Read Navajo I SAMUEL 30 Bible Online

I SAMUEL 30 - Navajo bible

I SAMUEL 30

¹Áko táá' yiską́ągo David áádóó diné hoł naakaígíí bił Zíklag kin haal'áagi jíkaigo Ámalek dine'é éí shádi'áahjigo kéyah áádóó Zíklag kin haal'áii yaatįįh yikai; Zíklag dine'é yik'eh dadeesdlį́į'go kin haal'áii adeideesk'ą́ą́'.

²Áko sáanii áádóó ákwii kéédahat'íinii t'áá ałtso deisnáago t'áá dahóyáanii índa áłchíní danilíinii t'áadoo ła' dayiisxį́į da, nidi dah deidii'eezhgo anídeezh'eezh.

³Áko David índa diné hoł naakaígíí éí kin haal'áajį' yíkai, nít'éé' jó, kin haal'áhígíí adoolk'ą́ą́' lá. Bida'asdzą́ą́ áádóó dabiye'ké índa dabitsi'ké yisnááh ádaalyaa lá.

⁴Ákohgo David áádóó diné hoł naakaígíí hoł hadadeeshghaazhgo dajíícha; t'áá hó daznízinjį' dajíícha.

⁵David hwe'asdzą́ą́ nidilt'éhígíí ałdó' yisnááh ályaa lá. Ahínowam éí Jézriyeldóó naaghá, Ábigeil bąąh áhásdįįdii Néíbal be'asdzą́ą́ nít'éé' yę́ę éí Kármeldóó naaghá.

⁶Áko David t'áá íiyisí ádił niseedzá; jó, diné hoł nidazdoołniiłgo yádaałti', háálá diné t'áá ałtso dabiye'ké índa dabitsi'ké yąąh dabíni'. Nidi David éí Bóhólníihii haDiyin God binahjį' hadziil ízh'diilyaa.

⁷Áko David éí Ahímelek biye' Abáíyathar náá'iiłniihii nilíinii áyidííniid, Íífad wolyéii de'níłtsóós, baa nánooshkąąh. Ákohgo Abáíyathar éí íífad David yeiníłtsooz.

⁸Áko David éí Bóhólníihii náyookąąh, Da' díí dabi'disnánígíísh bikéé' nídiishyeed? Da' shónídeideesht'eełísh? Nít'éé' áhodííniid, Bikéé' nídiilyeedgo t'áá aaníí t'áá ałtso shónéidííłt'eeł.

⁹Ákohgo David dah diiyá, áádóó diné hastą́ądi neeznádiingo hoł naakaígíí ałdó' bił dashdiikai. Bíísor tó nílínígi jíkaigo ła' t'áá ákwii nizhnínil.

¹⁰Nidi David áádóó diné dį́įdi neeznádiin ánéelą́ą'go hwe'ana'í bikéé' ahijookai, nidi diné naakidi neeznádiin yilt'éego nídínéeskaigo Bíísor tó nílínígíí ha'naagóó dookahígíí doo yídáághahgóó t'áá ákwii naháaztą́.

¹¹Ííjip dine'é ła' kéyahgi bik'ídadziskaigo David bił baa jíkai. Bááh ła' bada'dzistsoodgo yiyííyą́ą́'; tó ałdó' ła' baa dadzizką́ągo yoodlą́ą́'.

¹²Tsin sikaadii fig wolyéhígíí bineest'ą' ahídiiłjée'ii ła' neheesti'go áádóó ch'il na'atł'o'ii bąąh bineest'ą' dah naazyíinii nááltseii naakigo baazhnínilgo yiyííyą́ą́' índa bíni' nááłdził, háálá t'áadoo ayání áádóó t'áadoo adlání tágí jį́ áádóó tágí tł'éé' azlį́į́' lá.

¹³Áko David áháłní, Háishą' bíí' nílį́, háádę́ę'shą' naniná? Nít'éé' ání, Ííjip kéyahdóó dinééh nishłį́. Ámalek dine'é ła' bá naalte' nishłį́į́ nít'éé'. Táá' yiskánídą́ą́' shitah honiigaigo shinanit'a'í t'óó shits'ą́ą́' dah diiyá.

¹⁴Kéreth dine'é kéédahat'ínígíí shádi'ááhjígo áádóó Júdah kéyahgi índa Kéíleb bikéyah shádi'ááhjígo baatįįh yiikai áádóó Zíklag kin haal'áii adahidiilk'ą́ą́'.

¹⁵Áko David áháłní, Da' díí dah oonéłígíísh bich'į' t'áá shił díí'ash? Áko áhodííniid, Diyin God bee shich'į' ádee hadídziih, doo yéí shidiyííłhéeł da, doodaii' shinanit'a'í doo baa náshididíí'áał da, ákót'éego t'éiyá ákóyaa nił deesh'ash.

¹⁶Áádóó ákóyaa hoł ní'áazhgo, shoo, kéyahgi t'áá át'éé nít'éé' diné yíl'áago ła' da'ayą́ áádóó da'adlą́ índa azhish baa na'aldeeh, háálá Filístiya dine'é bikéyahdóó índa Júdah kéyahdóó naalye'é t'óó ahayóí deisnáá lá.

¹⁷Áko hiłiijį́į́dóó náábiiskání i'íí'ą́ąjį' David ałtso nahastseed. Áko t'áadoo diné ła' ánéísįįd da, t'áá hazhó'ó dinééh dį́įdi neeznádiin ánéelą́ą'go ghą́ą́'ask'idii bił yóó'aheezhjé'ígíí t'éí yisdáhaazhjéé'.

¹⁸Áko David éí Ámalek dine'é hondaalye'é deisná yę́ę t'áá át'é shóníjoost'e'go índa hwe'asdzą́ą́ t'áá áłah shóníjoost'e'go yisdájíínil.

¹⁹T'áá ałtso neheesdzíí' lá: ayáhígo ádaat'éii áádóó ayóó ádaat'éii, aye'ké áádóó atsi'ké danilíinii áádóó binaalye'é índa t'áadoo le'é deisná yę́ę t'áá át'é shónáyoost'e' lá.

²⁰David éí dibé nidanilkaadii áádóó béégashii nidanilkaadii t'áá át'é néísná. Áko diné dabilį́'ígíí alą́ąjį' ats'ádeineeskaadgo ádaaní, Díí David binaalye'é ádaat'é.

²¹Áko David éí diné naakidi neeznádiingo Bíísor tó nílínídi nídínéeskaigo naháaztą́ yę́ę baa nídzídzá; nít'éé' David índa diné yił náákahígíí yidááh heezhjéé'. Áko David éí diné baazhníyáago k'é bizhdííniid.

²²Ákohgo diné doo yá'ádaashóonii índa t'áá bóhólníhígíí t'áá ałtso David yił nidaazbaa'ígíí ádadííniid, Shónídeisiilt'e'ii doo ła' haa dadii'nił da, háálá doo nihił nidadzizbaa' da. Nidi diné dajílíinii hweda'asdzą́ą́ áádóó hada'áłchíní hach'į' bééda'diyiilnihgo háni'dii nídají'éésh.

²³Nidi David ádííniid, Shik'isóó danohłíinii, Bóhólníihii nihaidiní'ánígíí t'ááká nahjį' kódaołe' lágo. Éíyee' t'áá bí nihaa áhályą́ índa nihidadiilkaalii nihílák'ee yidíí'ą́.

²⁴Díí kót'éhígíí biniinaa háishą' nihíists'ą́ą' doo? Azhą́ nidasoobaa' nidi t'áá kǫ́ǫ́ naalye'é yaa ádahalyą́ą́ nít'é'ígíí t'áá aheełt'éego nihił ałts'ą́ą́' da'íłk'iiz doo.

²⁵Áko íídą́ą́' ákódzaago nee'nijį' yee nihoní'áanii áádóó bik'ehgo hoogáałii Ízrel dine'é bá ájiilaago díí jį́į́góó bá ákót'é.

²⁶Áko David éí Zíklag kin haal'áagi jiníyáago ana'í binaalye'é ła' Júdah dine'é aląąjį' naazíinii dahak'isígíí bich'į' dadeeshjaa'go ájíní, Shoo, Bóhólníihii bida'ana'í binaalye'é ła' bee nihik'idahojisdli'ii ádaat'é.

²⁷Béthel kin haal'áagi kéédahat'ínígíí bá dooleeł. Réímath shádi'ááhjígo kin haal'áagi kéédahat'ínígíí ałdó', Játer kin shijaa'góoda,

²⁸Aró'er kin shijaa'góoda, Sífmath haz'ánígóoda, Éshtiimowa kin haal'áágóoda,

²⁹Réíkal haz'ánígóoda, Jiiráhmiyel dine'é bikin hadaas'áágóoda, Kííni dine'é bikin hadaas'áágóoda,

³⁰Hórmah kin haal'áágóoda, Kárashan haz'ánígóoda, Éíthak kin haal'áágóoda,

³¹Hííbran kin haal'áágóoda índa náádaałahgóó t'áá ałtsogi David áádóó diné hoł tádíkááh nít'é'ígíí bił tázhdookai yę́ęgóó kéédahat'ínígíí ałdó' bee bik'idahojisdli'.