Read Ndebele-IBhayibhili Elingcwele 2006 Ugenesisi 42 Bible Online

Ugenesisi 42 - Ndebele-IBhayibhili Elingcwele 2006 bible

Ugenesisi 42

¹UJakobe esebonile ukuthi kukhona amabele eGibhithe, uJakobe wathi emadodaneni akhe: Kungani likhangelana?

²Wathi futhi: Khangelani, sengizwile ukuthi kukhona amabele eGibhithe; yehlani liye khona, lisithengele khona, ukuze siphile, singafi.

³Abafowabo bakaJosefa abalitshumi basebesehla ukuthenga amabele eGibhithe.

⁴Kodwa uBhenjamini, umfowabo kaJosefa, uJakobe kamthumanga labafowabo, ngoba wathi: Hlezi ehlelwe yingozi.

⁵Amadodana kaIsrayeli asefika ukuthenga phakathi kwababesiza, ngoba indlala yayikhona elizweni leKhanani.

⁶Njalo uJosefa wayengumbusi phezu kwelizwe; wathengisela abantu bonke belizwe; bafika-ke abafowabo bakaJosefa, bamkhothamela ngobuso emhlabathini.

⁷UJosefa esebabonile abafowabo, wabazi, kodwa wazitshaya owemzini kubo, wakhuluma labo izinto ezilukhuni wathi kubo: Livela ngaphi? Bathi: Elizweni leKhanani, ukuthenga ukudla.

⁸UJosefa wasebazi abafowabo, kodwa bona kabamazanga.

⁹UJosefa wasekhumbula amaphupho awaphupha ngabo, wathi kibo: Lizinhloli, ukuzabona ubunqunu belizwe lizile.

¹⁰Basebesithi kuye: Hatshi, nkosi yami; kodwa inceku zakho zize ukuthenga ukudla.

¹¹Thina sonke singamadodana andodanye; singabaqotho, inceku zakho kazisizo inhloli.

¹²Wasesithi kubo: Hatshi, kodwa ukuzabona ubunqunu belizwe lizile.

¹³Basebesithi: Thina, izinceku zakho, siyizelamani ezilitshumi lambili, amadodana andodanye elizweni leKhanani; khangela-ke, icinathunjana likubaba lamuhla, enye kayi se kho.

¹⁴UJosefa wasesithi kubo: Yikho lokho engikutsho kini, ukuthi: Lizinhloli.

¹⁵Kulokhu lizahlolwa; nge mpilo kaFaro ! kalisoze liphume lapha, ngaphandle kokuthi kufike umfowenu olicinathunjana lapha.

¹⁶Thumani omunye wenu, amlande umfowenu; kodwa lina lizabotshwa, ukuze kuhlolwe amazwi enu, ukuthi iqiniso likini yini; kodwa uba hatshi, impilo kaFaro! lizinhloli.

¹⁷Wasebafaka esitokisini insuku ezintathu.

¹⁸UJosefa wasesithi kubo ngosuku lwesithathu: Yenzani lokhu ukuze liphile. Ngiyamesaba uNkulunkulu.

¹⁹Uba lingabaqotho, kabotshwe omunye wabafowenu endlini yokulondolozwa kwenu, kodwa lina hambani, libuyele lamabele endlala ezindlu zenu,

²⁰lilethe umnawenu olicinathunjana kimi; khona amazwi enu ezaqiniswa, ukuze lingafi. Basebesenza njalo.

²¹Basebekhulumisana besithi: Isibili silecala ngomfowethu, ngoba sabona usizi lomphefumulo wakhe, nxa wasincenga, kodwa kasilalelanga; ngenxa yalokho sehlelwe yikuhlupheka lokhu.

²²URubeni wasebaphendula wathi: Kangitshongo yini ukuthi: Lingoni kumfana? Kodwa kalilalelanga. Ngakho legazi lakhe, khangelani, liyabizwa.

²³Njalo bona babengazi ukuthi uJosefa uyezwa, ngoba kwakulomtoliki phakathi kwabo.

²⁴Njalo wabafulathela, wakhala inyembezi; wasetshibilikela kubo, wakhuluma kubo; wasethatha uSimeyoni kubo, wambopha phambi kwamehlo abo.

²⁵UJosefa waselaya ukuthi bagcwalise amasaka abo ngamabele, lokuthi babuyisele imali yabo, ngulowo lalowo esakeni lakhe, lokuthi babanike umphako wendlela; basebesenza njalo kubo.

²⁶Basebesethwesa obabhemi babo amabele abo, basuka lapho.

²⁷Kwathi omunye evula isaka lakhe ukuze anike ubabhemi wakhe ukudla endlini yezihambi, wabona imali yakhe, ngoba khangela, yayisemlonyeni wesaka lakhe.

²⁸Wasesithi kubafowabo: Imali yami ibuyiselwe; futhi khangelani, isesakeni lami. Inhliziyo yabo yasisehluleka, bathuthumela, omunye komunye besithi: Kuyini lokhu uNkulunkulu akwenze kithi?

²⁹Basebebuyela kuJakobe uyise elizweni leKhanani, bamazisa konke abahlangene lakho, besithi:

³⁰Indoda, umbusi walelolizwe, wasihalada, wasithatha njengenhloli zelizwe.

³¹Kodwa sathi kuye: Singabaqotho; kasisizo izinhloli;

³²sasiyizelamani ezilitshumi lambili, amadodana kababa; enye kayi se kho, lecinathunjana lamuhla likubaba elizweni leKhanani.

³³Lendoda, umbusi welizwe, wathi kithi: Ngalokhu ngizakwazi ukuthi lingabaqotho; tshiyani omunye wabafowenu kimi, lithathele indlala yezindlu zenu, lihambe,

³⁴lilethe umnawenu olicinathunjana kimi; khona ngizabona ukuthi kalisizo izinhloli kodwa lingabaqotho, ngilinike umfowenu, lithengiselane elizweni.

³⁵Kwasekusithi sebethulula amasaka abo, khangela-ke, isikhwama semali salowo lalowo sisesakeni lakhe. Lapho bebona izikhwama zemali yabo, bona loyise, besaba.

³⁶UJakobe uyise wasesithi kubo: Liyangemuka abantwana; uJosefa ka se kho loSimeyoni kakho, loBhenjamini lizamthatha; zonke lezizinto zimelane lami.

³⁷URubeni wasekhuluma kuyise esithi: Bulala ababili kumadodana ami, uba ngingambuyisi kuwe; mnikele esandleni sami, futhi mina ngizambuyisela kuwe.

³⁸Kodwa wathi: Indodana yami kayiyikwehla lani, ngoba umfowabo ufile, futhi yena usele yedwa; uba esehlelwa yingozi endleleni elihamba kuyo, lizakwehlisela engcwabeni izimvu zami ngosizi.