Read Ndebele-IBhayibhili Elingcwele 2006 2 Amakhosi 22 Bible Online

2 Amakhosi 22 - Ndebele-IBhayibhili Elingcwele 2006 bible

2 Amakhosi 22

¹UJosiya wayeleminyaka eyisificaminwembili lapho esiba yinkosi; wabusa iminyaka engamatshumi amathathu lanye eJerusalema. Lebizo likanina lalinguJedida indodakazi kaAdaya weBhozikhathi.

²Wasesenza okulungileyo emehlweni e Nkosi, wahamba ngayo yonke indlela kaDavida uyise, kaze aphambukela ngakwesokunene langakwesokhohlo.

³Kwasekusithi ngomnyaka wetshumi lesificaminwembili wenkosi uJosiya, inkosi yathuma uShafani indodana kaAzaliya indodana kaMeshulamu, umabhalane, endlini ye Nkosi, esithi:

⁴Yenyukela kuHilikhiya umpristi omkhulu ukuthi ahlanganise imali elethwe endlini ye Nkosi, abalindi bombundu womnyango ababeyiqoqe ebantwini.

⁵Kabayinikele esandleni sabenzi bomsebenzi abamiswe phezu kwendlu ye Nkosi, kabayinike abenzi bomsebenzi osendlini ye Nkosi, ukulungisa izikhala zendlu,

⁶kubabazi, lakubakhi, lakubabazi bamatshe, lokuthenga amapulanka lamatshe abaziweyo ukulungisa indlu.

⁷Kodwa akubalelwananga labo imali eyayinikelwe esandleni sabo ngoba benza ngokuthembeka.

⁸UHilikhiya umpristi omkhulu wasesithi kuShafani umabhalane: Sengifice ugwalo lomlayo endlini ye Nkosi. UHilikhiya wasenika uShafani ugwalo, waselufunda.

⁹UShafani umabhalane wasefika enkosini, wabuyisela ilizwi enkosini wathi: Izinceku zakho seziyithulule imali eficwe endlini, zayinikela esandleni sabenzi bomsebenzi abamiswe phezu kwendlu ye Nkosi.

¹⁰UShafani umabhalane wasebika enkosini esithi: UHilikhiya umpristi unginike ugwalo. UShafani waselufunda phambi kwenkosi.

¹¹Kwasekusithi inkosi isizwile amazwi ogwalo lomlayo, yadabula izigqoko zayo.

¹²Inkosi yasilaya uHilikhiya umpristi loAhikhamu indodana kaShafani loAkhibhori indodana kaMikhaya loShafani umabhalane loAsaya inceku yenkosi, isithi:

¹³Hambani liyengibuzela e Nkosi ni mina labantu loJuda wonke mayelana lamazwi alolugwalo oluficiweyo; ngoba yinkulu intukuthelo ye Nkosi esesiyibaselwe, ngoba obaba kabawalalelanga amazwi alolugwalo, ukwenza konke okubhaliweyo mayelana lathi.

¹⁴Ngakho uHilikhiya umpristi loAhikhamu loAkhibhori loShafani loAsaya baya kuHulida umprofethikazi umkaShaluma indodana kaTikiva indodana kaHarihasi, umgcini wezigqoko. Wayehlala-ke eJerusalema esigabeni sesibili. Basebekhuluma laye.

¹⁵Wasesithi kibo: Itsho njalo i Nkosi, uNkulunkulu kaIsrayeli: Mtsheleni lowomuntu olithume kimi:

¹⁶Itsho njalo i Nkosi: Khangela, ngizakwehlisela okubi kulindawo laphezu kwabakhileyo bayo, wonke amazwi ogwalo inkosi yakoJuda elufundileyo.

¹⁷Ngenxa yokuthi bangidelile, batshisela abanye onkulunkulu impepha, ukuze bangithukuthelise ngawo wonke umsebenzi wezandla zabo. Ngakho intukuthelo yami izabaselwa lindawo, ingacitshwa.

¹⁸Kodwa enkosini yakoJuda elithumileyo ukubuza e Nkosi ni, lizakutsho njalo kuyo: Itsho njalo i Nkosi, uNkulunkulu kaIsrayeli: Mayelana l amazwi eliwezwileyo:

¹⁹Ngoba inhliziyo yakho ibithambile, wazithoba phambi kwe Nkosi, lapho usizwa engikukhulume ngimelene lalindawo labakhileyo bayo, ukuthi bazakuba yincithakalo lesiqalekiso, wadabula izigqoko zakho, wakhala inyembezi phambi kwami, lami-ke ngizwile, kutsho i Nkosi.

²⁰Ngakho, khangela, ngizakubuthela kuboyihlo, njalo uzabuthelwa engcwabeni lakho ngokuthula, lamehlo akho kawayikubona bonke ububi engizabehlisela phezu kwalindawo. Basebebuyisela ilizwi enkosini.