Read Ndebele-IBhayibhili Elingcwele 2006 1 Amakhosi 6 Bible Online

1 Amakhosi 6 - Ndebele-IBhayibhili Elingcwele 2006 bible

1 Amakhosi 6

¹Kwasekusithi ngomnyaka wamakhulu amane lamatshumi ayisificaminwembili emva kokuphuma kwabantwana bakoIsrayeli elizweni leGibhithe, ngomnyaka wesine wokubusa kukaSolomoni koIsrayeli, ngenyanga kaZivi, eyinyanga yesibili, waqala ukwakha indlu ye Nkosi.

²Njalo indlu inkosi uSolomoni eyayakhela uJehova, ubude bayo babuzingalo ezingamatshumi ayisithupha, lobubanzi bayo babungamatshumi amabili, lokuphakama kwayo kwakuzingalo ezingamatshumi amathathu.

³Lekhulusi phambi kwethempeli lendlu, ubude balo babuzingalo ezingamatshumi amabili, njengobubanzi bendlu, ububanzi balo babuzingalo ezilitshumi phambi kwendlu.

⁴Njalo wayenzela indlu amawindi abanzi ngaphandle kulangaphakathi.

⁵Futhi emdulini wendlu wakha amakamelo inhlangothi zonke, imiduli yendlu inhlangothi zonke, esenzela ithempeli lendawo yelizwi. Wenza lezindlwana eziseceleni inhlangothi zonke.

⁶Ikamelo elingaphansi kwawo wonke, ububanzi balo babuzingalo ezinhlanu, leliphakathi, ububanzi balo buzingalo eziyisithupha, lelesithathu, ububanzi balo buzingalo eziyisikhombisa. Ngoba ngaphandle kwendlu wenza izinciphiso inhlangothi zonke, ukuze imijabo ingagxunyekwa emidulini yendlu.

⁷Njalo indlu, isakhiwa, yakhiwa ngamatshe ayepheleliswe enkwalini, ukuze kungezwakali isando lehloka, loba yisiphi isikhali sensimbi endlini nxa isakhiwa.

⁸Umnyango wendlwana eseceleni ephakathi wawusehlangothini lwesokunene lwendlu; njalo bakhwela ngesikhwelo esibhodayo ukuya kwengaphakathi, lokusuka kwengaphakathi kusiya kweyesithathu.

⁹Wayakha-ke indlu, wayiqeda; wagubuzela indlu ngentungo lamapulanka emisedari.

¹⁰Wasesakha izindlwana eceleni kwendlu yonke, ubude bazo buzingalo ezinhlanu, wakuxhuma endlini ngezigodo zemisedari.

¹¹Ilizwi le Nkosi laselifika kuSolomoni lathi:

¹²Mayelana la le indlu oyakhayo, uba uhamba ngezimiso zami, usenza izahlulelo zami, njalo ugcina yonke imilayo yami ukuhamba ngayo, ngizaqinisa ilizwi lami kuwe engalikhuluma kuDavida uyihlo;

¹³ngizahlala phakathi kwabantwana bakoIsrayeli, ngingabatshiyi abantu bami uIsrayeli.

¹⁴Wayakha-ke uSolomoni indlu, wayiqeda.

¹⁵Wasesakha imiduli yendlu ngaphakathi ngamapulanka emisedari, kusukela kuphansi lendlu kuze kufike emidulini yophahla, wayembesa ngaphakathi ngezigodo, wendlala iphansi lendlu ngamapulanka amafiri.

¹⁶Wasesakha izingalo ezingamatshumi amabili emaceleni endlu, ngamapulanka emisedari, kusukela kuphansi kwaze kwafika emidulini; wayakhela ngaphakathi, esenzela indawo yelizwi, esenzela ingcwele yezingcwele.

¹⁷Lendlu, elithempeli, ngaphambili, yayizingalo ezingamatshumi amane.

¹⁸Njalo umsedari wendlu ngaphakathi wawubazwe waba zinduku lamaluba avulekileyo; konke kwakungumsedari, kungabonakali litshe.

¹⁹Waselungisa indawo yelizwi phakathi endlini ukubeka khona umtshokotsho wesivumelwano se Nkosi.

²⁰Lendawo yelizwi ephambili, ubude babuzingalo ezingamatshumi amabili, lobubanzi buzingalo ezingamatshumi amabili, lokuphakama kwayo kuzingalo ezingamatshumi amabili; wayihuqa ngegolide elicwengekileyo; wasesembesa ilathi lo msedari.

²¹USolomoni waseyihuqa indlu ngaphakathi ngegolide elicwengekileyo, wenza isehlukaniso ngamaketane egolide phambi kwendawo yelizwi, wasesihuqa ngegolide.

²²Lendlu yonke wayihuqa ngegolide yaze yaphelela yonke indlu; lelathi lonke elisendaweni yelizwi walihuqa ngegolide.

²³Endaweni yelizwi wasesenza amakherubi* amabili ngesihlahla somhlwathi, ukuphakama kwakuzingalo ezilitshumi ngalinye.

²⁴Olunye uphiko lwekherubi lwaluzingalo ezinhlanu, lolunye uphiko lwekherubi lwaluzingalo ezinhlanu; kusukela ekucineni ko lunye uphiko kusiya ekucineni ko lunye uphiko kwakuzingalo ezilitshumi.

²⁵Lelinye ikherubhi lalizingalo ezilitshumi; womabili amakherubi ayeyisilinganiso sinye lesimo sinye.

²⁶Ukuphakama kwelinye ikherubhi kwakuzingalo ezilitshumi, lelinye ikherubhi lalinjalo.

²⁷Wasewabeka amakherubi phakathi kwendlu engaphakathi; njalo amakherubi elula impiko, kuze kuthi olunye uphiko lwathinta umduli, lophiko lwelinye ikherubhi lwathinta omunye umduli, lempiko zawo zathintana uphiko lophiko ngaphakathi kwendlu.

²⁸Wasewahuqa amakherubi ngegolide.

²⁹Wabaza imiduli yonke yendlu inhlangothi zonke ngemifanekiso ebaziweyo yamakherubi lezihlahla zamalala lamaluba avulekileyo ngaphakathi langaphandle.

³⁰Iphansi lendlu waselihuqa ngegolide ngaphakathi langaphandle.

³¹Emnyango wendawo yelizwi wenza izivalo zesihlahla somhlwathi, ikhothamo le migubazi kulezinhlangothi ezinhlanu.

³²Lezivalo zombili zazingezesihlahla somhlwathi, wabaza kuzo imibazo yamakherubi lezihlahla zamalala lamaluba avulekileyo, wazihuqa ngegolide, wendlala igolide phezu kwamakherubi lezihlahla zamalala.

³³Ngokunjalo wasesenzela umnyango wethempeli imigubazi yesihlahla somhlwathi, ezinhlangothini ezine.

³⁴Lezivalo ezimbili zazingezezihlahla zamafiri; impiko zombili zesivalo esisodwa zazigoqeka, lezilenge ezimbili zesivalo sesibili zazigoqeka.

³⁵Wasebaza kuzo amakherubi lezihlahla zamalala lamaluba avulekileyo, wakuhuqa ngegolide elendlala kuhle phezu kokubaziweyo.

³⁶Wasesakha iguma elingaphakathi ngemizila emithathu yamatshe abaziweyo, lomzila wemijabo yemisedari.

³⁷Ngomnyaka wesine isisekelo sendlu ye Nkosi sabekwa, ngenyanga kaZivi.

³⁸Kwathi ngomnyaka wetshumi lanye, enyangeni kaBuli, okuyinyanga yesificaminwembili, yaphela indlu ezintweni zayo zonke lanjengakho konke ukumiswa kwayo. Ngakho wayakha iminyaka eyisikhombisa.