Read Ndebele-IBhayibhili Elingcwele 2006 Ugenesisi 9 Bible Online

Ugenesisi 9 - Ndebele-IBhayibhili Elingcwele 2006 bible

Ugenesisi 9

¹UNkulunkulu wasebusisa uNowa lamadodana akhe, wathi kibo: Zalani lande ligcwalise umhlaba.

²Lokwesatshwa kwenu lokuqhuqhwa kwenu kuzakuba phezu kwayo yonke inyamazana yomhlaba laphezu kwayo yonke inyoni yamazulu; kukho konke okuhamba emhlabeni lakuzo zonke inhlanzi zolwandle; zinikelwe ezandleni zenu.

³Konke okuhambayo okuphilayo kuzakuba yikudla kini; njengombhida oluhlaza ngilinikile konke.

⁴Kodwa inyama lempilo yayo, igazi layo, kalisoze likudle.

⁵Njalo sibili, igazi lenu, elempilo yenu, ngizalibiza; esandleni sayo yonke inyamazana ngizalibiza; lesandleni somuntu, lesandleni somfowabo womunye lomunye ngizabiza umphefumulo womuntu.

⁶Ochitha igazi lomuntu, ngomuntu lizachithwa igazi lakhe; ngoba ngomfanekiso kaNkulunkulu wamenza umuntu.

⁷Ngakho lina, zalani, lande, lizale ngokwengezelelweyo emhlabeni, lande kuwo.

⁸UNkulunkulu wasekhuluma kuNowa lakumadodana akhe kanye laye, esithi:

⁹Mina-ke, khangelani, ngiyamisa isivumelwano sami lani lenzalo yenu emva kwenu,

¹⁰laso sonke isidalwa esiphilayo esilani, esenyoni lesesifuyo, lesayo yonke inyamazana yomhlaba lani; kusukela kubo bonke abaphume emkhunjini, kusiya kuyo yonke inyamazana yomhlaba.

¹¹Njalo ngizamisa isivumelwano sami lani; njalo kakusayikubhujiswa yonke inyama ngamanzi kazamcolo; ukuze kungasabi khona uzamcolo ukubhubhisa umhlaba.

¹²UNkulunkulu wasesithi: Lokhu kuyisibonakaliso sesivumelwano engisinika phakathi kwami lani laso sonke isidalwa esiphilayo esilani, kuze kube yizizukulwana laphakade.

¹³Ngizabeka idandili lami emayezini; lizakuba yisibonakaliso sesivumelwano phakathi kwami lomhlaba.

¹⁴Kuzakuthi nxa ngibuyisa amayezi phezu komhlaba, idandili lizabonwa eyezini;

¹⁵khona ngizakhumbula isivumelwano sami, esiphakathi kwami lani laso sonke isidalwa esiphilayo sayo yonke inyama; lamanzi kawasayikuba nguzamcolo ukubhubhisa yonke inyama.

¹⁶Ledandili lizakuba semayezini, njalo ngizalibona ukukhumbula isivumelwano esilaphakade phakathi kukaNkulunkulu laso sonke isidalwa esiphilayo, sayo yonke inyama esemhlabeni.

¹⁷UNkulunkulu wasesithi kuNowa: Lokhu kuyisibonakaliso sesivumelwano engisimise phakathi kwami layo yonke inyama esemhlabeni.

¹⁸Amadodana kaNowa aphumayo-ke emkhunjini ayengoShemu loHamu loJafethi; njalo uHamu nguyise kaKhanani.

¹⁹Laba bobathathu ngamadodana kaNowa; lomhlaba wonke wasatshalaliswa ngokuvela kubo.

²⁰UNowa waseqala ukuba ngumlimi, wahlanyela isivini.

²¹Wasenatha okwewayini, wadakwa; njalo waba nqunu phakathi kwethente lakhe.

²²UHamu, uyise kaKhanani, wasebona ubunqunu bukayise, wasetshela abafowabo ababili phandle.

²³OShemu loJafethi basebethatha isembatho, basibeka emahlombe abo bobabili, bahamba nyovane, bagubuzela ubunqunu bukayise; lobuso babo babusemuva ukuze bangaboni ubunqunu bukayise.

²⁴UNowa wasevuka ewayinini lakhe, wasesizwa lokho indodana yakhe encinyane ekwenze kuye.

²⁵Wasesithi: Kaqalekiswe uKhanani, uzakuba yisigqili sezigqili kubafowabo.

²⁶Wasesithi: Ibusisiwe i Nkosi uNkulunkulu kaShemu, loKhanani abe yisigqili sakhe.

²⁷UNkulunkulu amqhelise uJafethi, njalo ahlale emathenteni kaShemu, loKhanani abe yisigqili sakhe.

²⁸Emva kukazamcolo uNowa wasephila iminyaka engamakhulu amathathu lamatshumi amahlanu.

²⁹Zonke-ke insuku zikaNowa zaba yiminyaka engamakhulu ayisificamunwemunye lamatshumi amahlanu; wasesifa.