Read Ndebele-IBhayibhili Elingcwele 2006 1 Amakhosi 10 Bible Online

1 Amakhosi 10 - Ndebele-IBhayibhili Elingcwele 2006 bible

1 Amakhosi 10

¹Kwathi indlovukazi yeShebha isizwile umbiko ngoSolomoni ngebizo le Nkosi yeza ukumhlola ngemibuzo enzima.

²Yasifika eJerusalema lodwendwe olunzima kakhulu, lamakamela ethwele amakha legolide elinengi kakhulu lamatshe aligugu; isifikile kuSolomoni yamtshela konke okwakusenhliziyweni yayo.

³USolomoni waseyichasisela zonke indaba zayo; kwakungelalutho olwayicatshelayo inkosi engayichasiselanga lona.

⁴Indlovukazi yeShebha isibonile yonke inhlakanipho kaSolomoni, lendlu ayeyakhile,

⁵lokudla kwetafula lakhe, lokuhlala kwenceku zakhe, lokuma kwezisebenzi zakhe, lezigqoko zazo, labaphathinkezo bakhe, lokwenyuka kwakhe enyuka ngakho endlini ye Nkosi, kakusabanga lamoya kuyo.

⁶Yasisithi enkosini: Umbiko wawuliqiniso engawuzwa elizweni lami ngendaba zakho langenhlakanipho yakho.

⁷Kodwa kangiyikholwanga leyomibiko ngaze ngafika lamehlo ami abona. Khangela, bengingatshelwanga ingxenye eyodwa kwezimbili; wengezelele inhlakanipho lokulunga embikweni engiwuzwileyo.

⁸Bayathokoza abantu bakho, ziyathokoza lezizinceku zakho ezimi njalo phambi kwakho zisizwa inhlakanipho yakho !

⁹Kayibusiswe i Nkosi uNkulunkulu wakho eyathokoza ngawe, ukukubeka phezu kwesihlalo sobukhosi sikaIsrayeli. Ngoba i Nkosi yamthanda uIsrayeli kuze kube phakade, ngakho ikubekile waba yinkosi ukuze wenze isahlulelo lokulunga.

¹⁰Yasinika inkosi amathalenta* alikhulu lamatshumi amabili egolide, lamakha amanengi kakhulu, lamatshe aligugu. Kakuzange kusabuya amakha ngobunengi njengalawo indlovukazi yeShebha eyawanika inkosi uSolomoni.

¹¹Futhi lemikhumbi kaHiramu eyayithwala igolide livela eOfiri yaletha izigodo ezinengi kakhulu zomkampa, lamatshe aligugu, kuvela eOfiri.

¹²Ngezigodo zomkampa inkosi yasisenza insika zendlu kaJehova lezendlu yenkosi, lamachacho lezigubhu zezintambo abahlabeleli; kakuzanga kulethwe kumbe kubonwe ngokunjalo izigodo zomkampa kuze kube lamuhla.

¹³Inkosi uSolomoni yasinika indlovukazi yeShebha sonke isiloyiso sayo, eyakucelayo, ngaphandle kwalokho eyayinika khona njengokwamandla enkosi uSolomoni. Yasiphenduka yaya elizweni layo, yona lenceku zayo.

¹⁴Njalo isisindo segolide elalifika kuSolomoni ngomnyaka owodwa sasingamathalenta* angamakhulu ayisithupha lamatshumi ayisithupha lesithupha,

¹⁵ngaphandle kokuvela kubathengisi, lempahleni zabathengisi, lemakhosini wonke eArabhiya, lakubabusi belizwe.

¹⁶Inkosi uSolomoni yasisenza izihlangu ezinkulu ezingamakhulu amabili ngegolide elikhandiweyo, ng amashekeli angamakhulu ayisithupha egolide kusiya phezulu ngesihlangu esisodwa esikhulu.

¹⁷Lamahawu angamakhulu amathathu egolide elikhandiweyo; amamane* amathathu egolide aya ehawini elilodwa. Inkosi yasiwafaka endlini yegusu leLebhanoni.

¹⁸Inkosi yenza lesihlalo sobukhosi esikhulu ngempondo zendlovu, yasihuqa ngegolide elicwengekileyo.

¹⁹Isihlalo sobukhosi sasilezikhwelo eziyisithupha, lesihloko sesihlalo sobukhosi sasiyisigombolozi emuva, lezeyamelo zengalo ngapha langapha kuze kube sendaweni yokuhlala, lezilwane ezimbili zimi eceleni kwezeyamelo zezingalo.

²⁰Lezilwane ezilitshumi lambili zazimi lapho ezikhwelweni eziyisithupha, ngapha langapha. Kakwenziwanga okunjalo kuwo wonke umbuso.

²¹Lazo zonke inkezo zokunatha zenkosi uSolomoni zazingezegolide, lazo zonke izitsha zendlu yegusu leLebhanoni zazingezegolide elicwengekileyo; kwakungelasiliva, lalingabalwa santo ensukwini zikaSolomoni.

²²Ngoba inkosi yayilemikhumbi yeTharshishi olwandle kanye lemikhumbi kaHiramu; kanye ngeminyaka emithathu limikhumbi yeTharshishi yeza ithwele igolide lesiliva, impondo zezindlovu lezinkawu lamaphigaga.

²³Ngakho inkosi uSolomoni yaba nkulu kulawo wonke amakhosi omhlaba enothweni lenhlakaniphweni.

²⁴Umhlaba wonke wasudinga ubuso bukaSolomoni ukuzwa inhlakanipho yakhe uNkulunkulu ayeyinike enhliziyweni yakhe.

²⁵Basebeletha, ngulowo isipho sakhe, izitsha zesiliva, lezitsha zegolide, lezembatho, lezikhali, lamakha, amabhiza, lezimbongolo; into yomnyaka ngomnyaka wayo.

²⁶USolomoni wasebuthanisa izinqola labagadi bamabhiza; wayelezinqola ezingamakhulu alitshumi lane, labagadi bamabhiza abazinkulungwane ezilitshumi lambili; wakubeka emizini yezinqola njalo kulenkosi eJerusalema.

²⁷Inkosi yasisenza isiliva eJerusalema laba njengamatshe, lemisedari wayenza yaba njengemikhiwa yesikhamore esesihotsheni, ngobunengi.

²⁸Lokukhutshwa kwamabhiza uSolomoni ayelawo evela eGibhithe lavela eKowa; abathengi benkosi babewathatha eKowa ngentengo.

²⁹Inqola yasisenyuka yaphuma eGibhithe nga mashekeli esiliva angamakhulu ayisithupha, lebhiza ngekhulu lamatshumi amahlanu. Langokunjalo ba wa khuphela wonke amakhosi amaHethi lamakhosi eSiriya ngesandla sabo.