Read Ndebele-IBhayibhili Elingcwele 2006 Ugenesisi 11 Bible Online

Ugenesisi 11 - Ndebele-IBhayibhili Elingcwele 2006 bible

Ugenesisi 11

¹Umhlaba wonke-ke wawulolimi lunye, lamazwi manye.

²Kwasekusithi ekuhambeni kwabo bevela empumalanga bafica igceke elizweni leShinari, basebehlala khona.

³Basebesithi ngulowo lalowo kumakhelwane wakhe: Wozani, asenzeni izitina sizitshise lokuzitshisa; lesitina saba lilitshe kubo, lengcino yaba ludaka kubo.

⁴Basebesithi: Wozani, asizakheleni umuzi lomphotshongo osihloko sawo sisemazulwini, besesizenzela ibizo, hlezi sihlakazeke ebusweni bomhlaba wonke.

⁵I Nkosi yasisehla ukubona umuzi lomphotshongo abantwana babantu abawakhayo.

⁶I Nkosi yasisithi: Khangela, yisizwe sinye, njalo balolimi lunye bonke, njalo yikho abaqala ukukwenza; khathesi-ke akulalutho olungabehlula abamisa ukulwenza.

⁷Wozani, asehle, siphambanise lapho ulimi lwabo, ukuze bangezwa, ngulowo lalowo ulimi lomakhelwane wakhe.

⁸Ngakho i Nkosi yabahlakazela ebusweni bomhlaba wonke besuka lapho; basebesima ukwakha umuzi.

⁹Ngalokho kwabizwa ibizo lawo ngokuthi iBabeli, ngoba lapho i Nkosi yaphambanisa ulimi lomhlaba wonke; kusukela lapho i Nkosi yabahlakaza kubo bonke ubuso bomhlaba.

¹⁰Lezi yizizukulwana zikaShemu. UShemu wayeleminyaka elikhulu, wasezala uArpakishadi, iminyaka emibili emva kukazamcolo.

¹¹UShemu wasephila, esezele uArpakishadi, iminyaka engamakhulu amahlanu; wazala amadodana lamadodakazi.

¹²UArpakishadi wasephila iminyaka engamatshumi amathathu lanhlanu, wazala uShela.

¹³UArpakishadi wasephila, esezele uShela, iminyaka engamakhulu amane lantathu; wazala amadodana lamadodakazi.

¹⁴UShela wasephila iminyaka engamatshumi amathathu, wazala uEberi.

¹⁵UShela wasephila, esezele uEberi, iminyaka engamakhulu amane lantathu; wazala amadodana lamadodakazi.

¹⁶UEberi wasephila iminyaka engamatshumi amathathu lane, wazala uPelegi.

¹⁷UEberi wasephila, esezele uPelegi, iminyaka engamakhulu amane lamatshumi amathathu; wazala amadodana lamadodakazi.

¹⁸UPelegi wasephila iminyaka engamatshumi amathathu, wazala uRewu.

¹⁹UPelegi wasephila, esezele uRewu, iminyaka engamakhulu amabili layisificamunwemunye; wazala amadodana lamadodakazi.

²⁰URewu wasephila iminyaka engamatshumi amathathu lambili, wazala uSerugi.

²¹URewu wasephila, esezele uSerugi, iminyaka engamakhulu amabili lesikhombisa; wazala amadodana lamadodakazi.

²²USerugi wasephila iminyaka engamatshumi amathathu, wazala uNahori.

²³USerugi wasephila, esezele uNahori, iminyaka engamakhulu amabili; wazala amadodana lamadodakazi.

²⁴UNahori wasephila iminyaka engamatshumi amabili lesificamunwemunye, wazala uTera.

²⁵UNahori wasephila, esezele uTera, iminyaka elikhulu lamatshumi ayisificamunwemunye; wazala amadodana lamadodakazi.

²⁶UTera wasephila iminyaka engamatshumi ayisikhombisa, wazala uAbrama, uNahori loHarani.

²⁷Lalezi yizizukulwana zikaTera. UTera wazala uAbrama, uNahori loHarani; uHarani wasezala uLothi.

²⁸UHarani wasesifa phambi kukayise uTera, elizweni lokuzalwa kwakhe, eUri yamaKhaladiya.

²⁹OAbrama loNahori basebezithathela abafazi; ibizo lomkaAbrama nguSarayi, lebizo lomkaNahori nguMilka, indodakazi kaHarani, uyise kaMilka loyise kaIska.

³⁰Kodwa uSarayi wayeyinyumba; wayengelamntwana.

³¹UTera wasethatha uAbrama indodana yakhe, loLothi indodana kaHarani, indodana yendodana yakhe, loSarayi umalokazana wakhe, umkaAbrama indodana yakhe; basebesuka labo eUri yamaKhaladiya, ukuya elizweni leKhanani; basebefika eHarani, bahlala khona.

³²Lensuku zikaTera zaziyiminyaka engamakhulu amabili lanhlanu; uTera wasefela eHarani.