Read Ndebele-IBhayibhili Elingcwele 2006 Ugenesisi 19 Bible Online

Ugenesisi 19 - Ndebele-IBhayibhili Elingcwele 2006 bible

Ugenesisi 19

¹Ingilosi ezimbili zasezifika eSodoma sekuhlwile. LoLothi wayehlezi esangweni leSodoma. Kwathi uLothi e zi bona, wasukuma ukuzihlangabeza, wathi mbo ngobuso emhlabathini;

²wasesithi: Khangelani-ke makhosi ami, ngicela liphendukele endlini yenceku yenu, lilale ubusuku, ligeze inyawo zenu, beselivuka ngovivi, lihambe indlela yenu. Zathi-ke: Hatshi, kodwa sizalala endleleni.

³Wasezincenga kakhulu zaze zaphendukela kuye zangena endlini yakhe; wazenzela ukudla, wapheka isinkwa esingelamvubelo, zasezisidla.

⁴Zingakalali, amadoda omuzi, amadoda eSodoma, azingelezela indlu, kusukela komutsha kusiya komdala, bonke abantu bevela ephethelweni lomuzi.

⁵Asembiza uLothi athi kuye: Angaphi amadoda afike kuwe ebusuku? Akhuphele phandle kithi ukuze siwazi.

⁶ULothi wasephumela kuwo emnyango, wavala umnyango ngemva kwakhe.

⁷Wathi: Ngiyacela bazalwane, lingenzi okubi.

⁸Khangelani-ke, ngilamadodakazi amabili, angakazi indoda; ake ngilikhuphele wona, beselisenza kuwo njengokuhle emehlweni enu; kodwa kulamadoda lingenzi lutho, ngoba yikho engene emthunzini wophahla lwami.

⁹Kodwa athi: Xekela le. Athi njalo: Yena lo yedwa wafika engowezizwe, kambe ngeqiniso angaba ngumahluleli? Khathesi sizakwenza okubi kuwe okwedlula wona. Acindezela kakhulu indoda uLothi, asondela ukuze afohloze isivalo.

¹⁰Kodwa lawomadoda elula isandla sawo, amngenisa uLothi kuwo endlini, avala umnyango.

¹¹Asetshaya amadoda ayesemnyango wendlu ngobuphofu, kusukela komncinyane kusiya komkhulu, aze adinwa yikudinga umnyango.

¹²Amadoda asesithi kuLothi: Useselobani lapha? Umkhwenyana lamadodana akho lamadodakazi akho, laye wonke olaye emzini, mkhuphe kulindawo,

¹³ngoba sizabhubhisa lindawo, ngoba isikhalo sabo sikhulu phambi kwe Nkosi; njalo i Nkosi isithumile ukuthi siyibhubhise.

¹⁴ULothi wasephuma, wakhuluma labakhwenyana bakhe ababezathatha amadodakazi akhe, wathi: Sukumani liphume kulindawo; ngoba i Nkosi izabhubhisa umuzi. Kodwa waba njengosomayo emehlweni abakhwenyana bakhe.

¹⁵Kwathi emadabukakusa, ingilosi zamcindezela uLothi, zisithi: Suka, uthathe umkakho lamadodakazi akho womabili atholakalayo, hlezi ubhujiswe ebubini bomuzi.

¹⁶Kodwa esazilazila, amadoda abamba isandla sakhe, lesandla somkakhe, lesandla samadodakazi akhe womabili, ngoba i Nkosi ilomusa kuye, asemkhupha, ambeka ngaphandle komuzi.

¹⁷Kwasekusithi esebakhuphele ngaphandle, yathi: Baleka ngenxa yempilo yakho, ungakhangeli ngemva kwakho, ungemi egcekeni lonke; balekela entabeni hlezi ubhujiswe.

¹⁸ULothi wasesithi kuwo: Kakungabi njalo, Nkosi.

¹⁹Khangela-ke, inceku yakho ithole umusa emehlweni akho, ukhulisile isihawu sakho, osenze kimi, ukugcina uphila umphefumulo wami; kodwa mina ngingeke ngiphephele entabeni, hlezi ububi bunamathele kimi, besengisifa.

²⁰Khangela-ke, lumuzi useduze ukubalekela kuwo; futhi umncinyane. Ngicela ngibalekele kuwo (kambe kawumncinyane?) lomphefumulo wami uphile.

²¹Yasisithi kuye: Khangela, ngibemukele ubuso bakho lakulolu udaba, ukuze ngingawuchithi umuzi okhulume ngawo.

²²Phangisa, balekela kuwo; ngoba ngingeze ngenza ulutho uze ufike kuwo. Ngakho babiza ibizo lomuzi ngokuthi yiZowari.

²³Ilanga laseliphumile phezu komhlaba lapho uLothi engena eZowari.

²⁴I Nkosi yasinisa phezu kweSodoma laphezu kweGomora isibabule lomlilo, kuvela e Nkosi ni kuvela emazulwini.

²⁵Yasibhubhisa leyomizi legceke lonke, labo bonke ababehlala emizini, lokuhlumayo komhlaba.

²⁶Kodwa umkakhe wakhangela emuva engemuva kwakhe, wasesiba yinsika yetswayi.

²⁷UAbrahama wasevuka ekuseni kakhulu, waya endaweni lapho ayemi khona phambi kwe Nkosi.

²⁸Wasekhangela phansi ngaseSodoma leGomora langasemhlabathini wonke wegceke, wabona, njalo khangela, intuthu yathunqa emhlabeni njengentuthu yesithando somlilo.

²⁹Kwasekusithi uNkulunkulu esebhubhisile imizi yegceke uNkulunkulu wamkhumbula uAbrahama, wamkhokhela uLothi emkhupha phakathi komgenquko, mhla ebhubhisa imizi ayehlala kuyo uLothi.

³⁰ULothi wasesenyuka esuka eZowari, wahlala entabeni, lamadodakazi akhe womabili laye, ngoba wayesesaba ukuhlala eZowari; wahlala obhalwini, yena lamadodakazi akhe womabili.

³¹Endala yasisithi kwencinyane: Ubaba u se mdala, njalo kakulandoda emhlabeni ukungena kithi, ngokwendlela yomhlaba wonke.

³²Woza simnathise ubaba iwayini, silale laye sigcine iphila inzalo evela kubaba.

³³Asemnathisa uyise iwayini ngalobobusuku; endala yasingena yalala loyise, futhi kakwazanga ekulaleni kwayo lekusukeni kwayo.

³⁴Kwasekusithi ngosuku olulandelayo endala yathi kwencinyane: Khangela, bengilele lobaba ngobusuku obedlulileyo; asimnathise iwayini langalobubusuku, ubusungena ulale laye, ukuze sigcine iphila inzalo evela kubaba.

³⁵Asemnathisa uyise iwayini langalobobusuku; lencinyane yasukuma yalala laye, futhi kakwazanga ekulaleni kwayo lekusukeni kwayo.

³⁶Ngokunjalo amadodakazi womabili kaLothi athatha izisu kuyise.

³⁷Endala yasizala indodana, yayitha ibizo yathi nguMowabi; lowo nguyise wamaMowabi kuze kube lamuhla.

³⁸Lencinyane layo yazala indodana, yayitha ibizo yathi nguBenami; lowo nguyise wabantwana bakoAmoni kuze kube lamuhla.