Read Navajo I SAMUEL 19 Bible Online

I SAMUEL 19 - Navajo bible

I SAMUEL 19

¹Saul haye' Jánathan índa há nidaal'a'ígíí t'áá ałtso éí David dadiyoołhééł, bizhdííniid.

²Nidi Saul biye' Jánathan éí t'áá íiyisí David yaa bił nihoozhǫǫh. Áko Jánathan éí David bił hojoolne'go ájíní, Shizhé'é Saul nidiyoołhééł biniyé naa hideesdzá, éí bąą abíníjį' t'áá ni ádaa áhólyą́ągo nahont'ingi ná'ádíl'įįh,

³áko sínídáhígóó deesháałgo shizhé'é bíighahgi naasháa dooleeł; naa yáshti'go shizhé'é bił ahił hashne'go shił bééhoozinígíí bee nił náhodeeshnih.

⁴Áádóó Jánathan hazhé'é bich'į' nizhónígo David baa yájíłti'go ábizhdííniid, Aláahgo naat'áanii nílíinii, ná naal'a'í David bił ádił óólziih lágo, háálá bí doo nich'į' ádił ni'iilzíih da, índa bí éí binaanish t'áá íiyisí nizhónígo ná áyoolííł.

⁵Háálá niná'ádeet' ą́ągo Filístiya diné yiyiisxį́, háálá Bóhólníihii éí bee yisdá'iildéehii ayóó át'éii Ízrel dine'é yá áyoolííł. Éí yiniłtsą́ągo t'áá íiyisí baa nił hóózhǫǫd, áko ha'át'éegoshą' David t'áadoo baanígóó bini'niłhį́įgo doo ádąąh dahast'áanii bidił bits'ánílį́įgo áníléehgo bee ádił iilziih?

⁶Áko Jánathan bizaad dzidiizts'ą́ą'go Saul ádee hazdoodzíi'go ázhdííniid, Ts'ídá t'áá aaníí Bóhólníihii hiná; ákót'éego ts'ídá t'áá aaníí David doo bidi'yoolyéeł da.

⁷Áko Jánathan éí David hágo bizhdííniid, áádóó Jánathan éí t'áá ałtsoní hoł ííshjání áyiilaa. Áko Jánathan éí David yił dah dii'áazhgo Saul bich'į' hoł jiní'áázh, áko t'áá binááł nijighá yę́ęgi át'éego nináájídáá nít'éé'.

⁸Áádóó anaa' nááhásdlį́į'go David dah diiyáago Filístiya dine'é yił da'ahoogą́ą'go t'óó ahayóí neistseed, áádóó ła' éí hak'ee yóó'aheezhjéé'.

⁹Níłch'i doo yá'áshóonii Bóhólníihii bits'ą́ą́dóó Saul yik'i nááhoodle'; Saul hatsiidétáán anáhálghą́hígíí dah jootį́įłgo hakin góne' dzizdá, áádóó David bitsin tł'óół bąąh daneelzhee'go bee nida'a'néii yee há naazne'.

¹⁰Áádóó Saul hatsiidétáán anáhálghą́hígíí bee kin bik'ijį' David bighá deesxih jiniizį́į́', nidi David hats'ąą deesyizgo tsiidétáán t'óó kin baa ííjil, áádóó t'áá éí bitł'éé' David yóó'ajoolwod.

¹¹Áádóó Saul bá naal'a'í ła' David bikingóó ayiis'a'go haa neheekai, abínígo dah hodiyoołhééł biniyé. Nidi David hwe'asdzą́ą́ Máíkal hoł hoolne'go ání, Díí tł'éé' yisdá'ádidííltééł biniyé doo yóó'íínílwodgóó yiską́ągo abínídą́ą́' t'óó dandiyoołhééł.

¹²Áko Máíkal éí tsésǫ' góyaa David hadajíílo'go yóó' eelwod.

¹³Áko Máíkal éí e'elyaii néidiiłtį́įgo tsásk'eh yikáá' niiníłtį́, áádóó tł'ízí bighaa' tsii'ááł bits'iiyah nizníłtsoozgo bik'ídzísti'.

¹⁴Áko Saul bá nidaal'a'í éí David háká dabi'deel'a' nít'éé' asdzání ádííniid, Dajitsaah.

¹⁵Áádóó Saul bá nidaal' a'í éí David yich'į' anááyiis'a'go ání, Tsásk'eh t'áá bii' dziztį́įgo shá náhonołteeh, áko hodiyeeshxééł.

¹⁶Áko nidaal'a'í yah aakai, nít'éé' jó, e'elyaii léi' tsásk'eh yii' sitį́įgo tł'ízí bighaa' bitsii'áál lá.

¹⁷Áádóó Saul éí Máíkal áyidííniid, Ha'át'íísh biniyé shini'sínílo'go shi'ana'í shiyaa haalwod? Áko Máíkal éí Saul ánéidoo'niid, Áshidííniidgo ání, Shíni'dii yishááł, ha'át'íísh biniyé nidiyeeshxééł?

¹⁸Áko David yóó'eelwodgo yisdááyá áádóó Réímah nahós'a'gi Sámuel baazhníyáago Saul hach'į' áát'įįdígíí t'áá át'é bee bił hojoolne'. Áádóó Sámuel bił dashdii'áazhgo Néíyath haz'ánígi kééhojit'į́į́ nít'éé'.

¹⁹Áko Saul yił dahoolne'go ádaaní, Néíyathdi Réímah nahós'a'gi David naaghá.

²⁰Áádóó David shódeidoołt'eeł biniyé Saul bá nidaal'a'í ákǫ́ǫ́ anááyiis'a', áko Sámuel á sizį́įgo Diyin God yá dahalne'ii dahalne'go dayiiłtsą́, nít'éé' Saul bá nidaal'a'í ałdó' Diyin God biNíłch'i Diyinii bik'i dahoole'go Diyin God yá dahoolne'.

²¹Saul éí bee bił hóóne'go bá nidaal'a'í ła' ákǫ́ǫ́ anááyiis'a', nít'éé' éí ałdó' t'áá ákót'éego Diyin God yá náádahoolne'. Táadi aleeh góne' Saul éí nidaal'a'í ła' ákǫ́ǫ́ anáádziis'a', nít'éé' éí ałdó' Diyin God yá náádahoolne'.

²²Áko índa Réímah nahós'a'góó dashdiiyáago Sííko kin shijaa'gi tó hahadleeh ayóó át'éé léi'gi jiníyá, áko na'ízhdééłkidgo ájíní, Sámuel áádóó David éí háadi naa'aash? Áádóó ła' áhodííniid, Jó, éí Néíyath haz'ánídi Réímah nahós'a'gi naa'aash.

²³Áádóó Néíyathjį' Réímah nahós'a'góó dashdiiyá, áko hó ałdó' Diyin God biNíłch'i Diyinii hak'i hoole'go Réímah nahós'a'gi Néíyathdi jiníyáajį' Diyin God bá hojilne'.

²⁴Áádóó ałdó' ha'éé' hazhdii'nilgo t'áá ákót'éego Sámuel binááł Diyin God bá hojoolne' índa shá bíighah áádóó tł'éé' bíighah ha'éé' t'áágééd dziztį́. Éí bąą diné kódaaní, Saul wolyéiísh ałdó' Diyin God yá halne'ii yidiiyá?