Read Navajo I SAMUEL 9 Bible Online

I SAMUEL 9 - Navajo bible

I SAMUEL 9

¹Diné léi' Bénjamin dine'é nilíinii Kish wolyé. Kish éí Éíbiyel biye', Éíbiyel éí Zíírar biye', Zíírar éí Biikórath biye', Biikórath éí Afáíyah biye', Afáíyah éí Bénjamin dine'é nilį́. Kish wolyéhígíí at'į́ áádóó bóhólnííh,

²áádóó hó haye' hólǫ́, éí Saul wolyé; éí diné ániid naagháii bíiyisii nilį́. Ízrel dine'é bitahdóó doo ła' haláahgo bíiyis da; t'áá íiyisí diné nineezii jílį́, áko diné t'áá ałtso t'áá hawosígo ádaníłtso.

³Áko Saul bizhé'é Kish bitélii yóó'ííjéé'. Ákohgo Kish éí biye' Saul áyidííniid, Nílááh, naal'a'í ła' nídiiłteehgo télii hanohtá.

⁴Áádóó Dził Íífreiyim báhátis jíí'áázh, áádóó Shaláísha nahós'a' biyi'góó ch'ízhní'áázh, nidi t'áadoo bik'ínizhnítą́ą' da. Áádóó kéyah Shéílim nahós'a' biyi'góó ch'ízhní'áázh, áko ákwe'é nidi ádin. Ákohgo Bénjamin dine'é bikéyah biyi'góó ch'ínáájít'áázh, nidi t'áadoo bik'ínizhnítą́ą' da.

⁵Ákohgo Zuf hoolyéegi jiní'áazhgo há naal'a'í bił joo'ashígíí ábijiní, Tį', t'ą́ą́' nikéédiit'ash; shizhé'é daats'í télii yaa yooznahgo, jó, nihída nihikéé' bíni' íí'á.

⁶Nidi naal'a'í ádííniid, Jó, diné léi' Diyin God bił hólóonii díí kin haal'áhígi kééhat'į́, áádóó éí diné ił nilíinii nilį́; t'áá ałtsoní yee hahadziihii t'áá aaníí neheleeh. Sołtį', ákǫ́ǫ́ diit'ash; eii shį́į́ náádiit'ashgóó yee nihił hodoolnih.

⁷Ákohgo Saul há naal'a'í ábizhdííniid, Nidi ákǫ́ǫ́ diit'áazhgo ha'át'íishą' díí diné baa diilyééł? Háálá díí nihi'azis biyi' ch'iyáán ásdįįd áádóó bik'é nidoolyéełgo diné éí Diyin God bił hólóonii baa diilyéłígíí ádin. Ha'át'íísh ałdó' nihee hólǫ́?

⁸Áko naal'a'í éí Saul ánéidoo'niid, Na', kǫ́ǫ́ béésh łigaii shékel wolyéhígíí dį́į'go shijaa'ígíí t'ááłá'í si'ą́ bíighahgo shee hólǫ́, áko diné éí Diyin God bił hólóonii baa deeshniłgo náádiit'ashgóó yee nihił hodoolnih.

⁹(Ałk'idą́ą́' Ízrel dine'é bitahgi Diyin God neízhdídóołkiłgo ájíniih, Sołtį', diné náásgóó ádahodooníiłii yaa halne'ii bich'į' diikah; jó, éí k'ad Diyin God yá halne'ii wolyéhígíí éí ałk'idą́ą́' náásgóó áhodooníiłii yaa halne'ii wolyéé nít'éé'.)

¹⁰Ákohgo Saul éí bá naal'a'í áyidííniid, Yá'át'éhígi ádííníniid, sołtį', ákǫ́ǫ́ diit'ash. Ákohgo kin haal'áágóó diné éí Diyin God bił hólóonii kééhat'ínígi jiní'áázh.

¹¹Ákohgo kin haal'áhígíí bich' į' dah yisk'id góde joo'ashgo ch'ikéí tó hadeidiyoolohgóó deíkáahgo bidááshní'áázh, áko ádabizhdííniid, Da' diné náásgóó áhodooníiłii yaa halne'iísh kwe'é naaghá?

¹²Nít'éé' ádahodííniid, Aoo', kwe'é naaghá; jó, t'áá nihítséedi níyá. Tsxį́įłgo óht'į́, jį́į́dą́ą́' díí kin haal'áhígi níyá, háálá aláahdi yanáalk'id bikáa'gi díí jį́ diné nááda'iiłniihgo yaa nídiikai.

¹³T'áá kin haal'áhíjį' oo'áázhgóó bik'ídínóotááł; t'ah doo aláahdi yanáalk'id góde i'niiyą́ą́' yiniyé dah diighááhgóó, háálá bí áadi yigháahgo índa diné ida'niiyį́į́h; jó, hó nááhidoonihii bik'i sozdilzįįh, áádóó índa hágo dabidi'niihgo nehekáhígíí da'ayį́į́h. K'ad ákóde dooh'ash, háálá t'áadoo hodina'í bik'ídooh'ash.

¹⁴Ákohgo kin haal'áá góde jiní'áázh. Ts'ídá k'adę́ę kintah góne' aji'aashgo, shoo, aláahgo yanáalk'id góde Sámuel deeyáago hadááh níyá.

¹⁵Bóhólníihii éí Sámuel yił hoolne'go t'ááłá'í yiską́ hadziihgo Saul doogáałgo ání,

¹⁶Yiską́ągo kóhoodzaago diné ła' naa deesh'aałígíí éí dinéhígíí Bénjamin dine'é bikéyahdę́ę́' naaghá, áko ak'ah bik'i yeidííziłgo ats'ádííłtéełgo shidine'é Ízrel yinant'áa doo. Ákohgo Filístiya dine'é bits'ą́ąjį' shidine'é yisdéidoonił, háálá shidine'é bich'į' nidahwii'nánígíí nish'į́įgo shich'į' daachago diséts'ą́ą́'.

¹⁷Áádóó Sámuel éí Saul yiyiiłtsą́ągo Bóhólníihii ábidííniid, Shoo, eii diné bee nił hweeshne'ígíí át'į́! Díí lą́ą shidine'é yinant'áa doo.

¹⁸Áko Saul ch'é'étiingi Sámuel bich'į' nizhníyáago ájíní, Shił hólne', baa nánooshkąąh, háadishą' náásgóó ádahodooníiłii yaa halne'ii bighan?

¹⁹Sámuel éí Saul áyidííniid, Shí náásgóó ádahodooníiłii yaa halne'ii nishłį́. Nílááh, aláahgo yanáalk'id bikáa'jį' shilą́ąjį' hasínááh, háálá díí jį́ nił adeeshį́į́ł, áádóó yiską́ągo néé'níshníihgo índa baa nitsíníkeesígíí t'áá át'é bee nił hodeeshnih.

²⁰Táá' yiskánídą́ą́' nitélii yóó'eekaígíí t'áadoo bąąh níni'í, háálá éí shónáozt'e'. Háí diné shį́įshą' Ízrel dine'é t'áá ałtso yinízinii jílį́? Jó, éí t'áá ni áádóó nizhé'é bighandóó danilíinii ałdó'.

²¹Saul ánáázhdí'ní, Shí éí Bénjamin dine'é nishłį́įgo Ízrel dine'é bitahdóó t'áá ałtso bi'ohgo áníilt'e'. Áádóó shizhé'é bighandóó Bénjamin dine'é danilíinii t'áá ałtso ayáhígo ádaat'é. Ha'át'éegishą' bee ákót'éego shich'į' yáníłti'?

²²Ákohgo Sámuel éí Saul áádóó bá naal'a'í yił dah yidii'eezhgo wóne'é yah ayíí'eezh; áadi ánda'iikaah bá haz'ánígi yił da'dooyį́į́ł biniyé yił dah dineezbin.

²³Sámuel éí ch'iyáán ííł'íní áyidííniid, Atsį' hasht'e'nidííkááł, nidííniid yę́ę nídiikaah; tádiin daats'í yilt'éego nidahaaskai lá.

²⁴Áko ch'iyáán ííł'íní éí ajáád t'áá át'é nízhdiiką́ągo Saul biyaa nizhníką́, áádóó Sámuel ádííniid, Shoo, kǫ́ǫ́ ná'ánászįįdígíí niyaa niiką́ągo niyą́. Diné bee bi'níłnii'dóó wóshdę́ę́' ná hasht'e'siką́ągo áajį' ahoolzhiizh. Éí bijį́ Saul éí Sámuel bił ajííyą́ą́'.

²⁵Áádóó aláahgo yanáalk'idę́ę́' hadáájoot'áazhgo kin haal'áhíjį' ajíí'áázh. Kin bighą́ą'di Sámuel éí Saul bił ahił nahodzisne'.

²⁶Ákohgo hayííłką́ągo Sámuel éí kin bighą́ą́'góó Saul yíká ádííniid, Nídiidááh, níláhgóó néé'deeshnih. Ákohgo Saul nídii'na' áádóó t'áá ájíłah kin bitah ch'ída'iiztiiníjį' ch'ízhní'áázh.

²⁷Áádóó k'adę́ę kin haal'áádóó ch'íjíkáahgo Sámuel éí Saul áyidííniid, Ninaal'a'í nihilą́ąjį' yínááł, bidiní, áádóó ákǫ́ǫ́ dah diiyáago ni éí t'áá kwe'é t'óó kónízahíjį' shiba' sínízį́į doo, áko Diyin God bizaad bee nił hodeeshnih.