Read Ndebele-IBhayibhili Elingcwele 2006 Ugenesisi 3 Bible Online

Ugenesisi 3 - Ndebele-IBhayibhili Elingcwele 2006 bible

Ugenesisi 3

¹Inyoka yayilobuqili-ke kulayo yonke inyamazana yeganga, eyayiyenzile i Nkosi uNkulunkulu. Yasisithi kowesifazana: Yebo uNkulunkulu watsho yini ukuthi: Kumele lingadli kuso sonke isihlahla sesivande?

²Owesifazana wasesithi enyokeni: Singadla okwesithelo sezihlahla zesivande;

³kodwa okwesithelo sesihlahla esiphakathi kwesivande, uNkulunkulu wathi: Lingadli kuso, njalo lingasithinti, hlezi life.

⁴Inyoka yasisithi kowesifazana: Kaliyikufa sibili.

⁵Ngoba uNkulunkulu uyazi ukuthi mhla lisidla kuso, amehlo enu azavuleka, njalo libe njengoNkulunkulu, lisazi okuhle lokubi.

⁶Owesifazana ebona-ke ukuthi isihlahla silungile ukuba yikudla, lokuthi sona siyabukeka emehlweni, lesihlahla sikhwabitheka ukwenza uhlakaniphe, wakha okwesithelo saso, wadla; wasenika lendoda yakhe kanye laye, yasisidla.

⁷Asevuleka amehlo abo bobabili, basebesazi ukuthi babenqunu; basebethungela ndawonye amahlamvu omkhiwa, bazenzela amafasikoti.

⁸Basebesizwa ilizwi le Nkosi uNkulunkulu ihamba esivandeni ekupholeni kosuku; uAdamu lomkakhe basebecatsha ebusweni be Nkosi uNkulunkulu phakathi kwezihlahla zesivande.

⁹I Nkosi uNkulunkulu yasibiza uAdamu, yathi kuye: Ungaphi?

¹⁰Wasesithi: Ilizwi lakho ngilizwe esivandeni, ngesaba, ngoba nginqunu; ngasengicatsha.

¹¹Yasisithi: Ngubani okutshele ukuthi unqunu? Udlile yini okwesihlahla, engakulaya ngaso ukuthi ungadli okwaso?

¹²UAdamu wasesithi: Owesifazana owangipha yena ukuthi abe lami, yena unginike okwesihlahla, ngasengisidla.

¹³I Nkosi uNkulunkulu yasisithi kowesifazana: Kuyini lokhu okwenzileyo? Owesifazana wasesithi: Inyoka ingikhohlisile, ngasengisidla.

¹⁴I Nkosi uNkulunkulu yasisithi enyokeni: Njengoba usukwenzile lokhu, uqalekisiwe wena okwedlula sonke isifuyo lokwedlula yonke inyamazana yeganga. Uzahamba ngesisu sakho, njalo udle uthuli insuku zonke zempilo yakho.

¹⁵Njalo ubutha ngizabufaka phakathi kwakho lowesifazana lenzalo yakho lenzalo yakhe. Yona izakuchoboza ikhanda, wena uzayichoboza isithende.

¹⁶Kowesifazana yathi: Ngokwandisa ngizakwandisa ubuhlungu bakho njalo ukuzithwala kwakho; ngobuhlungu uzabeletha abantwana, lokukhanuka kwakho kuzakuba sendodeni yakho, njalo yona izakubusa.

¹⁷Njalo kuAdamu yathi: Njengoba ulalele ilizwi lomkakho, wasusidla okwesihlahla engakulaya ngaso ukuthi: Ungadli okwaso, uqalekisiwe umhlaba ngenxa yakho; ngokukhathazeka uzakudla okwawo insuku zonke zempilo yakho.

¹⁸Njalo uzakumilisela ameva lokhula oluhlabayo, ubususidla imibhida yeganga.

¹⁹Ngesithukuthuku sobuso bakho uzakudla ukudla, uze ubuyele emhlabathini, ngoba wathathwa kuwo; ngoba wena uluthuli, njalo uzabuyela ethulini.

²⁰UAdamu wasebiza ibizo lomkakhe ngokuthi uEva, ngoba yena ungunina wabo bonke abaphilayo.

²¹I Nkosi uNkulunkulu yasisenzela uAdamu lomkakhe izigqoko zezigogo, yasibagqokisa.

²²I Nkosi uNkulunkulu yasisithi: Khangela, umuntu usenjengomunye wethu, esazi okuhle lokubi. Khathesi-ke, hlezi elule isandla sakhe athathe njalo okwesihlahla sempilo, adle aphile kuze kube sephakadeni.

²³Ngakho i Nkosi uNkulunkulu yamkhupha esivandeni seEdeni ukuthi alime umhlabathi, lapho athathwa khona.

²⁴Yasimxotsha umuntu; yabeka empumalanga kwesivande seEdeni amakherubi* lenkemba evuthayo ephenduphendukayo, ukulinda indlela yesihlahla sempilo.