Read Ndebele-IBhayibhili Elingcwele 2006 Ugenesisi 5 Bible Online

Ugenesisi 5 - Ndebele-IBhayibhili Elingcwele 2006 bible

Ugenesisi 5

¹Lolu lugwalo lwezizukulwana zikaAdamu. Mhla uNkulunkulu edala umuntu, wamenza ngokomfanekiso kaNkulunkulu.

²Wabadala owesilisa lowesifazana, wasebabusisa, wasebiza ibizo labo wathi ngabantu, mhla bedalwa.

³UAdamu wasephila iminyaka elikhulu lamatshumi amathathu; wasezala indodana efuzweni lwakhe njengokomfanekiso wakhe, wabiza ibizo layo wathi nguSeti.

⁴Lensuku zikaAdamu esezele uSeti zaba yiminyaka engamakhulu ayisificaminwembili; wasezala amadodana lamadodakazi.

⁵Zonke-ke insuku zikaAdamu, aziphilayo, zaba yiminyaka engamakhulu ayisificamunwemunye lamatshumi amathathu, wasesifa.

⁶USeti wasephila iminyaka elikhulu lanhlanu; wazala uEnosi.

⁷USeti wasephila esezele uEnosi iminyaka engamakhulu ayisificaminwembili lesikhombisa; wazala amadodana lamadodakazi.

⁸Zonke-ke insuku zikaSeti zaziyiminyaka engamakhulu ayisificamunwemunye letshumi lambili; wasesifa.

⁹UEnosi wasephila iminyaka engamatshumi ayisificamunwemunye, wazala uKenani.

¹⁰UEnosi wasephila, esezele uKenani, iminyaka engamakhulu ayisificaminwembili letshumi lanhlanu; wazala amadodana lamadodakazi.

¹¹Zonke-ke insuku zikaEnosi zaziyiminyaka engamakhulu ayisificamunwemunye lanhlanu; wasesifa.

¹²UKenani wasephila iminyaka engamatshumi ayisikhombisa, wazala uMahalaleli.

¹³UKenani wasephila, esezele uMahalaleli, iminyaka engamakhulu ayisificaminwembili lamatshumi amane; wazala amadodana lamadodakazi.

¹⁴Zonke-ke insuku zikaKenani zaziyiminyaka engamakhulu ayisificamunwemunye letshumi, wasesifa.

¹⁵UMahalaleli wasephila iminyaka engamatshumi ayisithupha lanhlanu, wazala uJaredi.

¹⁶UMahalaleli wasephila, esezele uJaredi, iminyaka engamakhulu ayisificaminwembili lamatshumi amathathu; wazala amadodana lamadodakazi.

¹⁷Zonke-ke insuku zikaMahalaleli zaziyiminyaka engamakhulu ayisificaminwembili lamatshumi ayisificamunwemunye lanhlanu; wasesifa.

¹⁸UJaredi wasephila iminyaka elikhulu lamatshumi ayisithupha lambili, wazala uEnoki.

¹⁹UJaredi wasephila, esezele uEnoki, iminyaka engamakhulu ayisificaminwembili; wazala amadodana lamadodakazi.

²⁰Zonke-ke insuku zikaJaredi zaziyiminyaka engamakhulu ayisificamunwemunye lamatshumi ayisithupha lambili; wasesifa.

²¹UEnoki wasephila iminyaka engamatshumi ayisithupha lanhlanu, wazala uMethusela.

²²UEnoki wasehamba loNkulunkulu, esezele uMethusela, iminyaka engamakhulu amathathu; wazala amadodana lamadodakazi.

²³Zonke-ke insuku zikaEnoki zaziyiminyaka engamakhulu amathathu lamatshumi ayisithupha lanhlanu.

²⁴UEnoki wasehamba loNkulunkulu; kasekho, ngoba uNkulunkulu wamthatha.

²⁵UMethusela wasephila iminyaka elikhulu lamatshumi ayisificaminwembili lesikhombisa, wazala uLameki.

²⁶UMethusela wasephila, esezele uLameki, iminyaka engamakhulu ayisikhombisa lamatshumi ayisificaminwembili lambili; wazala amadodana lamadodakazi.

²⁷Zonke-ke insuku zikaMethusela zaziyiminyaka engamakhulu ayisificamunwemunye lamatshumi ayisithupha lesificamunwemunye; wasesifa.

²⁸ULameki wasephila iminyaka elikhulu lamatshumi ayisificaminwembili lambili, wazala indodana.

²⁹Wasebiza ibizo layo wathi nguNowa esithi: Lo uzasiduduza ekusebenzeni kwethu lekutshikatshikeni kwezandla zethu, ngenxa yomhlabathi, ewuqalekisileyo i Nkosi.

³⁰ULameki wasephila, esezele uNowa, iminyaka engamakhulu amahlanu lamatshumi ayisificamunwemunye lanhlanu; wazala amadodana lamadodakazi.

³¹Zonke-ke insuku zikaLameki zaziyiminyaka engamakhulu ayisikhombisa lamatshumi ayisikhombisa lesikhombisa; wasesifa.

³²UNowa waba leminyaka engamakhulu amahlanu, uNowa wasezala uShemu loHamu loJafethi.