Read Navajo I SAMUEL 25 Bible Online

I SAMUEL 25 - Navajo bible

I SAMUEL 25

¹Áko Sámuel daaztsą́ągo Ízrel dine'é t'áá a łtso áłah silį́į'go haa dáácha, áádóó Réímah kin shijaa'gi t'áá hó haghandi yóó'ádahoolaa. Ákohgo David nídii'na'go Péíran honoojíígóó ííyá.

²Áko áadi Méíyan kin shijaa'gi diné léi' bighango éí Kármel kin shijaa'gi iiná yee ííł'ínígíí bee hólǫ́ǫgo t'áá íiyisí at'íinii nilį́. Dibé éí táadi mííl áádóó tł'ízí éí miilgo bilį́į́'. Áko Kármelgi bidibé táidigéésh.

³Éí Néíbal joolyé, áádóó hwe'asdzą́ą́ éí Ábigeil wolyé. Asdzání nizhónígo ak'idi'yiitįįhii nilį́įgo t'áá íiyisí baa dzólní, nidi diné éí t'áá íiyisí bidooya' go ts'ídá doo yá'áshóonii t'éí yeigááł. Éí Kéíleb dine'é bitahdóó diné nilį́.

⁴David honoojíidi naagháago éí Néíbal bidibé táidigéeshgo yiyíínii'.

⁵Ákohgo David éí dinééh neeznált'éego ákǫ́ǫ́ dazdees'a'ígíí ábijiní, Nílááh, Kármel kin shijaa'góó dohkááh, índa Néíbal baa doohkahgo shízhi' binahjį' yá'át'ééh shá dabijiniih.

⁶Áko shá k'é dabidooniidgo ádabididoohniił, Nich'į' hózhǫ́ǫ doo, índa na'áłchíní ałdó' bich'į' hózhǫ́ǫ doo, áádóó nee hólóonii t'áá ałtso bich'į' hózhǫ́ǫ dooleeł.

⁷Táda'digéeshii ná táda'digéésh ha'níigo naa hodisíts'ą́ą́'. Áko k'ad dząądi ná na'niłkaadí danilíinii nihił naakai nít'éé', áko doo haada deil'įįd da, áádóó t'áadoo yídahasáhí da; Kármel kin shijaa'gi nida'niłkaad yę́ędą́ą́' ákót'éé nít'éé'.

⁸Nidinééh danilíinii bí nabídídííłkiłgo hazhó'ó yee nił dahodoolnih. Éí bąą shí shidinééh ajooba' bee bich'oninéego baa nitsíníkees le', háálá áda'azįįd bijį́ niikai. Baa nánihooshkąąh, t'áá ha'át'íhída naa nídéelii éí ná nidaal'a'í áádóó David niye' baa didíí'ááł.

⁹David bidinééh áadi yíkaigo díí saad t'áá ałtso David bízhi' binahjį' Néíbal yił dahoolne'go áhodidoo'niiłgi yiba' ádaat'é.

¹⁰Áko Néíbal éí David bá nidaal'a'í áyidííniid, Davidshą' éí háí át'į́? Háishą' Jésii biye' nilį́? Naal'a'í t'óó ahayóí díí jį́į́góó binanit'a'í yits'ą́ą́' yóó'ahijeeh.

¹¹Shá táda'digéeshii bááh áádóó tó índa atsį' bee baa jooshba'ígíí náánáła' doo bééhasingóó nidaakaísh ba'iistsóod doo?

¹²Ákohgo David bidinééh t'ą́ą́' dah nídiikai, áádóó nákaigo díí t'áá ałtso bee hoł hóóne'.

¹³Áko David hadiné bił nijikaígíí ábizhdííniid, Diné t'ááłá'í nootínígo nihidiltłish bił áká daałzas. Áko diné t'ááłá'í nítínígo bidiltłish yił áká daaszas. David ałdó' hadiltłish bił áká dzíszas. Áko diné dį́įdi neeznádiin ánéelą́ą́' David yikéé' dah diikai; naakidi neeznádiin yilt'éego éí t'áá ákwe'é hééł yaa ádahalyą́.

¹⁴Nidi dinééh ła' Néíbal be'asdzą́ą́ Ábigeil yił hoolne'go ání, Shoo, David bá nidaal'a'í éí nihinanit'a'í k'é deididooniił biniyé honoojíídę́ę́' niyiis'a'; nít'éé' doo aaníígóó yich'į' hahaasdzíí'.

¹⁵Diné danilíinii t'áá íiyisí nihaa dajooba'go t'áadoo haada danihiilaa da, índa t'áadoo ha'át'íhída bídahosiilza' da; éí nahós'a'gi bił neiikai yę́ędą́ą́' ákódaniit'éé nít'éé'.

¹⁶T'áá ákwíí tł'éé' áádóó t'áá ákwíí jį́ nihinídaas'áá nít'éé'; dibé baa ádahwiilyą́ągo bił ákódaniit'éé nít'éé'.

¹⁷Éí bąą éí nił bééhózingo índa nabik'ítsíníłkeesgo bik'ehgo ádíínííł, háálá nihinanit'a'í doo yá'áshóonii beiníst'įįd áádóó ba'áłchíní t'áá ałtso yeinít'į́. Áko diné doo yá'áshóonii biniinaa doo ła' bich'į' haodziih át'ée da.

¹⁸Ákohgo Ábigeil éí tsxį́įłgo bááh naakidi neeznádiingo áádóó tó abid wáin bee naaljidígíí naaki áádóó dibé ashdla' naaztseed bíighahgo áádóó tł'oh naadą́ą́' sit'éhígíí ts'aa' ashdla' bee yikáałgo áádóó ch'il na'atł'o'ii bąąh bineest'ą' dah naazyíinii nááltseii t'ááłáhídi neeznádiin bíighahgo índa tsin sikaadii fig wolyéii bineest'ą' ahídiiłjée'ii naakidi neeznádiin bíighahgo éí dahatélii bikáá' dah dadziizyį́.

¹⁹Áko há nidaal'a'í ábizhdííniid, Nílááh, shilą́ąjį' wohkah; jó, shí éí nihikéé' yisháał doo, hałní. Nidi hahastiin Néíbal t'áadoo bił hojoolne' da.

²⁰Áko asdzání éí télii bił yildloshgo dziłtsį́į́góó nahont'in góyaa hadajííyá. Áko, shoo, David áádóó diné yił naakaígíí hach'į' yikahgo bidááshníyá.

²¹Íídą́ą́' David ázhdííniid, T'áá aaníí t'áadoo biniyéhígóó honoojíidi díí diné t'áá ałtsoní bá baa áháshyą́ą́ nít'éé', áko t'áadoo bóhoohya'í da. Áádóó díí diné bich'į' yá'át'éhígi íisdzaa nidi doo yá'áshónígi ánáshiidlaa.

²²Diyin God éí lą́ą David bi'ana'í yich'į' ákódooniił, áádóó t'ah yówehígi át'éego ákwíidoolííł; éí abínígo Néíbal bighandóó diné danilínígíí t'áadoo ałtso nisíłtseedgóogo ákwíidoolííł.

²³Áko Ábigeil éí David dziiłtsą́ągo tsxį́įłgo télii bikáá'dę́ę́' hadajííyáago David bidáahjį' ni'jį' yaa ádziidzaago nitsizhdinígo'.

²⁴Áádóó bikétsį́įjį' nitsizhdinígo'go ájíní, Shí lą́ą bóhonishníihii, shí t'éiyá doo ákwii át'éii shik'ijį' si'ą́ą doo. Asdzání ná naal'a'í nishłíinii nich'į' hadeesdzihígíí baa nánooshkąąh, áko asdzání ná naal'a'í nishłíinii shizaad diits'į́į́h.

²⁵Shinanit'a'í nílíinii, díí Néíbal joolyéii éí diné doo yá'ájíshóonii jílíinii t'áadoo ha'át'éegoda haa nitsíníkeesí, baa nánooshkąąh, háálá t'áá ákójoolyéego nijighá. Néíbal joolyéego házhi', áko doo áhályáanii jílį́. Nidi shí asdzání ná naal'a'í nishłį́įgo shinanit'a'í bidinééh baa dasíníł'a' yę́ę t'áadoo yiiłtsą́ą da.

²⁶Éí bąą k'ad, bóhonishníihii, Bóhólníihii ts'ídá t'áá aaníí hiná áádóó nii' sizíinii ts'ídá t'áá aaníí hiná; t'áá ákót'éego Bóhólníihii éí hodiyííłhéełgo hadił hats'ádoonahígíí áádóó t'áá ni níla' bee k'ééhodidíídlíłígíí yits'ąą naajé'ólnáago, háni'dii k'ad ni'ana'í áádóó doo yá'áshóonii bee nich'į' ádazhdooníiłii t'áá Néíbal át'ínígi át'éego ádajít'ée le'.

²⁷Áko ná naal'a'í nishłíinii shinanit'a'í k'ad díí aa doolyéełii naa deeshniłgo dinééh nił naakaígíí baa díínił.

²⁸Asdzání naal'a'í nishłíinii doo ákǫ́ǫ́ áát'įįdígíí shá yóó'adí'aah, baa nánooshkąąh. Jó, Bóhólníihii éí shinanit'a'í ba'áłchíní ahii' háá'ahiyoołchíiłii t'áádóo nídí nidant'áa doogo íidoolííł, háálá bóhonishníihii éí Bóhólníihii bá ana'ał'į́. Áko díí bee bééhózin: doo yá'áshóonii doo ła' nii' hólǫ́ǫ́góó níiníłką́.

²⁹Diné ła' ne'iina' íidoołdįįł biniyé há nidéez'į́į'go nich'į' nídiilwodgo, nidi shinanit'a'í nílíinii, nii' sizíinii éí as'ahgóó iináanii bee hólǫ́ǫgo Bóhólníihii niDiyin God t'áá bí yaa áhályą́ą dooleeł. Áko ni'ana'í danilíinii éí bee aditł'į́į́h yee iijíítł'inígi át'éego yee azdootł'į́į́ł.

³⁰Áádóó ákódzaadóó bik'ijį' t'áá ałtsoní yá'át'éehii bik'ehgo shinanit'a'í bich'į' Bóhólníihii éí t'áá aaníígóó yee naa yáłti' yę́ę ádzaago, índa Ízrel dine'é binanít'áa doo biniyé nininíłtį́įgo,

³¹shinanit'a'í nílíinii, díí t'áadoo bąąh níni'í da doo, doodaii' doo bik'ee haadanít'ée da doo; jó, diné doo ádąąh dahast'áanii t'áadoo síníłhį́įgo bidił doo bits'ánína' da, áádóó shinanit'a'í t'áadoo ádá k'éédahodiidlaa da. Áko Bóhólníihii t'áá aaníígóó ááníiłii yee shinanit'a'í yił hólǫ́ǫgo asdzání ná naal'a'í nishłíinii béénílniih doo.

³²Áko David éí Ábigeil áyidííniid, Ízrel dine'é biBóhólníihii Diyin God baa ha'niih le'; jó, éí díí jį́ shaa niníł'a'go shidááh yíníyá.

³³Kót'éego dííníniidígíí baa ha'niih le' áádóó nik'ihojidlíi le', háálá díí jį́ diné séłhį́įgo bidił bits'ánílį́įgo índa ádá k'éhodee'nééh bits'ąą jé'ííníshnáago áshiinilaa.

³⁴Háálá ts'ídá t'áá aaníí Ízrel dine'é biBóhólníihii Diyin God hiná; éí haada nihideeshłíłígíí bits'ąą t'ą́ą́' áshósingo doo tsxį́įłgo shidááh yíníyáágóogo, t'áá ákót'éego ts'ídá t'áá aaníí abínígo Néíbal bik'éí bidiné ałtso nisíłtseed doo nít'éé'.

³⁵Ákohgo David éí asdzání t'áadoo le'é yiníjaa'ígíí néidiinil, áádóó asdzání ábizhdííniid, Nílááh, nich'į' hózhǫ́ǫgo nighangóó nídídááh; t'áá aaníí nizaad diséts'ą́ą'go yíníkeedígíí ná bi'iishłaa.

³⁶Áko Ábigeil éí Néíbal bich'į' nídzídzáago bikin góne' aláahgo naat'áanii áda'asįįdígi át'éego ída'íísįįd lá. Áko bijéí t'áá íiyisí bił nihooshǫǫh, háálá oodlą́ą'go t'áá íiyisí bił nahondooh. Ákohgo nijiyáhígíí t'áadoo bee bił hojoolne' da, biiskání abínígo índa.

³⁷Ákódaadzaadóó biiskání hoos'įįdgo Néíbal hasht'e'ninádzáago, hwe'asdzą́ą́ díí t'áá ałtso yee hoł hoolne'go bik'ee hajéí niiltłah áádóó tségi ájít'é dzizlį́į́'.

³⁸Ákódaadzaadóó neeznáá yiską́ągo daats'í Néíbal éí Bóhólníihii atíhoolaago dadziztsą́.

³⁹Áko David éí Néíbal daaztsą́ ha'níigo yidiizts'ą́ą'go ádííniid, Bóhólníihii baa ha'niih le', éí Néíbal shá nahałt'i' yę́ę k'éidiidlaa. Áko bá naal'a'í éí doo yá'áshóonii yits'ąą yaa áhályą́; jó, Bóhólníihii éí Néíbal doo yá'át'ééh ájooníłígíí yee k'ééhodiidlaa. Ákohgo David éí Ábigeil be'asdzą́ą́ íidoolííł biniyé yich'į' i'ííł'a'.

⁴⁰Áko David bá nidaal'a'í Kármel kin shijaa'gi Ábigeil yaa yíkaigo ádeidííniid, David naa náánihiníł'a'go bich'į' nił nídadiikahgo be'asdzą́ą́ dííleeł.

⁴¹Áko nízhdii'na'go ni'jį' tsé'yaa jineeshjoolgo ájíní, Jó, asdzání ná naal'a'í nishłíinii shinanit'a'í bá nidaal'a'í bikee' bá táádadeesgis.

⁴²Áko Ábigeil tsxį́įłgo nízhdii'na'go télii nihihoníyį́, índa ch'ikéí ałdó' ashdla' yilt'éego hoł niheekai, David bá nidaal'a'í bikéé' níjíkaigo David be'asdzą́ą́ dzizlį́į́'.

⁴³Jézriyel kin shijaa'dóó Ahínowam joolyéii ałdó' David náhodiiłtį́įgo t'áá ájíłah ba'ákéí dzizlį́į́'.

⁴⁴Saul bitsi' Máíkal éí David be'asdzą́ą́ nít'é'ígíí Fáltai beíltį́; éí Léíyish biye' jílį́įgo Gálim kin shijaa'dę́ę́' nijighá.