Read Navajo I SAMUEL 24 Bible Online

I SAMUEL 24 - Navajo bible

I SAMUEL 24

¹Ákódzaadóó bik'ijį' Saul éí Filístiya dine'é yikéé' yijah yę́ę t'ą́ą́' nákaigo, Shoo, David éí Engíídai nahós'a' honoojíidi diné bił nijikai, hodoo'niid.

²Ákohgo Saul éí Ízrel dine'é bitahdóó na'abaah yee danilíinii táadi mííl néidiinilgo Tł'ízí Ałchinii Bitsétah hoolyéégóó David índa diné bił naakaii há adeineeztą́ą́'.

³Áko atiingi dibé dabighan léi'góó jookah, ákwe'é tsé'áán góne' Saul nii'ozhdoogááł biniyé yah ajííyá. David ałdó' ná'áne'ídi diné hoł naakaígíí hoł naháaztą́.

⁴Áko David éí diné bił nijikaígíí ádahodííniid, T'áá aaníí Bóhólníihii nich'į' yee haadzíi'ii beiníłką́; jó, ni'ana'í nílák'ee yidíí'ą́. Áko nizhónígi át'éego nich'į' áhodooníłígi át'éego bich'į' ádíínííł. Áádóó hazhóó'ógo David nízhdii'na'go Saul bi'éénééz łahjį' bits'ą́ą́' bizhdííłgizh.

⁵Áádóó kódziidzaadóó bik'ijį' bik'ee David hwii' hadahodéébįįd, háálá Saul bi'éé' k'ízhnígizh.

⁶Áádóó diné bił nijikaígíí ábizhdííniid, Bóhólníihii éí shinanit'a'í kódeeshłíiłgo doo yee shá has'ą́ą da; Bóhólníihii ak'ah yik'i yayiiziidgo yiyíísį́į'ii doo ákwii ííł'įįd da; jó, Bóhólníihii ak'ah yik'i yayiiziidgo yiyíísį́į'ii nilį́.

⁷Áko David éí diné bił nijikaígíí díí saad bee bich'į' hadzoodzíi'go t'áadoo Saul yik'iijée' da. Nidi tsé'áándę́ę́' Saul ch'íníyáago dah nídiidzá.

⁸Ákódzaadóó bik'ijį' David nídii'na'go tsé'áándę́ę́' haayáago Saul yikéé' hadoolghaazhgo ání, Bóhoníshníihii, aláahgo shinanit'a'í nílíinii. Áko nít'éé' Saul t'ą́ą́' nídéét'į́į'go hoołtsą́, t'áá áko David yaa ádziidzaago ni'jį' tsé'yaa jineeshjool.

⁹Áko David éí Saul áyidííniid, Shoo, ha'át'éegoshą' saad yee hadahadziihgo yísíníłts'ą́ą́', David atínídoolííł, daniłní?

¹⁰Jó, t'áá nináá' bee níníł'į́, díí jį́ tsé'áandi Bóhólníihii shílák'ee nííłtį́į́ nít'éé'. Ła', Nidi'yoolyééł, daniłníí nít'éé' nidi t'áadoo ákóniishłaa da. Nidi ádíshní, Shí éí doo haa dahodeeshłíił da. Shinanit'a'í doo atídeeshłíił da, háálá Bóhólníihii bíísį́į'go ats'ábiníłtíinii nilį́.

¹¹Shoo, shizhé'é, ni'éé' bidííłgizhígíí dah yistsosgo níníł'į́, háálá ni'éé' bidííłgizhígíí áádóó t'áadoo niyéłhį́į daígíí díí bee nił bééhózin: nił bééhózin índa yíní'į́įgo doo yá'áshónígi t'áadoo ániishłaa da, doodaii' bee haz'áanii t'áadoo nił k'íníti' da índa t'áadoo nich'į' ádił asésiih da. Shidiyííłhééł biniyé shíkanítáá nít'éé' nidi t'áadoo ná hashja'iishłaa da.

¹²Bóhólníihii nihaa nídóot'įįł, atíniishłaago éí Bóhólníihii atínáshidoodlííł, nidi shí éí doo atínídeeshłíił da.

¹³Ałk'idą́ą́' hastóí dahóyáanii ádaaní, Doo yá'áshóonii bits'ą́ą́dę́ę́' doo yá'áshónígi áhát'į́ nihwiileeh, nidi shí doo atínideeshłíił da.

¹⁴Ízrel dine'é aláahgo binanit'a'í háí lá yiniyé naaghá? Háishą' naníłchéego ánít'į́? Łééchąą'í daaztsáanii daats'í, naaldlooshii biya' daats'í?

¹⁵Éí bąą Bóhólníihii ánihwii'aahii nilį́į doo; éí nihaa nídóot'įįł, áádóó ááshníiłii shá yoo'į́įgo shá na'ak'íyáłti'go nits'ą́ąjį'go yisdáshidoołtééł.

¹⁶Áádóó bik'ijį' David éí Saul bich'į' díí saad ałtso bee yájííłti'go Saul áháłní, David, shiye' nílíinii, niísh ádíní? Áko Saul chánahgo haadzíi'go yícha.

¹⁷Áko David áyidííniid, Shiláahgo ts'ídá t'áá ákogi át'éii nílį́į́ lá, háálá yá'át'éhígi áshiinilaa, nidi shí éí doo yá'áshónígi ániishłaa.

¹⁸Jó, bééhózínígo haash yit'éego díí jį́ yá'át'éhígi áshiinilaa, háálá éí Bóhólníihii nílák'ee shííłtį́įgo t'áadoo shisíníłhį́į da.

¹⁹Jó, diné ła'da bi'ana'í yik'íníyáago, da' bíni'diísh yá'át'éehgo yi'doołnih? Éí bąą Bóhólníihii yá'át'éehgo nich'į' ni'doolééł, háálá díí jį́ yá'át'éhígi áshiinilaa.

²⁰Áko k'ad shoo, díí ts'ídá baa ákoniizį́į́': t'áá aaníí aláahgo naat'áanii dííleeł lá, áádóó Ízrel dine'é aláahgo bee bóhólníihgo bił haz'áanii chánah ályaago nílák'ee doot'ą́ą doo lá.

²¹Éí bąą Bóhólníihii binahjį' shich'į' ádee hadídziihgo sha'áłchíní shikéé' náá'ahideeshchínígíí doo adííłdįįł da áádóó shizhé'é ba'áłchíní náás da'ahílchííhgóó shízhi' doo bąąh díí'įįł da.

²²Áko David éí Saul bich'į' ádee hazdoodzíi'go Saul hooghangóó dah nídiidzá, nidi David áádóó diné bił nijikaígíí éí bidziilgo nahont'in nahaz'ą́ą́góó bił dah nízhdiikai.