Read Navajo I SAMUEL 5 Bible Online

I SAMUEL 5 - Navajo bible

I SAMUEL 5

¹Filístiya dine'é éí Diyin God bitsits'aa' dílzinii nídeidii'ą́ągo Ében-íízer kin shijaa'dóó Áshdad kin haal' áajį' deiz'ą́,

²áko Filístiya dine'é éí Diyin God bitsits'aa' dílzinii nídeidii'ą́ągo bidiyin bidi'níinii Déígan wolyéii bikin góne' yah adeiz'ą́. E'elyaii Déígan wolyéhígíí bíighahgi nideiz'ą́.

³Áádóó Áshdad dine'é abíínídą́ą́' nízhdiijéé' nít'éé', shoo, Déígan éí ni'jį' Bóhólníihii bitsits'aa' dílzinii yiyaajį' tsé'yaa íítłizh lá. Ákohgo Déígan nídazhdiidzį́įzgo nídabidziisį'.

⁴Ákohgo biiskání abíínídą́ą́' nínáázhdiijéé' nít'éé', shoo, Bóhólníihii bitsits'aa' dílzinii biyaajį' Déígan wolyéii éí ch'é'étiin gónaa sitánígíí yikáa'jį' tsé'yaa anáánáátłizh lá, áádóó bitsiits'iin índa bíla' heestǫ'go nideeztąąd; t'áá hazhó'ó Déígan bizhi' t'éiyá yidzíí' lá.

⁵Éí bąą Áshdad kin haal'áadi Déígan binááda'iiłniihii áádóó t'áá ałtso Déígan bikin góne' yah anídaakahígíí díí jį́į́góó ch'é'étiin gónaa sitánígíí doo yik'i dadiiltaał da.

⁶Bóhólníihii éí ts'ídá yéego Áshdad dine'é yich'į' hodiyiisnáa'go ch'ozh yee atíyiilaa; Áshdad dine'é índa binaagóó kédaayahgóó kéédahat'íinii ałdó' ákóyiilaa.

⁷Áko Áshdad dine'é éí áhoot'éhígíí yaa ákodaniizį́į'go ádadííniid, Ízrel dine'é biDiyin God bitsits'aa' dílzinii doo t'áá nihitah hólǫ́ǫ da doo, háálá nihí atínihił'į́ áádóó nihidiyin Déígan atííł'į́.

⁸Ákohgo Filístiya dine'é aląąjį' bídahólníihii yíká ada'iis'a'go áłah ádayiilaago ádeidííniid, Ízrel dine'é biDiyin God bitsits'aa' dílziniishą', haa dadiilnííł? Áko hadaasdzíi'go ádaaní, Bíni'dii Ízrel dine'é biDiyin God bitsits'aa' dílzinii Gath kin haal'áágóó nídoot'ááł. Ákohgo Ízrel dine'é biDiyin God bitsits'aa' dílzinii ákǫ́ǫ́ anídeiz'ą́.

⁹Nidi tádazhdíí'ą́ągo Bóhólníihii éí kin haal'áhígi ayóó át'éego atíyiilaa, índa kin haal'áhídi kéédahat'íinii diné danilínígíí ániid nidaakaii áádóó hadaastihii t'áá ałtso bijágiizhgóó ch'ozh bąąh hadaaskai.

¹⁰Ákohgo Diyin God bitsits'aa' dílzinii Ékran kin haal'áajį' ánáádajiidlaa. Nidi Ékranjį' yít'ą́ągo Ékran dine'é hahodííłdláadgo ádaaní, Ízrel dine'é biDiyin God bitsits'aa' dílzinii nihitah deiz'ą́ą́ lá, áko nihí áádóó nihił kéédahat'íinii t'áá bił ánihidoołdįįł.

¹¹Éí bąą Filístiya dine'é binanit'a'í yich'į' ada'iis'a'go t'áá ałtso áłah ádayiilaago ádaaní, Ízrel dine'é biDiyin God bitsits'aa' dílzinii níláhgóó kónáhdlééh, índa bíni'dii t'áá bí bá haz'áníjį' ninát'aah, áko nihí nihidine'é t'áá bił doo ánihidoołdįįł da. Háálá éí kin haal'áhígi t'áá át'éé nít'éé' t'óó báhádzidgo hahonííchaad. Diyin God ayóó át'éego atí'iilaa;

¹²diné doo daneeznáanii éí ch'ozh bitah níłnii', áádóó kin haal'áhídóó yá'ąąshiigóó chaał adahoyiinííh.