Read Ndebele-IBhayibhili Elingcwele 2006 Ugenesisi 12 Bible Online

Ugenesisi 12 - Ndebele-IBhayibhili Elingcwele 2006 bible

Ugenesisi 12

¹I Nkosi yasisithi kuAbrama: Suka wena elizweni lakini lezihlotsheni zakho lemzini kayihlo, uye elizweni engizakutshengisa lona.

²Ngizakwenza-ke ube yisizwe esikhulu, ngikubusise, ngenze ibizo lakho libe likhulu, njalo ube yisibusiso.

³Njalo ngizababusisa abakubusisayo, labakuqalekisayo ngibaqalekise; lakuwe kuzabusiswa zonke insapho zomhlaba.

⁴UAbrama wasehamba njengoba i Nkosi ikhulumile kuye, loLothi wahamba laye. Njalo uAbrama wayeleminyaka engamatshumi ayisikhombisa lanhlanu ekusukeni kwakhe eHarani.

⁵UAbrama wasethatha uSarayi umkakhe, loLothi indodana yomfowabo, lempahla yabo yonke ababeyiqoqile, lemiphefumulo ababeyizuzile eHarani; basebesuka ukuya elizweni leKhanani; bafika elizweni leKhanani.

⁶UAbrama wasedabula ilizwe waze wafika endaweni yeShekema, esihlahleni se-okhi* seMore. LamaKhanani ayekhona elizweni ngalesosikhathi.

⁷I Nkosi yasibonakala kuAbrama, yathi: Kunzalo yakho ngizanika lelilizwe. Waseyakhela lapho i Nkosi ilathi eyayibonakale kuye.

⁸Waseqhubeka esuka lapho waya entabeni empumalanga yeBhetheli, wamisa ithente lakhe, iBhetheli entshonalanga leAyi empumalanga. Waseyakhela lapho i Nkosi ilathi, wabiza ibizo le Nkosi.

⁹UAbrama wasesuka wahamba eqhubeka esiya eningizimu.

¹⁰Kwasekusiba khona indlala elizweni. UAbrama wasesehlela ngaseGibhithe ukuthi ahlale khona njengowezizwe, ngoba indlala yayinzima elizweni.

¹¹Kwasekusithi esesondela ukungena eGibhithe wathi kuSarayi umkakhe: Khangela-ke, ngiyazi ukuthi ungowesifazana omuhle obukekayo.

¹²Njalo kuzakuthi lapho amaGibhithe ekubona, azakuthi: Lo ngumkakhe; abesengibulala, kodwa wena akugcine uphila.

¹³Ake uthi ungudadewethu, ukuze kube kuhle kimi ngenxa yakho, lomphefumulo wami uphile ngenxa yakho.

¹⁴Kwasekusithi lapho uAbrama esefikile eGibhithe, amaGibhithe ambona owesifazana, ukuthi muhle kakhulu.

¹⁵Iziphathamandla zikaFaro lazo zambona, zambabaza phambi kukaFaro. Owesifazana waselethwa endlini kaFaro.

¹⁶Wasemphatha kuhle uAbrama ngenxa yakhe; njalo waba lezimvu lezinkabi labobabhemi lezinceku lezincekukazi labobabhemikazi lamakamela.

¹⁷Kodwa i Nkosi yamhlupha uFaro ngezinhlupheko ezinkulu, lendlu yakhe, ngendaba kaSarayi umkaAbrama.

¹⁸UFaro wasembiza uAbrama, wathi: Kuyini lokhu okwenze kimi? Kungani ungangitshelanga ukuthi ungumkakho?

¹⁹Utsholoni ukuthi ungudadewenu, ngize ngimthathe ukuba ngumkami? Ngakho khangela-ke umkakho; m thathe uhambe.

²⁰UFaro waselaya amadoda ngaye; asemxotsha lomkakhe lakho konke ayelakho.