Read Ndebele-IBhayibhili Elingcwele 2006 Ugenesisi 25 Bible Online

Ugenesisi 25 - Ndebele-IBhayibhili Elingcwele 2006 bible

Ugenesisi 25

¹UAbrahama wasebuya wathatha umfazi, lebizo lakhe linguKetura.

²Wasemzalela uZimrani loJokishani loMedani loMidiyani loIshibaki loShuwa.

³UJokishani wasezala uShebha loDedani. Lamadodana kaDedani ayengamaAshuri lamaLetushi lamaLewumi.

⁴Njalo amadodana kaMidiyani ayengoEfa loEferi loHanoki loAbida loElidaha. Wonke la ngamadodana kaKetura.

⁵UAbrahama wasemupha uIsaka konke ayelakho.

⁶Kodwa kumadodana abafazi abancane uAbrahama ayelabo uAbrahama wawanika izipho; wawasusa kuIsaka indodana yakhe, esaphila, wawathuma empumalanga elizweni lempumalanga.

⁷Lalezi zinsuku zeminyaka yempilo kaAbrahama ayiphilayo, iminyaka elikhulu lamatshumi ayisikhombisa lanhlanu.

⁸UAbrahama wasephela, wafa eseluphele kuhle emdala enele, wabuthelwa ezizweni zakibo.

⁹UIsaka loIshmayeli amadodana akhe basebemngcwaba obhalwini lweMakaphela, esiqintini sikaEfroni indodana kaZohari umHethi, esiqondene leMamre,

¹⁰isiqinti uAbrahama asithenga ebantwaneni bakaHethi; lapho uAbrahama wangcwatshwa loSara umkakhe.

¹¹Kwasekusithi emva kokufa kukaAbrahama, uNkulunkulu wambusisa uIsaka indodana yakhe; uIsaka wasehlala emthonjeni iLahayi-Royi.

¹²Lalezi yizizukulwana zikaIshmayeli indodana kaAbrahama, uHagari umGibhithekazi, incekukazi kaSara, amzalela uAbrahama.

¹³Lala ngamabizo amadodana kaIshmayeli ngamabizo awo njengokuzalwa kwawo; izibulo likaIshmayeli nguNebayothi, loKedari loAdibeli loMibisama

¹⁴loMishima loDuma loMasa,

¹⁵uHadadi loTema, uJeturi, uNafishi loKedema;

¹⁶la ngamadodana kaIshmayeli, njalo la ngamabizo awo ngemizana yawo langemizi yawo, iziphathamandla ezilitshumi lambili ngezizwe zawo.

¹⁷Njalo le yiminyaka yempilo kaIshmayeli, iminyaka elikhulu lamatshumi amathathu lesikhombisa; wasephela, wafa, wabuthelwa ebantwini bakibo.

¹⁸Basebehlala kusukela eHavila kusiya eShuri ephambi kweGibhithe, ekuhambeni usiya eAsiriya; wahlala phambi kobuso babafowabo bonke.

¹⁹Lalezi yizizukulwana zikaIsaka indodana kaAbrahama; uAbrahama wazala uIsaka.

²⁰UIsaka wayeseleminyaka engamatshumi amane mhla ethatha uRebeka, indodakazi kaBethuweli umSiriya wePadani-Arama, udadewabo kaLabani umSiriya, ukuba ngumkakhe.

²¹UIsaka wasemncengela umkakhe e Nkosi ni, ngoba wayeyinyumba; i Nkosi yasincengeka ngaye, kwaze kwathi uRebeka umkakhe wathatha isisu.

²²Abantwana babedubana-ke ngaphakathi kwakhe; wasesithi: Uba kunjalo, kungani nginje? Wasesiyabuza i Nkosi.

²³I Nkosi yasisithi kuye: Izizwe ezimbili zisesizalweni sakho, izizwe ezimbili zizakwehlukana emibilini yakho. Njalo esinye isizwe sizakuba lamandla kulesinye isizwe, futhi omkhulu uzakhonza omncinyane.

²⁴Kwathi sezigcwalisekile insuku zakhe zokubeletha, khangela-ke, amaphahla esiswini sakhe.

²⁵Kwasekuphuma owokuqala ebomvana, yena wonke enjengesembatho soboya; ngakho bamutha ibizo lakhe bathi ng uEsawu.

²⁶Njalo emva kwalokho kwaphuma umfowabo, lesandla sakhe sibambelele esithendeni sikaEsawu; basebebiza ibizo lakhe uJakobe. LoIsaka wayeleminyaka engamatshumi ayisithupha ekuzalweni kwabo.

²⁷Abafana basebekhula; uEsawu wasesiba ngumzingeli ohlakaniphileyo, umuntu weganga; loJakobe umuntu obekekileyo ehlala emathenteni.

²⁸Njalo uIsaka wayemthanda uEsawu ngoba wadla inyama yenyamazana yakhe; kodwa uRebeka wathanda uJakobe.

²⁹Kwathi uJakobe esephekile ukudla okuphekiweyo, kwasekufika uEsawu evela egangeni, ekhathele.

³⁰UEsawu wasesithi kuJakobe: Ake ungivumele ngiginye kokubomvu lokho okubomvu, ngoba ngikhathele. Ngalokhu babiza ibizo lakhe ngokuthi uEdoma.

³¹UJakobe wasesithi: Ngithengisela lamuhla ilungelo lobuzibulo bakho.

³²UEsawu wasesithi: Khangela, sengizakufa; njalo liyini kimi ilungelo lobuzibulo?

³³UJakobe wasesithi: Funga kimi lamuhla. Wasefunga kuye, wathengisa ilungelo lobuzibulo bakhe kuJakobe.

³⁴UJakobe wasenika uEsawu isinkwa lokudla okuphekiweyo kwamalentili*; wasesidla wanatha, wasukuma wahamba; ngalokho uEsawu wadelela ilungelo lobuzibulo bakhe.