Read Ndebele-IBhayibhili Elingcwele 2006 1 Iinkronike 10 Bible Online

1 Iinkronike 10 - Ndebele-IBhayibhili Elingcwele 2006 bible

1 Iinkronike 10

¹AmaFilisti asesilwa emelene loIsrayeli; lamadoda akoIsrayeli abaleka phambi kwamaFilisti, awa abulawa entabeni yeGilibowa.

²AmaFilisti asenamathela ngemva kukaSawuli langemva kwamadodana akhe; amaFilisti atshaya uJonathani loAbinadaba loMaliki-Shuwa, amadodana kaSawuli.

³Impi yasisiba nzima imelene loSawuli; abatshoka ngamadandili basebemfica; wasekhathazeka ngabatshoki.

⁴USawuli wasesithi kumthwali wezikhali zakhe: Hwatsha inkemba yakho, ungigwaze ngayo, hlezi laba abangasokanga bafike, badlale kubi ngami. Kodwa umthwali wezikhali zakhe kavumanga, ngoba wesaba kakhulu. USawuli wasethatha inkemba, wa zi wisela phezu kwayo.

⁵Lapho umthwali wezikhali zakhe ebona ukuthi uSawuli u se file, laye wa zi wisela phezu kwenkemba, wafa.

⁶Wafa-ke uSawuli, lamadodana akhe amathathu, lendlu yakhe yonke; bafa ndawonye.

⁷Kwathi wonke amadoda akoIsrayeli ayesesigodini ebona ukuthi abalekile, lokuthi uSawuli lamadodana akhe bafile, atshiya imizi yawo, abaleka; amaFilisti asefika, ahlala kiyo.

⁸Kwasekusithi kusisa lapho amaFilisti efika ukuhlubula ababuleweyo, afica uSawuli lamadodana akhe bewile entabeni yeGilibowa.

⁹Amhlubula, athatha ikhanda lakhe lezikhali zakhe, athumela elizweni lamaFilisti inhlangothi zonke, ukumemezela imibiko ezithombeni zawo lebantwini.

¹⁰Asebeka izikhali zakhe endlini yabonkulunkulu bawo, abethela ukhakhayi lwakhe endlini kaDagoni.

¹¹Kwathi iJabeshi-Gileyadi yonke isizwile konke amaFilisti akwenze kuSawuli,

¹²wonke amaqhawe asuka, athatha isidumbu sikaSawuli lezidumbu zamadodana akhe, aziletha eJabeshi, angcwaba amathambo abo ngaphansi kwesihlahla se-okhi* eJabeshi, azila ukudla insuku eziyisikhombisa.

¹³Ngakho uSawuli wafa ngenxa yesiphambeko sakhe aphambuka ngaso emelene le Nkosi, emelene lelizwi le Nkosi ayengaligcinanga, njalo langokubuza koledlozi ukudinga kuye,

¹⁴njalo kakudinganga e Nkosi ni. Ngakho yambulala, yaguqulela umbuso kuDavida indodana kaJese.