Read Ndebele-IBhayibhili Elingcwele 2006 1 Amakhosi 15 Bible Online

1 Amakhosi 15 - Ndebele-IBhayibhili Elingcwele 2006 bible

1 Amakhosi 15

¹Ngomnyaka wetshumi lesificaminwembili wenkosi uJerobowamu indodana kaNebati uAbhiyamu wasesiba yinkosi phezu kukaJuda.

²Wabusa iminyaka emithathu eJerusalema. Lebizo likanina lalinguMahaka indodakazi kaAbishalomu.

³Wasehamba ezonweni zonke zikayise ayezenze phambi kwakhe, lenhliziyo yakhe yayingaphelelanga kuJehova uNkulunkulu wakhe, njengenhliziyo kaDavida uyise.

⁴Kodwa ngenxa kaDavida i Nkosi uNkulunkulu wakhe yamnika isibane eJerusalema, ngokubeka indodana yakhe emva kwakhe, langokuqinisa iJerusalema.

⁵Ngoba uDavida wenza okulungileyo emehlweni e Nkosi, kaphambukanga kukho konke eyamlaya khona insuku zonke zempilo yakhe, ngaphandle kwedabeni lukaUriya umHethi.

⁶Kwakukhona-ke impi phakathi kukaRehobowamu loJerobowamu zonke izinsuku zempilo yakhe.

⁷Ezinye-ke zezindaba zikaAbhiyamu, lakho konke akwenzayo, kakubhalwanga yini egwalweni lwemilando yamakhosi akoJuda? Njalo kwaba lempi phakathi kukaAbhiyamu loJerobowamu.

⁸UAbhiyamu waselala laboyise, bamngcwabela emzini kaDavida. UAsa indodana yakhe wasesiba yinkosi esikhundleni sakhe.

⁹Ngomnyaka wamatshumi amabili kaJerobowamu inkosi yakoIsrayeli uAsa wasesiba yinkosi yakoJuda.

¹⁰Wasebusa iminyaka engamatshumi amane lanye eJerusalema. Lebizo likanina lalinguMahaka indodakazi kaAbishalomu.

¹¹UAsa wasesenza okulungileyo emehlweni e Nkosi njengoDavida uyise.

¹²Wasusa izinkotshana elizweni, wasusa zonke izithombe oyise ababezenzile.

¹³Laye-ke uMahaka unina wamsusa ekubeni yindlovukazi, ngoba wayenzele isixuku into enengekayo; uAsa waseyigamula into yakhe enengekayo, wayitshisela esifuleni iKidroni.

¹⁴Kanti indawo eziphakemeyo kazisuswanga; lanxa kunjalo inhliziyo kaAsa yayiphelele kuJehova insuku zakhe zonke.

¹⁵Wasengenisa izinto ezehlukanisiweyo zikayise kanye lezakhe izinto ezehlukanisiweyo endlini ye Nkosi, isiliva legolide lezitsha.

¹⁶Kwakukhona-ke impi phakathi kukaAsa loBahasha inkosi yakoIsrayeli zonke izinsuku zabo.

¹⁷UBahasha inkosi yakoIsrayeli wasesenyuka wamelana loJuda, wakha iRama, ukuze angavumeli muntu ukuphuma lokungena kuAsa inkosi yakoJuda.

¹⁸UAsa wasethatha sonke isiliva legolide okwakusele emagugwini endlu kaJehova lamagugu endlu yenkosi, wakunikela esandleni senceku zakhe; inkosi uAsa yakuthumela kuBenihadadi indodana kaTabirimoni indodana kaHeziyoni, inkosi yeSiriya, owayehlala eDamaseko, esithi:

¹⁹Kulesivumelwano phakathi kwami lawe, phakathi kukababa loyihlo; khangela, ngikuthumezela isipho, isiliva legolide. Hamba, yephula isivumelwano sakho loBahasha inkosi yakoIsrayeli, ukuze enyuke asuke kimi.

²⁰UBenihadadi waseyilalela inkosi uAsa, wathuma induna zamabutho ayelawo emelene lemizi yakoIsrayeli, watshaya iIjoni leDani leAbeli-Beti-Mahaka layo yonke iKinerothi lelizwe lonke lakoNafithali.

²¹Kwasekusithi uBahasha e ku zwa wayekela ukwakha iRama, wahlala eTiriza.

²²Inkosi uAsa yasisenza isimemezelo kuyo yonke iJuda; kakho owayetshiywe ngaphandle; ukuze basuse amatshe eRama lezigodo zayo, uBahasha ayesakha ngakho. Inkosi uAsa wasesakha ngakho iGeba yakoBhenjamini leMizipa.

²³Ezinye-ke zazo zonke indaba zikaAsa, lawo wonke amandla akhe, lakho konke akwenzayo, lemizi ayakhayo, kakubhalwanga yini egwalweni lwemilando yamakhosi akoJuda? Kodwa esikhathini sobudala bakhe wayelomkhuhlane ezinyaweni.

²⁴UAsa waselala laboyise, wangcwatshelwa kuboyise emzini kaDavida uyise. UJehoshafathi indodana yakhe wasesiba yinkosi esikhundleni sakhe.

²⁵UNadabi indodana kaJerobowamu wasesiba yinkosi phezu kukaIsrayeli ngomnyaka wesibili kaAsa inkosi yakoJuda; wabusa phezu kukaIsrayeli iminyaka emibili.

²⁶Wasesenza okubi emehlweni e Nkosi, wahamba ngendlela kayise, lesonweni sakhe, enza uIsrayeli one ngaso.

²⁷UBahasha indodana kaAhiya, owendlu kaIsakari, wasemenzela ugobe; uBahasha wamtshaya eGibethoni engeyamaFilisti, lapho uNadabi loIsrayeli wonke bevimbezele iGibethoni.

²⁸UBahasha wambulala-ke ngomnyaka wesithathu kaAsa inkosi yakoJuda, wasesiba yinkosi esikhundleni sakhe.

²⁹Kwasekusithi ekubuseni kwakhe watshaya yonke indlu kaJerobowamu, katshiyanga loyedwa ophefumulayo kuJerobowamu, waze wamqeda, njengelizwi le Nkosi eyalikhuluma ngesandla senceku yayo uAhiya umShilo.

³⁰Ngenxa yezono zikaJerobowamu azonayo, lowenza uIsrayeli azone, ngentukuthelo yakhe athukuthelisa ngayo i Nkosi, uNkulunkulu kaIsrayeli.

³¹Ezinye-ke zezindaba zikaNadabi, lakho konke akwenzayo, kakubhalwanga yini egwalweni lwemilando yamakhosi akoIsrayeli?

³²Njalo kwakulempi phakathi kukaAsa loBahasha inkosi yakoIsrayeli insuku zabo zonke.

³³Ngomnyaka wesithathu kaAsa inkosi yakoJuda uBahasha indodana kaAhiya waba yinkosi phezu kukaIsrayeli wonke eTiriza; iminyaka engamatshumi amabili lane.

³⁴Wasesenza okubi emehlweni e Nkosi, wahamba ngendlela kaJerobowamu, lesonweni sakhe, enza uIsrayeli one ngaso.