Read Ndebele-IBhayibhili Elingcwele 2006 2 Usamyela 6 Bible Online

2 Usamyela 6 - Ndebele-IBhayibhili Elingcwele 2006 bible

2 Usamyela 6

¹UDavida wabuya wabuthanisa bonke abakhethiweyo koIsrayeli, inkulungwane ezingamatshumi amathathu.

²UDavida wasesukuma wahamba labo bonke abantu ababelaye, besuka eBahala-Juda ukuze benyuse umtshokotsho kaNkulunkulu usuka lapho, obizo lawo libizwa ngebizo le Nkosi yamabandla, ehlala phakathi kwamakherubi*.

³Basebewukhweza umtshokotsho kaNkulunkulu enqoleni entsha, bewukhupha endlini kaAbinadaba eyayiseqaqeni; njalo uUza loAhiyo amadodana kaAbinadaba batshayela leyonqola entsha.

⁴Bayikhipha-ke endlini kaAbinadaba eyayiseqaqeni kanye lomtshokotsho kaNkulunkulu, njalo uAhiyo ehamba phambi komtshokotsho.

⁵UDavida lendlu yonke yakoIsrayeli basebetshaya phambi kwe Nkosi ngazo zonke izinto zokutshaya zesihlahla sefiri*, langamachacho, langezigubhu zezintambo, langezigujana, langamahlwayi, langezinsimbi ezincencethayo.

⁶Bathi befika esizeni sikaNakoni, uUza welulela isandla sakhe emtshokotshweni kaNkulunkulu, wawubamba, ngoba inkabi zakhubeka.

⁷Intukuthelo ye Nkosi yasimvuthela uUza; uNkulunkulu wamtshaya khonapho ngenxa yalesisiphambeko; wasefela khonapho phansi komtshokotsho kaNkulunkulu.

⁸UDavida wasekhathazeka ngoba i Nkosi imenzele isikhala uUza; waseyibiza leyondawo ngokuthi yiPerezi-Uza, kuze kube lamuhla.

⁹UDavida waseyesaba i Nkosi ngalolosuku, wathi: Umtshokotsho we Nkosi uzakuza njani kimi?

¹⁰Ngakho uDavida kavumanga ukuwudlulisela kuye umtshokotsho we Nkosi emzini kaDavida; kodwa uDavida wawuphambulela endlini kaObedi-Edoma umGithi.

¹¹Umtshokotsho we Nkosi wasuhlala endlini kaObedi-Edoma umGithi inyanga ezintathu. I Nkosi yasimbusisa uObedi-Edoma lendlu yakhe yonke.

¹²Kwasekubikelwa inkosi uDavida kwathiwa: I Nkosi ibusisile indlu kaObedi-Edoma lakho konke okwakhe ngenxa yomtshokotsho kaNkulunkulu. Ngakho uDavida wasehamba wenyusa umtshokotsho kaNkulunkulu ewususa endlini kaObedi-Edoma, ewusa emzini kaDavida ngentokozo.

¹³Kwasekusithi lapho labo abathwele umtshokotsho we Nkosi sebehambe izinyathelo eziyisithupha, wahlaba inkabi lokunonisiweyo.

¹⁴UDavida wasegida ngamandla wonke phambi kwe Nkosi; uDavida wayebhince i-efodi* yelembu elicolekileyo.

¹⁵Ngokunjalo uDavida lendlu yonke yakoIsrayeli bawenyusa umtshokotsho we Nkosi ngokumemeza langokukhala kophondo.

¹⁶Kwasekusithi lapho umtshokotsho we Nkosi ungena emzini kaDavida, uMikhali indodakazi kaSawuli walunguza ngewindi, wabona inkosi uDavida iseqa igida phambi kwe Nkosi, wayeyisa enhliziyweni yakhe.

¹⁷Basebewungenisa umtshokotsho we Nkosi, bawubeka endaweni yawo phakathi kwethente uDavida ayelimisele wona; uDavida wasenikela iminikelo yokutshiswa phambi kwe Nkosi leminikelo yokuthula.

¹⁸Kwathi uDavida eseqedile ukunikela iminikelo yokutshiswa leminikelo yokuthula, wabusisa abantu ebizweni le Nkosi yamabandla.

¹⁹Wababela bonke abantu, ixuku lonke lakoIsrayeli, kusukela kwabesilisa kusiya kwabesifazana, ngulowo lalowo iqebelengwana lesinkwa, leqatha lenyama, lesinkwa sezithelo zevini ezonyisiweyo. Basebehamba abantu bonke, ngulowo lalowo emzini wakhe.

²⁰UDavida wasebuyela ukubusisa indlu yakhe. UMikhali indodakazi kaSawuli wasephuma ukuhlangabeza uDavida, wathi: Idunyiswe kangakanani inkosi yakoIsrayeli lamuhla, ezembule lamuhla phambi kwamehlo encekukazi zenceku zayo njengomunye wabayize ezembula lokuzembula !

²¹UDavida wasesithi kuMikhali: Ngaphambi kwe Nkosi, eyangikhetha phambi kukayihlo laphambi kwendlu yakhe yonke, yangimisa ukuthi ngibe ngumbusi phezu kwabantu be Nkosi, phezu kukaIsrayeli; isibili ngizadlala phambi kwe Nkosi.

²²Ngisazadeleleka-ke kakhulu kulalokhu, ngehliselwe phansi emehlweni ami; kodwa ngezincekukazi okhulume ngazo, ngizadunyiswa yizo.

²³Njalo uMikhali indodakazi kaSawuli kabanga lamntwana kwaze kwaba lusuku lokufa kwakhe.