Read Navajo I SAMUEL 17 Bible Online

I SAMUEL 17 - Navajo bible

I SAMUEL 17

¹Filístiya dine'é bisiláo anaa' ádeidoolííł biniyé Shóko kin haal'áadi Júdah kéyahgi áłah daazlį́į́', áko Shóko áádóó Azííkah kin shijaa' bita'gi éí Iifesdámim haz'ánígi nidahaazná.

²Áko Saul áádóó Ízrel dine'é yił áłah silį́į'go Filístiya dine'é bich'į' anaa' ádeidoolííł biniyé Íílah yíldzis bíighahgi nidahaazná.

³Áko Filístiya dine'é éí dziłghą́ą́'dę́ę'go ninádahaakah índa Ízrel dine'é ałdó' łahdę́ę'go dziłghą́ą́'dę́ę́' ninádahaakah, áko dah oonéłígíí bita'gi hóteelgo yíldzis.

⁴Nít'éé' naabaahii doo bik'eh hodidleehii léi' Filístiya dine'é dah yinéłídóó ch'íníyá; éí Goláíyath wolyé; Gath kin haal'áádóó naaghá; náhást'éí ké siláádóó yílá deests'ǫ́ǫ́d áníłnééz.

⁵Na'abaahjí béésh łitsoii ch'ahígíí bik'i dí'ą́, áádóó béésh éé' bee na'abaahígíí yee hadít'é, áko éí éé' béésh łitsoii bee ályaaígíí ashdladi mííl shékel wolyéii bíighahgo áníłdáás.

⁶Áádóó bijátisgi béésh łitsoii bik'ésti', áádóó béésh łitsoii tsiidétáán anáhálghą́hígíí bine'dę́ę́' dah sitą́.

⁷Áko tsiidétáán neitinígíí éí da'atł'óii bi'áah sitánígi áníldííl, áádóó tsiidétáán bílátahjį' deení dah si'ánígíí éí béésh dootł'izh bee ályaii hastą́ądi neeznádiin shékel wolyéii bíighahgo áníłdáás, índa binaage' neiłjidígíí bich'ą́ą́h naaghá.

⁸Áko Goláíyath sizį́įgo Ízrel dine'é bisiláo dah yinéłígíí yich'į' hadoolghaazhgo ání, Ha'át'éegoshą' anaa' biniyé ch'ínooná? Da' shíísh doo Filístiya dine'é nishł į́į da? Áádóó nihíísh doo Saul binaal'a'í danohłį́į da? Diné ła' nídadoołteehgo bíni'dii shich'į' hididááh.

⁹Bízhneel'ą́ągo shił ahijoogą́ą'go shijiisxį́į́ ládą́ą́' nihinaalte' daniidlį́į doo, nidi hak'eh díshdlį́į'go hoyéłhį́į́ ládą́ą́' nihinaalte' danohłį́įgo nihá nidaał'a' doo.

¹⁰Áko Filístiya dine'é ání, Ízrel dine'é bisiláo nabé'ésh'įįhgo díí jį́ ła' shich'į' doł'áago bił ahideeshgą́ą́ł.

¹¹Áko Saul áádóó Ízrel dine'é t'áá ałtso éí Filístiya dine'é bizaad deidiizts'ą́ą'go yik'ee nisidaaskai áádóó ayóó át'éego nídaasdzííd.

¹²Áko David éí Éfrata dine'é nilíinii biye' jílį́; éí Júdah kéyahgi Béthlehem kin shijaa'dóó naagháii Jésii wolyé; biye'ké tseebílt'é. Saul nant'áago hoolzhish yę́ędą́ą́' Jésii éí diné bitahgi łą́ binááhaigo t'áá hazhó'ó hadzistih.

¹³Áko Jésii biye'ké táá' alą́ąjį' naakaígíí anaa'góó Saul yikéé' aheeskai; alą́ąjį'ígíí éí Iiláíyab wolyé, ákóne'ígíí éí Abínadab; táá' góne'ígíí éí Shámmah.

¹⁴Áádóó David akéé'dóó nijighá, áko táa'go alą́ąjį'ígíí éí Saul yikéé' naakai.

¹⁵Nidi David éí hazhé'é bidibé baa áhojilyą́ągo Béthlehem kin shijaa'dóó Saul bich'į' ałnáájídááh.

¹⁶Filístiya dine'é éí abínídóó e'e'áahjį' hach'į' náhididáahgo dízdiin jį́ azlį́į́'.

¹⁷Áko Jésii éí haye' David ábizhdííniid, Nik'isóó bich'į' dah oonéłígóó díí tł'oh naadą́ą́' sit'éhígíí íífa bee yikááł bíighahgo áádóó bááh neeznáá bíighahgo ákǫ́ǫ́ díjáahgo dah oonéłídi nik'isóó baa díílwoł.

¹⁸Áádóó ałdó' géeso neeznáá hasht'eelyaaígíí éí siláo miil yilt'éego yinanit'a'í nilíinii bich'į' dííjih. Áádóó nínaaíké haa lá daat'éé lá baa nidíníítaał, índa ha'át'íí lá yaa naakai lá bee nihił hodíílnih.

¹⁹Áko nít'éé' Saul áádóó David bínaaíké índa Ízrel dine'é t'áá ałtso Íílah yíldzisdi Filístiya dine'é yił da' ahigą́.

²⁰Áko David t'ah abínídą́ą́' nízhdii'na'go dibé índa na'niłkaadii t'áá ákǫ́ǫgo bidookįįłii nízhdiinilgo dashdiiyá; Jésii áhodííniidígi át'éego dah da'ínéehgi jiníyáago ayóó át'éego anaa' baa ní'diildee'go hahóó'áá lá.

²¹Áko Ízrel dine'é índa Filístiya dine'é ałk'iidoojah biniyé ałch'į' ałkéé' ni'ahí'nil.

²²Áko David joojihígíí hééł yaa ádahalyáanii baazhnínilgo siláo nidaabaahii bitah góne' ajoolwodgo hánaaíké baazhníyáago k'é bizhdííniid.

²³Áádóó bił ahił dahojilne'; nít'éé' jó, Gath kin haal'áádóó Filístiya dine'é naabaahii nilíinii, Goláíyath wolyéii éí Filístiya dine'é bisiláo yitahdę́ę́' ch'ínáánádzáago saad t'áá yee hanádzihígíí yee hanáánáádzíi'go David adiizts'ą́ą́'.

²⁴Áko Ízrel dine'é t'áá ałtso éí Goláíyath dayiiłtsą́ągo yik'ee dadínéezhchą́ą'go t'áá íiyisí yéédaasdzííd.

²⁵Áko Ízrel dine'é ádadííniid, Da' díí diné ch'íníyáhígíísh daah'į́? T'áá aaníí Ízrel dine'é nayé'é'įįh yiniyé ch'íníyá. Áko diné t'áá háiida éí jiisxį́įgo aláahgo naat'áanii éí ayóó át'éego ajit'į́įgo áhodoolííł, áádóó bitsi' haidoołtééł, índa Ízrelgi hazhé'é bighandóó danilíinii doo bidahodiit'i' da doo.

²⁶Áko David éí diné hwíighahgóó naazínígíí ábizhdííniid, Díí Filístiya dine'é dziisxį́įgo Ízrel dine'é bee nabé'ét'įįhii nahjį' kójiilaaígíí ha'át'íí bee bik'ihojidlíi doo? Filístiya diné doo bąąh náhineeshgizhii jílíinii ha'át'íísh jílį́įgo Diyin God hináanii bisiláo nabé'ésh'įįhgo bohónéedzą́ jinízin?

²⁷Áádóó diné t'áá ákót'éego hadaasdzíi'go ádaaní, T'áá háiida díí diné jiisxíinii éí ákót'éego hach'ohodoo'niił.

²⁸Hánaaí alą́ąjį'ígíí Iiláíyab éí diné bich'į' yájíłti'go hodiizts'ą́ą́', áko Iiláíyab éí David bich'į' háhóóchįįdgo ábijiní, Ha'át'íí biniyé yíníyá? Háísh honoojíidi dibé t'áá díkwíígíí ná neiniłkaad? Ayóogo ádaa dzíínídlíigo áádóó t'áá ádíláahgo t'éí nitsíníkeesgo shił bééhózin, háálá anaa' baa na'aldeehígíí dínííł'įįł biniyé yíníyá.

²⁹Áko David ádííniid, Haash yisdzaa? Doósh t'óó ná'ídíshkid da?

³⁰Áádóó éí bits'ą́ąjigo dashdiiyáii', náánáła' bich'į' t'áá ákót'éego hanáádzoodzíí', áko t'áá átséedi hach'į' hadaasdzí'ígi át'éego hach'į' hanáádaasdzíí'.

³¹Áko índa David éí saad bee hadziisdzíi'ii deidiizts'ą́ą'go t'áá éí yee Saul yił dahoolne'go t'áá áko háká i'ííł'a'.

³²Áko David éí Saul áyidííniid, T'áadoo honiinaa diné nídaaldzidí le'; ná naal'a'í ákǫ́ǫ́ hidoodáałgo éí Filístiya dine'é yił ahidoogą́ą́ł.

³³Áko Saul éí David áyidííniid, Filístiya dine'é bich'į' hidíídáałgo bił ahidíígą́łígíí doo bíninil'ą́ą da, háálá t'ahdii ashkii nílį́; bí éí t'áá ániid naagháádą́ą́' ana'ał'íinii nilį́.

³⁴Nidi David éí Saul áyidííniid, Ná naal'a'í bizhé'é bidibé yaa áhályą́ągo náshdóítsoh bitsiijį' ditł'oii áádóó shash ałdó' dibé yázhí yił dah diilwodgo

³⁵bich'į' nídiishwodgo bił dzidíłhaalgo bizéé' hááhííłhan áádóó shich'į' nídiidzáago éí bidághaa' sésxił áádóó náníshxałgo séłhį́.

³⁶Ná naal'a'í éí náshdóítsoh bitsiijį' ditł'oii yiyiisxį́ áádóó shash ałdó' yiyiisxį́, áko díí Filístiya dine'é doo bąąh náhineeshgizhii ałdó' ákwíidoolííł, háálá Diyin God hináanii bisiláo yódziih.

³⁷Áádóó David ánáádoo'niid, Bóhólníihii éí náshdóítsoh bitsiijį' ditł'oii índa shash ałdó' bits'ą́ąjį' yisdáshííłtį́; t'áá ákót'éego ałdó' díí Filístiya dine'é bits'ą́ąjį' yisdáshidoołtééł. Áádóó Saul éí David áyidííniid, Nílááhánee', Bóhólníihii nił hólǫ́ǫgo bich'į' hidídááh.

³⁸Ákohgo Saul éí habee na'abaahí David bee hazhdiilaa áádóó béésh łitsoii ch'ah bik'izhdíí'ą́ índa béésh éé' bee na'abaahii biih jííłtį́.

³⁹Áko David hadiltłish bił béésh éé' bee áká dzíszasgo ch'ééh dashdiighááh, háálá doo chójooł'į́į da nít'éé'. Áádóó David éí Saul ábizhdííniid, Díí doo bee ákǫ́ǫ́ deesháał da, háálá doo bídínéeshnáa da. Áko David éí t'óó háidii'nil.

⁴⁰Áádóó bigish t'éí néidiitą́ągo tó nílínídę́ę́' tsé dadilkǫǫhígíí ashdla'go néidiinilgo na'niłkaadii bidah na'ayizii biih jíínil, índa bee aditł'į́į́h ałdó' hálák'ee siláago Filístiya dine'é bit'áahjį' joogááł.

⁴¹Áádóó Filístiya diné ch'íníyá áádóó David yit'áahjį' niheelwod; diné naagé bá nei'áhígíí bilą́ąjį' yigááł.

⁴²Áko Filístiya diné naaghalgo David yiyiiłtsą́ągo t'óó yánahałt'i'go yeidloh, háálá t'ahdii ashkii t'óó łichíi'go bííyisii jílį́.

⁴³Áko Filístiya diné éí David áyidííniid, Łééchąą'í haniih nishłį́; gish t'éiyá bił shich'į' yílwoł? Áko Filístiya diné bidiyin dabidi'níinii yinahjį' hóyée'go David yá haadzíí'.

⁴⁴Filístiya diné éí David áyidííniid, Aadę́ę́' shaa hinídááh, áko tsídii wódahgo nidaat'a'ígíí áádóó naaldlooshii da'ałchinii bich'į' nits'íís ahideeshxą́ą́ł.

⁴⁵Áádóó David éí Filístiya diné áyidííniid, Ni éí diltłish áádóó tsiidétáán índa naagé bił shich'į' híídááł, nidi t'áá ałtsoní bee Bóhólníihii éí Ízrel dine'é bisiláo biDiyin God nabí'í'įįhii bízhi' bee nich'į' heeshdááł.

⁴⁶Díí jį́ Bóhólníihii shílák'ee nididoo'áałgo naa anízhdeeshtł'į́į́ł áádóó nitsiits'iin nidi'deesh'ááł, áko díí jį́ tsídii áádóó nahasdzáán bikáa'gi naaldlooshii da'ałchinii bich'į' Filístiya dine'é bisiláo dabits'íís nidaaztseedii ahideeshtł'ił, áko éí bee nahasdzáán nidahonees'ą́ą́góó kéédahat'íinii díí bił béédahodoozįįł: Ízrel dine'é bitahgi Diyin God hólǫ́.

⁴⁷Áádóó díí áłah nilínígíí díí bił béédahodoozįįł: Bóhólníihii éí diltłish índa tsiidétáán doo yee yisdá'iiníił da. Jó, Bóhólníihii t'áá bí ana'ał'į́, áko bí nihílák'ee nihididoo'ááł.

⁴⁸Áádóó Filístiya diné éí David yich'į' nihiníyáago David éí Filístiya diné bił ahizhdoogą́ąłjį' tsį́įłgo nihijílwod.

⁴⁹Áko David bidah na'ayizii yiih doolnii'go tsé hayíí'ą́ągo yee adzíítł'in, nít'éé' Filístiya diné bítáá' góne' yił dzideeztł'ingo bítáá' góne' tsé baa aalwodgo ni'jį' íítłizh.

⁵⁰Kót'éego David habee aditł'į́į́h áádóó tsé bee Filístiya diné naa abíijíítł'ingo bik'eh dzideesdlį́į'go dziisxį́; David éí diltłish doo ła' neitin da nít'éé'.

⁵¹Áko David nídiilwodgo Filístiya diné yik'i dah yiizį'go Filístiya diné bidiltłish hayíítą́ągo yee yiyiisxį́ áádóó bik'os k'íiníłhaalgo bitsiits'iin na'iidii'ą́. Áko índa Filístiya siláo éí bá ak'eh didlíinii bi'diisyį́įgo dayii łtsą́, áko yóó'aheezhjéé'.

⁵²Áádóó Ízrel siláo índa Júdah siláo dadilwoshgo Filístiya siláo yich'į' nídiijéé'; hahodiildzisgóó Ékran kin haal'á biná'ástł'inígíí bich'é'étiinjį' adeineeskaad. Shéíyaréíyim kin shijaa'dóó Gath kin haal'áajį' índa Ékran kin haal'áajį' Filístiya siláo atídayiilaago diníbéézh.

⁵³Áko Ízrel siláo éí Filístiya siláo dayinééłkaad yę́ędę́ę́' ninádahaaskaigo Filístiya siláo dah yinéłígi binaalye'é yits'ą́ą́' nídeidiinil.

⁵⁴Áko David éí Filístiya diné bitsiits'iin néidii'ą́ągo Jerúsalem kin haal'áágóó néiní'ą́, nidi béésh éé' yee naabaah yę́ę haníbaal bii' nizhnínil.

⁵⁵David éí Filístiya diné bich'į' nízhdiibaa' yę́ędą́ą́' Saul hoołtsą́ągo Ábner siláo binanit'a'í áyidííniid, Ábner, díí dinééhshą' háí biye'? Áádóó Ábner ání, Aláahgo naat'áanii nílíinii, ts'ídá t'áá aaníí hiníná; ákót'éego ts'ídá t'áá aaníí doo bééhasin da.

⁵⁶Áko aláahgo naat'áanii ánáádoo'niid, Díí dinééh lá háí biye'go át'į́į́ lá bína'ídíłkid.

⁵⁷Áko David éí Filístiya diné dziisxį́į́dę́ę́' nídzídzáago Ábner éí Saul yidááhdóó hoł niní'áazhgo Filístiya diné yę́ę bitsiits'iin dah joo'ááł.

⁵⁸Áko Saul áhodííniid, Dinééh nílíinii, háishą' biye' nílį́? Áko David áhodííniid, Béthlehem dine'é Jésii ná naal'a'í nilíinii biye' nishłį́.