Read Navajo I SAMUEL 28 Bible Online

I SAMUEL 28 - Navajo bible

I SAMUEL 28

¹Éí yoołkááł yę́ędą́ą́' Filístiya dine'é éí Ízrel dine'é yik'iidoojah biniyé bisiláo áłah ádayiilaa. Áko Éíkish éí David áyidííniid, T'áá aaníí nił bééhoozį́į́': ni índa diné bił nanikaígíí bił łahdóó shíká anáhjahgo bich'į' anaa' áńdahwiil'įįh doo.

²David éí Éíkish áyidííniid, Ná naal'a'í yaa nidoogaałígíí yíneel'ą́ągo t'áá aaníí nił bééhodoozįįł. Áko Éíkish éí David ánéidoo' niid, Hágoónee', hool'áágóó shik'i ha'ídées'į́į'ii áńdeeshłííł.

³Sámuel éí daaztsą́ągo Ízrel dine'é t'áá ałtso haa dáácha áádóó t'áá hó hakin haal'áii Réímahgi yóó'ádahoolaa. Áko Saul éí ch'į́įdii yádabiiłti'ii áádóó da'diłgąshii éí kéyahdóó nahjį' hainííłkaad.

⁴Áko Filístiya dine'é áłah silį́į'go niheeskaígíí Shúnem haz'ánígi nidahaazná, índa Saul éí Ízrel dine'é t'áá ałtso áłah áyiilaago Gilbówa haz'ánígi nidahaazná.

⁵Áko Saul éí Filístiya dine'é bisiláo dziiłtsą́ągo nídzísdzííd, áádóó ayóó át'éego hatah hoditłid.

⁶Áko Saul éí Bóhólníihii níjooskango t'áadoo há yi'iilaa da; na'iigeeł bee nidi dooda, doodaii' Yúrim bee nidi dooda, doodaii' Diyin God yá dahalne'ii bee nidi dooda.

⁷Áko Saul éí bá nidaal'a'í áyidííniid, Asdzání éí ch'į́įdii yábiiłti'ii ła' shá hadanohtá; éí bich'į' deesháałgo néideeshkąął. Áko bá nidaal'a'í ádabidííniid, Níláahdi Éndor kin shijaa'gi asdzání éí ch'į́įdii yábiiłti'ii ła' naaghá.

⁸Ákohgo Saul łahgo ízh'diilyaago éé' ła' bee hazdiidzaa; diné nidilt'éego bił dashdiikaigo tł'ée'go asdzání baa jíkai. Áko ázhdííniid, Shá na'ídídííłkił nisin; t'áá yízhi'ígíí shá bił hadíí'ash.

⁹Asdzání áhodííniid, Shoo, Saul yaa naayáhígíí nił bééhózin; ch'į́įdii yádabiiłti'ii índa da'diłgąshii Ízrel kéyahdóó íísdįįd. Ha'át'éegoshą' dadeestsaałgo łoh t'éí bee shisíníłná?

¹⁰Nidi Saul éí asdzání bich'į' Bóhólníihii binahjį' ádee hazdoodzíí', Ts'ídá t'áá aaníí Bóhólníihii hiná; ákót'éego ts'ídá t'áá aaníí doo atínidi'doolníił da.

¹¹Ákohgo asdzání ádííniid, Háishą' ná bił nídiisht'aash? Áko ábijiní, Sámuel shá bił nídiit'aash.

¹²Nít'éé' asdzání éí Sámuel dziiłtsą́ągo ts'ídá yéego hazhdoolghaazhgo hajííchxa áádóó Saul ábizhdííniid, Ha'át'éegoshą' shina'ílo'? Jó, Saul ánít'į́.

¹³Aláahgo naat'áanii áhodííniid, T'áadoo nił yé'í. Ha'át'íishą' yiniłtsą́? Áko asdzání éí Saul áyidííniid, Nahasdzáán biyi'dę́ę́' diyin ła' haagháahgo yiiłtsą́.

¹⁴Áko asdzání ábizhdííniid, Haashą' noolnin? Áko asdzání ání, Hastiin haastih léi' éé' nineezígíí bił yisdisgo haayáago yiiłtsą́. Áko Saul éí Sámuel át'į́įgo hoł bééhoozingo ni'jį' tsé'yaa jineeshjool.

¹⁵Ákohgo Sámuel éí Saul áyidííniid, Ha'át'íishą' biniyé jishcháá'dę́ę́' náshidiniłt'e'go shaa nísínít'įįd? Saul áhodííniid, Doo hasohodoobéézhgóó yínííł nishłį́, háálá Filístiya dine'é t'áá íiyisí anaa' dashił'į́, áádóó Diyin God shits'áhoníle'go doo shich'į' haadziih da hazlį́į́'; Diyin God yá dahalne'ii, doodaii' t'óó baa na'iigeełígíí nidi ádin. Éí bąą níká ádííniid; ádeeshníiłgi shił bééhózingo áshidíílííł.

¹⁶Áko Sámuel áhodííniid, Ha'át'íí biniyé nashídíłkid? Jó, Bóhólníihii nits'ą́ą́' dahodiile'go ni'ana'í silį́į'go yee' ádíní.

¹⁷Bóhólníihii éí shinahjį' nich'į' yee haadzíí' yę́ęgi ániilaa; jó, nílák'eedóó aláahgo bee óhólníihgo bił haz'áanii éí Bóhólníihii nits'áidiní'ą́, áádóó bił kééhonít'íinii David yeidiní'ą́.

¹⁸Háálá Bóhólníihii nich'į' haadzí'ígíí doo bik'eh hwííníł'įįd da, doo nidi Ámalek dine'é yich'į' báhóóchįįdígíí t'áadoo bá bi'iinilaa da. Éí bąą díí jį́ Bóhólníihii kóniilaa.

¹⁹Áádóó ałdó' Bóhólníihii éí Ízrel dine'é t'áá nił Filístiya dine'é yaa nihididoo'ááł, áko yiską́ągo ni áádóó niye'ké shił dahonohłǫ́ǫ doo; Bóhólníihii éí Ízrel dine'é bisiláo danilíinii Filístiya dine'é yílák'ee yididoo'ááł.

²⁰T'áá áko Saul ni'jį' tsé'yaa ajíítłizhgo Sámuel bizaadígíí bik'ee t'áá íiyisí hoł yéé' hazlį́į́' áádóó hatah doo hwiina' da, háálá t'áadoo ajiyání i'íí'ą́ą́dóó yiską́.

²¹Áko asdzání éí Saul baazhníyáago t'áá íiyisí tsídoolyiz lágo dziiłtsą́, áko ábijiní, Shoo, ná naal'a'í nishłíinii ádínínígíí bik'eh íisdzaago she'iina' ninádiní'ą́, áádóó saad bee shich'į' háínídzí'ígíí bik'eh ánísht'é.

²²Éí bąą k'ad, baa nánooshkąąh, ná naal'a'í nishłį́įgo shíísíníłts'ą́ą́'; bááh ádaał ts'íísígíí ła' ná nídiishkaahgo dííyį́į́ł, áko éí bee nidziilgo bikiin náánáádáał doo.

²³Nidi dooznízingóó ájíní, Doo deeshį́įł da. Nidi há nidaal'a'ígíí éí asdzání yił háni' há'ádahoolaa. Ákohgo nízhdii'na'go tsásk'eh bikáa'gi dasneezdá.

²⁴Áko asdzání bikin góne' béégashii yáázh neesk'ahígíí ła' hólǫ́ǫgo haneetehee néís'ah, áádóó ak'áán ła' hayííjaa'go tayooznii' índa díík'ǫsh t'áágééd bááh áyiilaa.

²⁵Áko Saul áádóó bá nidaal'a'í yiyaa niyiizką́ągo dayííyą́ą́'. Áádóó t'áá éí bitł'éé' dah nízhdiikai.