Read Ndebele-IBhayibhili Elingcwele 2006 Ugenesisi 24 Bible Online

Ugenesisi 24 - Ndebele-IBhayibhili Elingcwele 2006 bible

Ugenesisi 24

¹UAbrahama wayesemdala eselensuku ezinengi; le Nkosi yayimbusisile kukho konke.

²UAbrahama wasesithi encekwini yakhe, endala yendlu yakhe, ebusa phezu kwakho konke alakho: Ake ubeke isandla sakho ngaphansi kwethangazi lami,

³ukuze ngikufungise nge Nkosi, uNkulunkulu wamazulu loNkulunkulu womhlaba, ukuthi kawuyikuyithathela indodana yami umfazi emadodakazini amaKhanani, engihlala phakathi kwawo;

⁴kodwa uzakuya elizweni lakithi lezihlotsheni zami, uyithathele umfazi indodana yami uIsaka.

⁵Inceku yasisithi kuye: Mhlawumbe owesifazana angafuni ukungilandela kulelilizwe, ngingayibuyisela lokuyibuyisela yini indodana yakho elizweni owaphuma kulo?

⁶UAbrahama wasesithi kuye: Qaphela ukuthi ungayibuyiseli khona indodana yami.

⁷I Nkosi, uNkulunkulu wamazulu, eyangithatha endlini kababa lelizweni lokuzalwa kwami, eyakhuluma kimi, eyafunga kimi isithi: Ngizalinika inzalo yakho lelilizwe; yona izathuma ingilosi yayo phambi kwakho, ukuze uyithathele khona umfazi indodana yami.

⁸Kodwa uba owesifazana engafuni ukukulandela, uzakuba ukhululekile kulesisifungo sami; kuphela ungayibuyiseli indodana yami khona.

⁹Inceku yasibeka isandla sayo ngaphansi kwethangazi likaAbrahama inkosi yayo, yafunga kuye ngaloludaba.

¹⁰Njalo inceku yasithatha amakamela alitshumi kuwo amakamela enkosi yayo, yahamba, lakho konke okuhle kwenkosi yayo kwakusesandleni sayo, yasisukuma yaya eMesopotamiya emzini kaNahori.

¹¹Yasiguqisa amakamela ngaphandle komuzi emthonjeni wamanzi ngesikhathi santambama, ngesikhathi sokuphuma kwabakhi bamanzi besifazana.

¹²Yasisithi: Nkosi, Nkulunkulu wenkosi yami uAbrahama, ake ungiphumelelise lamuhla, uyenzele umusa inkosi yami uAbrahama.

¹³Khangela, ngimi emthonjeni wamanzi, kuphuma amadodakazi amadoda omuzi ukukha amanzi.

¹⁴Njalo kuzakuthi intombazana engizakuthi kuyo: Ake ukhothamise imbiza yakho ukuze nginathe, ibisisithi: Natha, lamakamela akho ngizawanathisa; yiyo oyimisele inceku yakho uIsaka; ngalokho-ke ngizakwazi ukuthi uyenzele umusa inkosi yami.

¹⁵Kwasekusithi ingakaqedi ukukhuluma, khangela-ke, uRebeka waphuma, owazalelwa uBethuweli indodana kaMilka, umkaNahori umfowabo kaAbrahama, njalo elembiza ehlombe lakhe.

¹⁶Njalo inkazana yayikhangeleka kuhle kakhulu, intombi emsulwa, okungelandoda eyaziyo; yasisehlela emthonjeni, yagcwalisa imbiza yayo, yenyuka.

¹⁷Inceku yasigijima ukuyihlangabeza yathi: Ake unginathise amanzi amalutshwana embizeni yakho.

¹⁸Yasisithi: Natha, nkosi yami. Yaphangisa yehlisela imbiza yayo esandleni sayo, yayinathisa.

¹⁹Isiqedile ukuyinathisa yathi: Ngizakhelela lamakamela akho aze aqede ukunatha.

²⁰Yasiphangisa yathululela isigxingi sayo emkolweni wokunathela, yabuya yagijimela emthonjeni ukuyakukha, yakhelelela amakamela ayo wonke.

²¹Indoda yasiyikhangelisisa ithule ukuze yazi ukuthi i Nkosi iyiphumelelisile indlela yayo kumbe hatshi.

²²Kwasekusithi amakamela eseqedile ukunatha, indoda yasithatha icici legolide, isisindo salo sasiyingxenye yeshekeli*, lamasongo amabili ezandleni zayo, isisindo sawo saba ngama shekeli alitshumi egolide.

²³Yasisithi: Uyindodakazi kabani? Ake ungazise. Kukhona indawo yethu yini endlini kayihlo ukuthi silale?

²⁴Yasisithi kuyo: Ngiyindodakazi kaBethuweli indodana kaMilka owayizalela uNahori.

²⁵Yathi kuyo futhi: Silakho konke amahlanga lokudla kwezinyamazana okunengi, lendawo yokulala.

²⁶Indoda yasikhothama, yakhonza i Nkosi,

²⁷yasisithi: Ibusisiwe i Nkosi, uNkulunkulu wenkosi yami uAbrahama, engayekelanga umusa wayo lobuqotho bayo enkosini yami; mina-ke, ngisendleleni, i Nkosi ingikhokhelele endlini yabafowabo benkosi yami.

²⁸Intombi yasigijima, yazisa indlu kanina indaba ezinje.

²⁹Njalo uRebeka wayelomnewabo obizo lakhe lalinguLabani; uLabani wasegijimela phandle endodeni emthonjeni.

³⁰Kwasekusithi esebonile icici lamasongo ezandleni zikadadewabo, esezwile amazwi kaRebeka udadewabo okuthi: Itsho njalo indoda kimi; wasesiya endodeni, khangela-ke, yayimi emakameleni emthonjeni.

³¹Wasesithi: Ngena wena obusisiweyo we Nkosi; umeleni ngaphandle? Ngoba mina sengilungisile indlu lendawo yamakamela.

³²Indoda yasisiza endlini, yakhulula amakamela, wasenika amakamela amahlanga lokudla kwenyamazana, lamanzi okugeza inyawo zayo lenyawo zamadoda ayelayo.

³³Kwasekubekwa ukudla phambi kwayo; kodwa yathi: Kangiyikudla ngize ngikhulume indaba zami. Wasesithi: Khuluma.

³⁴Yasisithi: Ngiyinceku kaAbrahama.

³⁵Futhi i Nkosi iyibusisile kakhulu inkosi yami, yaze yaba nkulu. Yayinika izimvu lezinkomo, lesiliva legolide, lezinceku lezincekukazi, lamakamela labobabhemi.

³⁶Njalo uSara inkosikazi yenkosi yami uyizalele inkosi yami indodana emva kokuba esemdala; yasiyinika konke elakho.

³⁷Inkosi yami yasingifungisa isithi: Ungayithatheli indodana yami umfazi kumadodakazi amaKhanani, engihlala elizweni lawo;

³⁸kodwa uzakuya endlini kababa lezihlotsheni zami, ubusuyithathela indodana yami umfazi.

³⁹Ngasengisithi enkosini yami: Mhlawumbe owesifazana kayikungilandela.

⁴⁰Yasisithi kimi: i Nkosi, engihamba phambi kwayo, izathuma ingilosi yayo lawe, izaphumelelisa indlela yakho, njalo uzayithathela indodana yami umfazi ezihlotsheni zami lendlini kababa.

⁴¹Emva kwalokho uzakhululeka esifungweni sami uba uye ezihlotsheni zami njalo uba bengakuniki yena, uzakhululeka-ke esifungweni sami.

⁴²Kuthe ngifika emthonjeni lamuhla, ngathi: Nkosi, Nkulunkulu wenkosi yami uAbrahama, uba-ke uphumelelisa indlela yami, engihamba ngayo;

⁴³khangela, ngimi emthonjeni wamanzi; njalo kakuthi intombi ezaphuma ukukha lengizakuthi kuyo: Ake unginathise amanzi amalutshwana esigxingini sakho;

⁴⁴ibisisithi kimi: Natha lawe, futhi ngizakhelelela lamakamela akho; kayibe nguye owesifazana i Nkosi emmisele indodana yenkosi yami.

⁴⁵Ngingakaqedi ukukhuluma enhliziyweni yami, khangela-ke, uRebeka waphuma lesigxingi sisehlombe lakhe; wehlela emthonjeni, wakha. Ngasengisithi kuye: Akunginathise.

⁴⁶Wasephangisa, wethula isigxingi kuye wathi: Natha, futhi ngizanathisa lamakamela akho. Ngasenginatha, wasenathisa lamakamela.

⁴⁷Ngasengimbuza ngathi: Uyindodakazi kabani? Wasesithi: Indodakazi kaBethuweli, indodana kaNahori uMilka amzalela yona; ngasengifaka icici emakhaleni akhe lamasongo ezandleni zakhe.

⁴⁸Ngasengikhothama, ngakhonza i Nkosi, ngabusisa i Nkosi uNkulunkulu wenkosi yami uAbrahama, engikhokhele endleleni elungileyo ukuthi indodakazi yomfowabo wenkosi yami ngiyithathele indodana yayo.

⁴⁹Khathesi-ke uba lizayenzela inkosi yami umusa lobuqotho, ngitshelani; uba-ke kungenjalo, ngitshelani, ukuze ngiphendukele ngakwesokunene loba ngakwesokhohlo.

⁵⁰Khona oLabani loBethuweli baphendula, bathi: Le into ivela e Nkosi ni; kasilakutsho lutho kuwe, olubi kumbe oluhle.

⁵¹Khangela, uRebeka uphambi kwakho; m thathe uhambe, ukuze abe ngumkandodana yenkosi yakho, njengoba i Nkosi ikhulumile.

⁵²Kwasekusithi inceku kaAbrahama isizwile amazwi abo yakhothamela emhlabathini phambi kwe Nkosi.

⁵³Inceku yasikhupha imiceciso yesiliva, lemiceciso yegolide, lezembatho, yakunika uRebeka, yabanika lomnewabo lonina impahla eziligugu.

⁵⁴Basebesidla banatha, yona lamadoda ayelayo, balala; bavuka ekuseni, yasisithi: Ngiyekelani ngiye enkosini yami.

⁵⁵Kodwa umnewabo lonina bathi: Kayihlale lathi intombazana izinsuku loba ezilitshumi, emva kwalokho uhambe.

⁵⁶Yasisithi kubo: Lingangibambeleli, lokhu i Nkosi iphumelelisile indlela yami; ngiyekelani ngihambe ukuze ngiye enkosini yami.

⁵⁷Basebesithi: Asiyibize intombi, sizwe emlonyeni wayo.

⁵⁸Basebembiza uRebeka, bathi kuye: Uzahamba lalindoda yini? Wasesithi: Ngizahamba.

⁵⁹Basebemyekela ehamba uRebeka udadewabo lomlizane wakhe, lenceku kaAbrahama lamadoda ayo.

⁶⁰Basebembusisa uRebeka, bathi kuye: Wena dadewethu, woba zinkulungwane zezigidi, lenzalo yakho izakuba ngumnikazi wesango labayizondayo !

⁶¹URebeka wasesukuma lamantombazana akhe, bagada amakamela, balandela indoda; inceku yasimthatha uRebeka, yahamba.

⁶²UIsaka wasefika lapho abavelela khona emthonjeni iLahayi-Royi, njalo wayehlala elizweni leningizimu.

⁶³UIsaka wasephuma ukuyazindla ensimini sekuntambama; waphakamisa amehlo akhe wabona, khangela-ke, amakamela ayesiza.

⁶⁴LoRebeka waphakamisa amehlo akhe; esembonile uIsaka waziwisa ekameleni.

⁶⁵Wasesithi encekwini: Ngubani lindoda ehamba emasimini ukusihlangabeza? Inceku yasisithi: Yinkosi yami. Wasethatha isimbombozo, wazigubuzela.

⁶⁶Inceku yasilandisa kuIsaka zonke indaba ezenzileyo.

⁶⁷UIsaka wasemngenisa ethenteni likaSara unina, wamthatha uRebeka, waba ngumkakhe, wamthanda. UIsaka waseduduzwa emva kokufa kukanina.