Read Navajo I SAMUEL 18 Bible Online

I SAMUEL 18 - Navajo bible

I SAMUEL 18

¹Saul bich'į' ałtso niyázhníłti'go Jánathan bii' sizíinii éí David bii' sizíinii yił łá'í silį́į́', áádóó Jánathan t'áá bí bii' sizíinii ayóó'áyó'nínígi át'éego ayóó'áhó'ní.

²Áko íídą́ą́' Saul náhodiiłtį́, áádóó doo t'áá k'ad hazhé'é bighangóó hwéé'níłnii' da.

³Jánathan éí David yił aha'deet'ą́, háálá t'áá bí bii' sizíinii ayóó'áyó'nínígi át'éego ayóó'áhó'ní.

⁴Áádóó Jánathan bi'éé' akáa'giígíí haidiiltsoozgo David yeiníłtsooz; bi'éé' áádóó bidiltłish, be'ałtį́į́' índa yee áká nálzisígíí ałdó' hainínil.

⁵Áko David t'áá hizhdighááhgóó Saul ákǫ́ǫ́ nahał'a'go ádaa áhojilyą́, áko Saul éí diné anada'ał'íinii yá hoosį'. Áko Ízrel dine'é t'áá ałtso índa Saul bá naal'a'í dabinááł baa nijigháhígíí bił yá'ádaat'ééh.

⁶Ákódaadzaadóó bik'ijį' nináhaazhjéé', David ałdó' Filístiya diné jiisxį́į́dę́ę́' nídzídzáago Ízrel dine'é bikin dah naazhjaa'dę́ę́' sáanii dahataał áádóó da'alzhish índa ásaa' yigádígíí bił dahózhǫ́ǫgo tsin deiłtązhgo aláahgo naat'áanii Saul yidááh yíkai.

⁷Áko sáanii ahá dahataałgo bił dahózhǫ́ǫgo ádaaní, Saul éí damíilgo neistseed, índa David éí neeznáá damííl biláahgo neistseed.

⁸Áko Saul t'áá íiyisí báhóóchįįd áádóó áhodoo'niidígíí yik'ee doo bił hóózhǫǫdgóó ádííniid, David éí neeznáadi daamííl íísdįįdgo yá hadaasdzíí', nidi shí éí daamíilgo áséłdįįdgo shá hadaasdzíí'. Ha'át'íísh hábínéidoolyééł? Jó, aláahgo bee óhólníihii t'éí yidziih.

⁹Éí bijį́į́dóó Saul éí David hajisíidgo hodeeshzhiizh.

¹⁰Ákódaadzaadóó biiskání Diyin God éí níłch'i doo yá'áshóonii Saul yik'ijį' yi'níłnii'; Saul hakin góne' hak'i nááhoodle'go t'áá ádzaagóó yájíłti'go áhoolaa, áádóó David t'áá há niná'neeh yę́ęgi át'éego há nináánás'ne'. Saul éí bitsiidétáán anáhálghą́hígíí dah yootį́į́ł,

¹¹áko Saul éí tsiidétáán yee iijíísxi', háálá ájíní, Kin bik'ijį' David bighá deesxih, áko David hats'ąą naalyizgo naakidi jisiih.

¹²Áko Saul éí David yénáldzid, háálá Bóhólníihii éí David yił hólǫ́, áádóó hó éí hats'ą́ą́' dah hodiile'.

¹³Éí bąą Saul ádíts'áhoníł'a'go siláo miilgo bee hóhólníihgo áhoolaa, áko diné binááł ch'ééjídááh áádóó ninájiidááh.

¹⁴David ádaa hojíyą́ągo t'áá ałtsojį' hojíyą́ągo ájoonííł, háálá Bóhólníihii hoł hólǫ́.

¹⁵David t'áá íiyisí ádaa hojíyą́ągo ájooníłígíí Saul yoo'į́įgo hak'ee bił yéé'.

¹⁶Nidi Ízrel dine'é áádóó Júdah dine'é t'áá ałtso David ayóó'ádayó'ní; jó, dabinááł ch'ééjídááh áádóó ninájiidááh.

¹⁷Ákohgo Saul éí David áyidííniid, Jó, doo shá nináhinílyéésgóó Bóhólníihii bá anaa' áníł'į́įgo t'éiyá shitsi' alą́ąjį'ígíí Míírab ne'asdzą́ą́ dooleeł biniyé naa deeshtééł, háálá Saul kwíizniizį́į́', Shí éí doo atíhodeeshłíił da, nidi háni'dii Filístiya dine'é éí atídahodoolííł.

¹⁸Áko David éí Saul áyidííniid, Shíshą', éí ha'át'íí nishłį́? Haash yit'éego hinishná? Áádóó Ízrel dine'é bitahgi shizhé'é bighandóó danilíinii ha'át'íísh danilį́įgo aláahgo naat'áanii baadaaní yishłeeh doo?

¹⁹Nidi ákwii hoolzhish yę́ędą́ą́' Saul bitsi' Míírab éí David baa yílteeh nít'éé' yę́ę; jó, Éídriyal wolyéii Miihólath dine'é nilį́įgo baa yíltį́.

²⁰Áko Máíkal éí Saul bitsi' nilį́įgo David ayóó'áyó'ní, áko Saul yił dahoolne'go yaa bił hóózhǫǫd.

²¹Áko Saul ádííniid, David éí tsístł'azhdoogááł biniyé Máíkal haa deeshtééł, áko Filístiya dine'é hach'į' nidahwiiłnáa doo. Éí bąą naakidi aleeh góne' Saul éí David ánááyidoo'niid, K'ad lą́ índa shaadaaní dííleeł ni.

²²Áko Saul éí bá nidaal'a'ígíí yich' į' haadzíi'go ání, T'áá nant'inee hazhó'ó David bił ahił dahodoołnihgo ádabididoohniił, Aláahgo naat'áanii naa bił nihoozhǫǫh, áádóó bá nidaal'a'í t'áá ałtso ayóó'ádanó'ní, éí bąą k'ad aláahgo naat'áanii baadaaní dííleeł.

²³Áádóó Saul bá nidaal'a'í éí David yich'į' yee hadaasdzíí'. Áádóó David ádííniid, Aláahgo naat'áanii baadaaní yishłeehgo t'įįhdígo haniih át'éii át'éego shaa nitsóhkees? Jó, diné hojooba' át'éii áádóó doo aláahgo ch'íbi'dit'áahii yee' nishłį́.

²⁴Saul há nidaal'a'í éí David yee hahaasdzí' ígíí yee hoł nídahoolne'.

²⁵Áko Saul áhodííniid, Kót'éego David bich'į' hadahidoohdzih, Aláahgo naat'áanii éí doogehii doo yinízin da, nidi t'áá hazhó'ó Filístiya dine'é bicho' bílátahgi bicho'azis ahénálgizhígíí neeznádiingo ní'doojih nízin, áko aláahgo naat'áanii jílíinii éí bee hwe'ana'í k'éézhdidoodlííł. Nidi Saul íinízin, David éí Filístiya dine'é ts'ídá t'áá dahodiyoołhéłí.

²⁶Áko Saul bá nidaal'a'í díí saad bee David yił dahoolne'go aláahgo naat'áanii baadaaní jidooleełígíí t'áá íiyisí baa hoł hóózhǫǫd. Ákohgo t'ah doo baa yíłkaah da.

²⁷Éí bąą David nízhdii'na'go diné bił nijikaígíí bił dashdiikaigo Filístiya dine'é naakidi neeznádiingo nidadzistsxeed, áko acho' bílátahgi acho'azis ahénálgizhii t'áá át'é biniit'aa aláahgo naat'áanii baadaaní jidooleeł biniyé baa dajizhjaa'. Áko Máíkal éí Saul bitsi'go hwe'asdzą́ą́ dooleeł biniyé hainíłtį́.

²⁸Áko Saul díí yaa ákonízin áádóó bił bééhózin: Bóhólníihii éí David yił hólǫ́, áádóó Saul bitsi' Máíkal éí David ayóó'áyó'ní.

²⁹Saul t'ah nááyówehígo David binínáádzísdzííd. Ákohgo Saul éí David bi'ana'í jílį́įgo hodideeshzhiizh.

³⁰Ákohgo Filístiya dine'é binanit'a'í anaa' nídahałeehgo David t'áá íiyisí hózhǫ́ ádaa hojíyą́ągo Saul bá nidaal'a'í biláahgo anaa' áńjiil'įįh; éí bąą házhi' aláahgo át'éii silį́į́'.