Read Ndebele-IBhayibhili Elingcwele 2006 2 Iinkronike 10 Bible Online

2 Iinkronike 10 - Ndebele-IBhayibhili Elingcwele 2006 bible

2 Iinkronike 10

¹URehobowamu wasesiya eShekema ngoba uIsrayeli wonke wayeze eShekema ukumbeka abe yinkosi.

²Kwasekusithi uJerobowamu indodana kaNebati esizwa, owayeseGibhithe lapho ayebalekele khona ubuso bukaSolomoni inkosi, uJerobowamu wabuya evela eGibhithe.

³Basebethumela bambiza; uJerobowamu loIsrayeli wonke basebesiza, bakhuluma kuRehobowamu besithi:

⁴Uyihlo wenza ijogwe lethu laba lukhuni; ngakho-ke yenza ube lulanyana umsebenzi olukhuni kayihlo, lejogwe lakhe elinzima abesithwalise lona, njalo sizakukhonza.

⁵Wasesithi kibo: Buyani kimi emva kwensuku ezintathu. Abantu basebehamba.

⁶Inkosi uRehobowamu yasicebisana labadala ababesima phambi kukaSolomoni uyise esaphila, isithi: Licebisa ukubuyisela impendulo bani kulababantu?

⁷Basebekhuluma kuye besithi: Uba uzalunga kulababantu, ubathokozise, ukhulume kibo amazwi amahle, bazakuba zinceku zakho insuku zonke.

⁸Kodwa wadela iseluleko sabadala abamcebisa ngaso, wacebisana lamajaha ayeyintanga yakhe, ayesima phambi kwakhe.

⁹Wasesithi kuwo: Licebisa ukuthi sibuyisele mpendulo bani kulababantu, abakhulume kimi besithi: Yenza libe lulanyana ijogwe uyihlo alibeka phezu kwethu?

¹⁰Amajaha ayeyintanga yakhe asekhuluma laye esithi: Uzakutsho njalo ebantwini abakhuluma kuwe besithi: Uyihlo wenza ijogwe lethu laba nzima, kodwa wena ulenze libe lulanyana kithi; uzakutsho njalo kubo: Ucikilicane wami uqatha kulokhalo lukababa.

¹¹Ngakho-ke ubaba walethwesa ijogwe elinzima, kodwa mina ngizakwengezelela ejogweni lenu. Ubaba walijezisa ngeziswepu, kodwa mina ngabofezela.

¹²Ngakho uJerobowamu labo bonke abantu beza kuRehobowamu ngosuku lwesithathu njengokutsho kwenkosi isithi: Libuye kimi futhi ngosuku lwesithathu.

¹³Inkosi yasibaphendula kalukhuni; inkosi uRehobowamu yasidela iseluleko sabadala,

¹⁴yakhuluma kubo njengeseluleko samajaha isithi: Ubaba wenza ijogwe lenu laba nzima, kodwa mina ngizakwengezelela kulo; ubaba walijezisa ngeziswepu, kodwa mina ngabofezela.

¹⁵Ngokunjalo inkosi kayibalalelanga abantu; ngoba inguquko yayivela kuNkulunkulu ukuze i Nkosi iqinise ilizwi layo eyayilikhulume ngesandla sikaAhiya umShilo kuJerobowamu indodana kaNebati.

¹⁶Lapho uIsrayeli wonke ebona ukuthi inkosi kayibalalelanga, abantu bayiphendula inkosi besithi: Silesabelo bani kuDavida? Njalo ka si lalifa endodaneni kaJese. Ngulowo emathenteni akho, Israyeli; khathesi, zibonele indlu yakho, Davida. Ngakho uIsrayeli wonke waya emathenteni akhe.

¹⁷Kodwa abantwana bakoIsrayeli ababehlala emizini yakoJuda, uRehobowamu wabusa phezu kwabo.

¹⁸Inkosi uRehobowamu yasithuma uAdoramu owayengumphathi wezibhalwa; abantwana bakoIsrayeli basebemkhanda ngamatshe, wasesifa. Inkosi uRehobowamu yaziqinisa ukukhwela enqoleni ukubalekela eJerusalema.

¹⁹Ngalokho uIsrayeli wayihlamuka indlu kaDavida kuze kube lamuhla.