Read Ndebele-IBhayibhili Elingcwele 2006 1 Amakhosi 16 Bible Online

1 Amakhosi 16 - Ndebele-IBhayibhili Elingcwele 2006 bible

1 Amakhosi 16

¹Ilizwi le Nkosi laselifika kuJehu indodana kaHanani limelene loBahasha lisithi:

²Ngenxa yokuthi ngakuphakamisa ethulini, ngakwenza umphathi phezu kwabantu bami uIsrayeli, kodwa uhambe ngendlela zikaJerobowamu, wenza ukuthi abantu bami uIsrayeli bone, ukungithukuthelisa ngezono zabo;

³khangela, ngizaqothula inzalo kaBahasha lenzalo yendlu yakhe, ngenze indlu yakho njengendlu kaJerobowamu indodana kaNebati.

⁴Ofayo kaBahasha phakathi komuzi izinja zizamudla, lowakhe ofela egangeni inyoni zamazulu zizamudla.

⁵Ezinye-ke zezindaba zikaBahasha lakwenzayo lamandla akhe, kakubhalwanga yini egwalweni lwemilando yamakhosi akoIsrayeli?

⁶UBahasha waselala laboyise, wangcwatshelwa eTiriza. UEla indodana yakhe wasesiba yinkosi esikhundleni sakhe.

⁷Njalo ngesandla sikaJehu umprofethi indodana kaHanani ilizwi le Nkosi lafika limelene loBahasha njalo limelelene lendlu yakhe, langenxa yabo bonke ububi abenza emehlweni e Nkosi, ukuyithukuthelisa ngomsebenzi wezandla zakhe, ukuba njengendlu kaJerobowamu, langenxa yokuthi wambulala.

⁸Ngomnyaka wamatshumi amabili lesithupha kaAsa inkosi yakoJuda uEla indodana kaBahasha waba yinkosi phezu kukaIsrayeli eTiriza, iminyaka emibili.

⁹Kodwa inceku yakhe uZimri, induna yengxenye eyodwa kwezimbili yezinqola, yamenzela ugobe, eseTiriza enathe wadakwa endlini kaAriza, umphathi wendlu eTiriza.

¹⁰UZimri wasengena wamtshaya wambulala ngomnyaka wamatshumi amabili lesikhombisa kaAsa inkosi yakoJuda, waba yinkosi esikhundleni sakhe.

¹¹Kwasekusithi esebe yinkosi ekuhlaleni kwakhe esihlalweni sakhe sobukhosi wayitshaya indlu yonke kaBahasha; kamtshiyelanga ochamela emdulini, loba izihlobo zakhe, kumbe abangane bakhe.

¹²Ngakho uZimri wayichitha indlu yonke kaBahasha, njengokwelizwi le Nkosi eyalikhuluma imelene loBahasha ngesandla sikaJehu umprofethi,

¹³ngenxa yazo zonke izono zikaBahasha lezono zikaEla indodana yakhe, abona ngazo, labenza ngazo uIsrayeli ukuthi one, ukuthukuthelisa i Nkosi uNkulunkulu kaIsrayeli ngezinto zabo eziyize.

¹⁴Ezinye-ke zezindaba zikaEla, lakho konke akwenzayo, kakubhalwanga yini egwalweni lwemilando yamakhosi akoIsrayeli?

¹⁵Ngomnyaka wamatshumi amabili lesikhombisa kaAsa inkosi yakoJuda uZimri wabusa insuku eziyisikhombisa eTiriza. Abantu babemise-ke inkamba bemelene leGibethoni eyayingeyamaFilisti.

¹⁶Abantu-ke ababemise inkamba bezwa ukuthi: UZimri wenzile ugobe futhi watshaya inkosi. Ngakho uIsrayeli wonke wabeka uOmri induna yebutho ukuba yinkosi phezu kukaIsrayeli mhlalokho enkambeni.

¹⁷U-Omri loIsrayeli wonke kanye laye basebesenyuka besuka eGibethoni, bavimbezela iTiriza.

¹⁸Kwasekusithi uZimri esebonile ukuthi umuzi usuthunjiwe, wangena esigodlweni sendlu yenkosi, watshisa indlu yenkosi phezu kwakhe ngomlilo, wafa.

¹⁹Ngenxa yezono zakhe azonayo, ngokwenza okubi emehlweni e Nkosi, ngokuhamba ngendlela kaJerobowamu lesonweni sakhe asenzayo, ukwenza uIsrayeli ukuthi one.

²⁰Ezinye-ke zezindaba zikaZimri, logobe lwakhe alwenzayo, kakubhalwanga yini egwalweni lwemilando yamakhosi akoIsrayeli?

²¹Khona abantu bakoIsrayeli badabukana baba zingxenye ezimbili; ingxenye eyodwa kwezimbili yabantu yalandela uTibini indodana kaGinathi ukuze bamenze inkosi, lengxenye eyodwa kwezimbili yalandela uOmri.

²²Kodwa abantu abalandela uOmri babehlula abantu abalandela uTibini indodana kaGinathi; ngakho uTibini wafa, uOmri wasebusa.

²³Ngomnyaka wamatshumi amathathu lanye kaAsa inkosi yakoJuda uOmri waba yinkosi phezu kukaIsrayeli; iminyaka elitshumi lambili; eTiriza wabusa iminyaka eyisithupha.

²⁴Wathenga intaba yeSamariya kuShemeri ngamathalenta* esiliva amabili, wakha entabeni, wabiza ibizo lomuzi awakhayo ngebizo likaShemeri umnikazi wentaba, wathi yiSamariya.

²⁵Kodwa uOmri wenza okubi emehlweni e Nkosi, wenza okubi okwedlula bonke ababengaphambi kwakhe.

²⁶Ngoba wahamba ngayo yonke indlela kaJerobowamu indodana kaNebati, lesonweni sakhe, enza ngaso ukuthi uIsrayeli one, ukuyithukuthelisa i Nkosi uNkulunkulu kaIsrayeli ngezinto zabo eziyize.

²⁷Ezinye-ke zezindaba zikaOmri azenzayo lamandla akhe awenzayo, kakubhalwanga yini egwalweni lwemilando yamakhosi akoIsrayeli?

²⁸U-Omri waselala laboyise, wangcwatshelwa eSamariya. UAhabi indodana yakhe wasesiba yinkosi esikhundleni sakhe.

²⁹UAhabi indodana kaOmri wasesiba yinkosi phezu kukaIsrayeli ngomnyaka wamatshumi amathathu lesificaminwembili kaAsa inkosi yakoJuda; uAhabi indodana kaOmri wabusa phezu kukaIsrayeli eSamariya iminyaka engamatshumi amabili lambili.

³⁰UAhabi indodana kaOmri wasesenza okubi emehlweni e Nkosi okwedlula bonke ababekhona phambi kwakhe.

³¹Kwasekusithi, kungathi kuyinto elula ukuhamba ezonweni zikaJerobowamu indodana kaNebati, wathatha uJezebeli indodakazi kaEthibali inkosi yamaSidoni waba ngumka khe. Wasehamba wakhonza uBhali, wamkhothamela.

³²Wasemisela uBhali ilathi endlini kaBhali ayeyakhile eSamariya.

³³UAhabi wasesenza isixuku. UAhabi wenza okwengezelelweyo ukuyithukuthelisa i Nkosi uNkulunkulu kaIsrayeli, kulawo wonke amakhosi akoIsrayeli ayengaphambi kwakhe.

³⁴Ensukwini zakhe uHiyeli umBhetheli wakha iJeriko; wabeka isisekelo sayo ngoAbiramu izibulo lakhe, wamisa amasango ayo ngoSegubi icinathunjana lakhe, njengokwelizwi le Nkosi eyalikhuluma ngesandla sikaJoshuwa indodana kaNuni.