó t'ah yówehígi át'éego ákóshidoolííł; shoo, Jánathan nílíinii, t'áá aaníí dadíítsaał.

⁴⁵Áádóó diné éí Saul ádeidííniid, Da' Jánathan éí bee yisdá'iildéehii ayóó át'éii Ízrel dine'é yá áyiilaaígíísh dadootsaał lá? Ts'ídá dooda lą́ą, ts'ídá t'áá aaníí Bóhólníihii hiná; ákót'éego ts'ídá t'áá aaníí hatsii' t'ááłá'í nidi doo ni'jį' nidoodił da, háálá díí jį́ Diyin God bił nijishnish. Kót'éego diné éí Jánathan yisdádeistį́įgo t'áadoo daaztsą́ą da.

⁴⁶Saul éí Filístiya dine'é bikéé' joogáałii t'óó t'ą́ą́' hajííyáago Filístiya dine'é t'áá bí bikéyahgóó anídahaaskai.

⁴⁷Saul éí Ízrel dine'é binazhnit'áago t'áá ałtsojį' hwe'ana'í bik'ijį' nijibaah nít'éé'; Mó'ab dine'é áádóó Áman dine'é áádóó Íídam dine'é áádóó Zóbah dine'é aláahgo binanit'a'í danilíinii índa Filístiya dine'é bik'ijį' nidzizbaa'; t'áá dah nízhdiidáhíjigo hak'ee chaał nidahoyiinííh nít'éé'.

⁴⁸Áádóó siláo áłah ájiilaago Ámalek dine'é nidadzistseed, áádóó Ízrel dine'é atídabił'íinii bits'ą́ąjį' yisdájíínil.

⁴⁹Áko Saul biye'ké éí Jánathan áádóó Íshuwai índa Melkishúwa. Áádóó bitsi'ké éí naaki, alą́ąjį' yizhchínígíí éí Míírab áádóó akéédę́'ígíí éí Máíkal.

⁵⁰Saul be'asdzą́ą́ Ahínowam wolyéego Ahímeiyaz bitsi' jílį́. Bisiláo binaat'áanii Ábner éí Ner biye' nilį́; Ner éí Saul bizhé'é yázhí nilį́,

⁵¹áádóó Kish éí Saul yizhé'é nilį́, Ner éí Ábner bizhé'é jílį́; Ner éí Éíbiyel biye' nilį́.

⁵²Saul nazhnit'áago Filístiya dine'é bił da'ahijigą́ągo hwíiníłką́. Áko Saul éí diné bidziilii, doodaii' diné doo niseedáii jiiłtséehgo t'áá áko hwíí' ádajile' nít'éé'.