Read Navajo I SAMUEL 4 Bible Online

I SAMUEL 4 - Navajo bible

I SAMUEL 4

¹Áko Sámuel ádííniidígíí Ízrel dine'é t'áá ałtso dayíínii'. Íídą́ą́' Ízrel dine'é éí Filístiya dine'é yił da'ahidoogą́ą́ł biniyé Ében-íízer kin shijaa'gi niníná áádóó Filístiya dine'é éí Éífek kin haal'áagi niníná.

²Filístiya dine'é éí Ízrel dine'é yich'į' nídadiibaa'go yaa dahoneesná; éí nahós'a'gi diné dį́įdi mííl nidabi'diztseed.

³Áádóó dah da'ínéhíjį' diné níjíkaigo Ízrel dine'é yá aląąjį' naazíinii ádadííniid, Ha'át'éegoshą' Bóhólníihii éí Filístiya dine'é bits'ąą daníichéehgo ánihiilaa? Sołtį', Bóhólníihii bitsits'aa' dílzinii éí bee aha'deet'áanii bii' sinilii t'áá bił Sháíloh haz'ánídę́ę́' kojį' nídadidiit'ááł, áko deíníit'aahgo éí nihi'ana'í t'áá bił bits'ą́ąjį' yisdánihidoonił.

⁴Áko diné danilíinii Sháílohgóó ada'as'a', áko t'áá ałtsoní biBóhólníihii bitsits'aa' dílzinii éí bee aha'deet'áanii bii' sinilii áádę́ę́' nídeidoo'ááł; éí Bóhólníihii jílíinii diyingo naal'a'í chérabim wolyéii bita'gi wódahdi hojílǫ́, áko Íílai biye'ké Háfnai áádóó Fíniyas áadi Diyin God bitsits'aa' dílzinii éí bee aha'deet'áanii bii' sinilii yéské.

⁵Bóhólníihii bitsits'aa' dílzinii éí bee aha'deet'áanii bii' sinilii éí dah da'ínéhígi nídeiz'ą́, áko Ízrel dine'é t'áá ałtso ayóó íits'a'go hadadeeshghaazh, ákohgo nihokáá'góó hodiists'ą́ą́'.

⁶Nít'éé' Filístiya dine'é éí ayóó íits'a'go dazhdilwoshígíí deidiizts'ą́ą'go ádaaní, Ha'át'íishą' biniinaa Hííbrew dine'é dah yinéłígi ayóogo hahóó'á? Áko índa Bóhólníihii bitsits'aa' dílzinii éí dah da'ínéhígi nídeiz'ą́ągo yaa ákodaniizį́į́'.

⁷Áko Filístiya dine'é t'áá íiyisí nídaasdzííd, háálá ádaaní, Dah da'ínéehgi Diyin God ga' níyáá lá. Áko ádaaní, Hatíhíláane'ee'! Háálá t'ah doo kóhánéeh da nít'éé'.

⁸Hatíhíláane'ee'! Háishą' díí diyin dabidziilii yits'ą́ąjį' yisdánihidoonił? Díí diyinii éí honoojíidi bee atí'él'į́ ałtah áát'eełii yee Ííjip dine'é ałtso neistseedígíí ádaat'į́į́ lá.

⁹Danihidziil le' índa diné bidziiliigi át'éego áda'díínółzin, Filístiya dine'é danohłíinii, áko bí nihinaalte' danilį́į́ nít'éé' yę́ęgi át'éego doo Hííbrew dine'é binaalte' dadoohłeeł da. Diné bidziiliigi át'éego áda'díínółzin áádóó bił da'ahohgą́.

¹⁰Ákohgo Filístiya dine'é hak'iijéé', áádóó Ízrel dine'é bik'eh hodeesdlį́į'go dabiníbaal naaznilgóó t'áá ałtso anídahineezhchą́ą́', áko ayóogo nidabi'diztseed; jó, kwe'é tádiindi mííl Ízrel bisiláo t'áá ni' nidaakaígíí bi'doogą́ą́'.

¹¹Áádóó Diyin God bitsits'aa' dílzinii nídiit'ą́, áádóó Íílai biye' nidilt'éhígíí, Háfnai áádóó Fíniyas, t'áá áłah nabi'diztseed.

¹²T'áá éí bijį́ Bénjamin dine'é nilíinii ła' bitsiijį' łeezhgo áádóó bi'éé' neheesdǫ́ǫzgo da'ahijigánídę́ę́' Sháíloh haz'ánígi yílwod.

¹³Áko jílwodgo Íílai éí ha'ízdées'į́į'go atiin bąąhgi bik'i dah asdáhí yikáá' dah sidá, háálá Diyin God bitsits'aa' dílzinii bąąh háni'. Áko díí diné yílwodígíí kin haal'áhí góne' eelwodgo áhóót'įįdígíí yaa hoolne'; nít'éé' diné t'áá ałtso hahodííłdláád.

¹⁴Hahodííłdládígíí Íílai yidiizts'ą́ą'go ání, Díísh ha'át'íí biniinaa hahóó'á? Áádóó diné éí tsxį́įłgo Íílai yaa yílwodgo yił hoolne'.

¹⁵Áko íídą́ą́' Íílai náhást'édiindóó ba'aan tseebíí binááhai; haná'oh halbáago doo hazhó'ó ajoo'į́į da.

¹⁶Áko diné éí Íílai áyidííniid, Shí da'ahijigánídę́ę́' nánísdzá; jį́į́dą́ą́' da'ahijigánídę́ę́' yóó'eeshwod. Áko Íílai ání, Áadi haa dahat'į́, shiye'?

¹⁷Áko hane' yiní'ánígíí ání, Ízrel dine'é éí Filístiya dine'é yik'ee yóó'adahineezhchą́ą́', áádóó diné t'óó ahayóí nidabi'diztseed, áádóó niye'ké Háfnai áádóó Fíniyas t'áá áłah ałdó' neezná, índa Diyin God bitsits'aa' dílzinii nídiit'ą́.

¹⁸Ákódzaago Diyin God bitsits'aa' dílzinii nídiit'ánígíí bee Íílai bił ch'íhozhní'ą́ągo ch'é'étiingi bik'i dah asdáhí bikáá'dóó tséde íítłizh, áko bik'os k'é'éltǫ'go daaztsą́, háálá t'áá íiyisí hadzistih áádóó hatah hódaaz. Ízrel dine'é bá nihozhdiyii'aahgo dízdiin nááhai.

¹⁹Íílai bizháá'áád, éí Fíniyas be'asdzą́ą́, yiltsą́ągo k'adę́ę i'niiłchį́. Ákohgo Diyin God bitsits'aa' dílzinii nídiit'ą́ągo áádóó bizháá'áád jílíní daaztsą́ągo índa hahastiin ałdó' daaztsą́ągo baa hozdiizts'ą́ą'go áhozdiilzee'go izh'niiłchį́, háálá hoł náhodíníigai.

²⁰Áádóó k'adę́ę nihozhneeł'ąąhgo asdzání haa ádahalyánígíí ádahałní, T'áadoo nił yé'í, háálá ashkii shíníłchį́. Nidi t'áadoo háádzoodzíí'góó t'óó nahonizhníł'ąąd.

²¹Áko íídą́ą́' awéé' ashkii éí Íkabad bee jíízhi'go kózhdííniid, Ízrel dine'é bee ayóó ájít'éii hats'ą́ą́' dahodiile'! Háálá Diyin God bitsits'aa' dílzinii hats'ą́ą́' nídiit'ą́ áádóó asdzání yizháá'áád nilíinii daaztsą́ índa hahastiin ałdó' daaztsą́.

²²Jó, kójíní, Ízrel dine'é bee ayóó ájít'é hats'ą́ą́' dahodiile', háálá Diyin God bitsits'aa' dílzinii hats'ą́ą́' nídiit'ą́.