Read Navajo I SAMUEL 6 Bible Online

I SAMUEL 6 - Navajo bible

I SAMUEL 6

¹Bóhólníihii bitsits'aa' dílzinii éí Filístiya dine'é bikéyahdi si'ą́ągo tsosts'id nídeezid.

²Áádóó Filístiya dine'é bidiyin yich'į' nááda'iiłniihii índa diné náásgóó ádahodooníiłii yaa dahalne'ii yíká ada'as'a'go ádaaní, Bóhólníihii bitsits'aa' dílziniishą', haa dadiilnííł? Haaléit'éego t'áá bá haz'ą́ą́góó t'ą́ą́' áńdadiilnííł lá? Éí bee nihił dahołne'.

³Áko ádaaní, Ízrel dine'é biDiyin God bitsits'aa' dílzinii t'ą́ą́' áńdaahdlééh ládą́ą́' t'ááká nááhániihii t'áágééd t'ą́ą́' áńdaohdlééh lágo, nidi ííshją́ą́ doo ákǫ́ǫ́ ájíít'įįdjí nááhániihii bił t'ą́ą́' áńdadoohdlííł. Ákohgo hadaałt'é nídadoohdleeł, áádóó biniinaa Bóhólníihii bibee atí'él'íinii doo nihits'ą́ąjį' kónéhígíí nihił béédahodoozįįł.

⁴Áko ádaaní, Ha'át'íí doo ákǫ́ǫ́ ájíít'įįdjí nááhániihii shį́įshą' Bóhólníihii bich'į' náádahidiilnih? Áko ádadííniid, Óola bee ch'ozh ashdla'go áádóó na'ats'ǫǫsí ashdla'go bééda'alyaii, t'áá Filístiya dine'é binanit'a'í ánéelt'e'ígíí bik'ehgo bich'į' náádahidiilnih, háálá t'ááłá'í bee atí'él'ínígíí nihí t'áá ánółtso nihinanit'a'í bił nihitah níłnii'.

⁵Éí bąągo ííshją́ą́ ch'ozh áádóó na'ats'ǫǫsí éí kéyah dayííłchxǫ'ígíí ádá bééda'doohdlííł, áádóó Ízrel dine'é biDiyin God baa dahohniih; eii shį́į́ áko Bóhólníihii bibee atí'él'íinii nihits'ą́ąjį' kwíidoolííł, índa nihidiyin danilíinii áádóó nihikédaayah ałdó' bits'ą́ąjį' kwíidoolííł.

⁶Ha'át'éegoshą' nihijéí daołtł'is? Jó, Ííjip dine'é áádóó Féro bijéí dayííłtł'is yę́ęgi ádaoht'į́. Shą́ą́', Bóhólníihii hatahgóó t'óó bik'eda'ayóii yaa naayáago Ízrel dine'é bééda'dzisnii'go dah diiná.

⁷Éí bąągo k'ad tsinaabąąs naaldlózígíí ádadoohłííł áádóó béégashii néi'nihí naakigo t'ah doo bizéédéetįįhígíí éí tsinaabąąs naaldlózígíí bighą́ą́h didoohnił, nidi biyázhí éí hooghangóó bits'ą́ą́' nídadooh'ish.

⁸Áádóó Bóhólníihii bitsits'aa' dílzinii nídooh'aahgo tsinaabąąs naaldlózígíí biih woh'aah, áádóó óola bee bééda'alyaii éí doo ákǫ́ǫ́ ájíít'įįdjí nááhániihii Bóhólníihii bich'į' náádahidoołnihígíí éí tsits'aa' biyi'ígíí tsits'aa' dílzinii bíighahgi ninoh'aah. Áádóó bił dah nídi'doobąs biniyé bééda'doołnih.

⁹Áádóó t'áá danół'į́; t'áá daats'í bí bikéyahjigo Beth-shíímesh kin shijaa'góó nídoodleeł, áádóó índa ayóó át'éego atínihiilaii éí bí át'į́įgo nihił béédahodoozįįł, nidi doo bí át'į́į́góó bí doo atínihiilaagóó nihił béédahoozingo éí t'óó nihich'į' ákóhóót'įįd dooleeł.

¹⁰Áko diné ákódaadzaago béégashii néi'nihígíí naakigo bizéé'dazdeeztą́ągo tsinaabąąs naaldlózígíí bighą́ą́h dazdeeznil, áádóó biyázhí éí t'áá hooghandi yah adadziznil.

¹¹Áádóó Bóhólníihii bitsits'aa' dílzinii áádóó óola bee na'ats'ǫǫsí índa ch'ozh bééda'alyaii tsits'aa' bee tsinaabąąs biih dadziz'ą́.

¹²Áádóó béégashii áníigo t'áá k'éhézdon Beth-shíímesh kin shijaa' bich'į' atiingóó oołbąs, t'áadoo nidi nish'náajigo, doodaii' nishtł'ajigo kódzaa da, áádóó Filístiya dine'é binanit'a'í Beth-shíímesh kin shijaa' bihoodzojį' yikéé' niikai.

¹³Íídą́ą́' Beth-shíímesh dine'é éí yíldzis góyaa dáda'ak'ehgi tł'oh naadą́ą́' deiyizh, áádóó hadaazghal nít'éé' tsits'aa' dílzinii bił ná'oobąsgo dayiiłtsą́, áko yaa bił dahóózhǫǫd.

¹⁴Díí tsinaabąąs Beth-shíímeshdóó diné, Jáshowa wolyéii, bidá'ák'ehgi tsé ayóó áníłtso si'ánígi ni'níbą́ą́z, áádóó tsin neheeshjíí' tsinaabąąs bee ályaii nidayiizti'go yee dadeideeshjéé', áádóó béégashii nideistseedgo Bóhólníihii bich'į' didlidgo náádayiisnii'.

¹⁵Áádóó Líívai dine'é éí Bóhólníihii bitsits'aa' dílzinii áádóó éí bíighahgi óola bee bééda'alyaii tsits'aa' biyi' sinilígíí adadeiz'ą́ągo, tsé ayóó áníłtsoii yikáa'gi dah deiznil, áko Beth-shíímesh dine'é éí didlidgo náádahaniihii índa náádahidoonihgo náádahaniihii t'áá éí bijį́ Bóhólníihii yich'į' náádayiisnii'.

¹⁶Ákohgo Filístiya dine'é binanit'a'í ashdlalt'éego éí dayiiłtsą́ągo t'áá éí bijį́ Ékran kin haal'áágóó anáákai.

¹⁷Díí óola bee ch'ozh bééda'alyaii éí doo ákǫ́ǫ́ ájíít'įįdjí nááhániihii át'éego Filístiya dine'é éí Bóhólníihii yich'į' náádayiisnii'ii át'é: ła' éí Áshdad kin haal'áii bá, ła' éí Géíza kin haal'áii bá, ła' éí Áshkelan kin haal'áii bá, ła' éí Gath kin haal'áii bá, ła' éí Ékran kin haal'áii bá náádayiisnii'.

¹⁸Áádóó óola bee na'ats'ǫǫsí bééda'alyaii náádayiisnii': Filístiya dine'é yinanit'a'í ashdlalt'éego bikin hadaas'áii t'áá ałtso bik'ehgo, ła' ditą́ągo binaa ahééda'astł'inii áádóó kin dashijaa' éí yá náádayiisnii'; tsé ayóó áníłtso si'áníjį' Bóhólníihii yich'į' náádayiisnii'. Díí tsé ayóó áníłtsoígíí bikáa'gi Bóhólníihii bitsits'aa' dílzinii dah dadziz'ánígíí éí tsé díí jį́įdi t'ahdii Beth-shíímesh kin shijaa'dóó diné nilíinii, Jáshowa wolyéii bidá'ák'ehgi si'ą́.

¹⁹Áádóó Bóhólníihii éí Beth-shíímeshdi kéédahat'ínígíí ła' yiyííghą́ą́', háálá Bóhólníihii bitsits'aa' dílzinii biyi' góne' dazhdéé'į́į́'; éí bąą ashdladiindi mííldóó ba'aan tsosts'idiin diné ho'doogą́ą́', áko diné bikwá'ásiní yę́ę yaa daacha, háálá Bóhólníihii t'áá íiyisí ayóó át'éego hatahgi diné neistseed.

²⁰Ákohgo diné Beth-shíímesh kin shijaa'di kéédahat'ínígíí ádadííniid, Háishą' éí Bóhólníihii Diyin God diyinii bidááhdóó yizdoozįįłgo bízhneel'ą́? Háishą' nihitahdóó Bóhólníihii hach'į' bi'doolnih?

²¹Ákohgo nidaal'a'í danilíinii Kírjath-jíyarim kin shijaa'di kéédahat'íinii yich'į' ada'as'a'go kódaaní, Filístiya dine'é éí Bóhólníihii bitsits'aa' dílzinii nídeiz'ą́. Aadę́ę́' nihaa danohkáahgo nílááh nihikéyahgóó nídadoh'aah.