Read Ndebele-IBhayibhili Elingcwele 2006 2 Iinkronike 34 Bible Online

2 Iinkronike 34 - Ndebele-IBhayibhili Elingcwele 2006 bible

2 Iinkronike 34

¹UJosiya wayeleminyaka eyisificaminwembili esiba yinkosi; wasebusa iminyaka engamatshumi amathathu lanye eJerusalema.

²Wasesenza okuqondileyo emehlweni e Nkosi, wahamba ngezindlela zikaDavida uyise, kaphambukelanga ngakwesokunene loba kwesokhohlo.

³Ngoba ngomnyaka wesificaminwembili wokubusa kwakhe esesengumfana waqala ukumdinga uNkulunkulu kaDavida uyise; langomnyaka wetshumi lambili waqala ukuhlambulula uJuda leJerusalema kuzindawo eziphakemeyo, lezixuku, lezithombe ezibaziweyo, lezithombe ezibunjwe ngokuncibilikisa.

⁴Basebediliza amalathi aboBhali phambi kwakhe, lamalathi okutshisela impepha ayengaphezu kwawo wawagamulela phansi, lezixuku lezithombe ezibaziweyo lezithombe ezibunjwe ngokuncibilikisa waziphahlaza, wazichola, wazichithela phezu kwamangcwaba alabo ababenikele imihlatshelo kizo.

⁵Wasetshisela amathambo abapristi phezu kwamalathi abo, wahlambulula uJuda leJerusalema.

⁶Lemizini yakoManase loEfrayimi loSimeyoni kuze kufike koNafithali lemanxiweni ayo inhlangothi zonke

⁷wadiliza lamalathi, lezixuku, wachola izithombe ezibaziweyo zaze zaba yimpuphu, wagamulela phansi wonke amalathi empepha elizweni lonke lakoIsrayeli, wasebuyela eJerusalema.

⁸Kwathi ngomnyaka wetshumi lesificaminwembili wokubusa kwakhe, esehlambulule ilizwe lendlu, wathuma uShafani indodana kaAzaliya loMahaseya umbusi womuzi loJowa indodana kaJowahazi umabhalane ukuthi baqinise indlu ye Nkosi uNkulunkulu wakhe.

⁹Basebefika kuHilikhiya umpristi omkhulu, bapha imali eyayilethwe endlini kaNkulunkulu, amaLevi ayelondoloza umbundu ayeyiqoqe esandleni sakoManase loEfrayimi lakuyo yonke insali kaIsrayeli lakuye wonke uJuda loBhenjamini; basebebuyela eJerusalema.

¹⁰Basebeyinikela esandleni sabenzi bomsebenzi ababekhethelwe indlu ye Nkosi abayipha abenzi bomsebenzi ababesebenza endlini ye Nkosi ukuthi balungise baqinise indlu.

¹¹Bayinika ababazi labakhi ukuze bathenge amatshe abaziweyo lezigodo zentungo lezokufulela izindlu amakhosi akoJuda ayezidilizile.

¹²Amadoda asesebenza ngobuqotho emsebenzini; lababonisi phezu kwawo babengoJahathi loObadiya amaLevi, ebantwaneni bakoMerari, loZekariya loMeshulamu, ebantwaneni bamaKohathi, ukuqondisa; l abanye ku maLevi wonke owayelolwazi ngezinto zokuhlabelela.

¹³Njalo ayephezu kwabathwali bemithwalo njalo babengababonisi phezu kwakhe wonke owenza umsebenzi wenkonzo ngenkonzo; lakumaLevi kwakulababhali labaphathi labagcini bamasango.

¹⁴Kwasekusithi bekhupha imali eyayilethwe endlini ye Nkosi, uHilikhiya umpristi wafica ugwalo lomlayo we Nkosi owawunikwe ngesandla sikaMozisi.

¹⁵UHilikhiya wasephendula wathi kuShafani umabhalane: Ngifice ugwalo lomlayo endlini ye Nkosi. UHilikhiya wasenika uShafani ugwalo.

¹⁶UShafani waseletha ugwalo enkosini, futhi wabuyisela ilizwi enkosini esithi: Konke okwakunikelwe esandleni senceku zakho ziyakwenza.

¹⁷Seziyiqoqile imali eyatholakala endlini ye Nkosi, zayinikela esandleni sabaphathi lesandleni sabenzi bomsebenzi.

¹⁸UShafani umabhalane wasetshela inkosi esithi: UHilikhiya umpristi unginike ugwalo. UShafani wasefunda kulo phambi kwenkosi.

¹⁹Kwasekusithi inkosi isizwile amazwi omlayo yadabula izigqoko zayo.

²⁰Inkosi yasilaya oHilikhiya loAhikhamu indodana kaShafani loAbidoni indodana kaMika loShafani umabhalane loAsaya inceku yenkosi, isithi:

²¹Hambani li ye buza e Nkosi ni ngenxa yami langenxa yensali ekoIsrayeli lakoJuda mayelana lamazwi ogwalo olutholakeleyo; ngoba lukhulu ulaka lwe Nkosi oluthululelwe phezu kwethu, ngenxa yokuthi obaba kabaligcinanga ilizwi le Nkosi ukwenza njengakho konke okubhaliweyo kulolugwalo.

²²Ngakho uHilikhiya lalabo ababengabenkosi baya kuHulida umprofethikazi, umkaShaluma indodana kaTokhathi indodana kaHasira, umgcini wezigqoko. (Yena-ke wayehlala eJerusalema esigabeni seSibili.) Basebekhuluma kuye kanje.

²³Wasesithi kibo: Itsho njalo i Nkosi uNkulunkulu kaIsrayeli: Tshelani umuntu olithume kimi:

²⁴Itsho njalo i Nkosi: Khangela, ngizakwehlisela ububi kulindawo laphezu kwabahlali bayo, zonke iziqalekiso ezibhaliweyo egwalweni abalubalileyo phambi kwenkosi yakoJuda.

²⁵Ngenxa yokuthi bengitshiyile, batshisela abanye onkulunkulu impepha, ukuze bangithukuthelise ngayo yonke imisebenzi yezandla zabo; ngakho ulaka lwami luzathululelwa phezu kwalindawo, kaluyikucitshwa.

²⁶Kodwa enkosini yakoJuda elithumileyo ukubuza e Nkosi ni, lizakutsho njalo kuyo: Itsho njalo i Nkosi uNkulunkulu kaIsrayeli: Mayelana lamazwi owazwileyo,

²⁷ngoba inhliziyo yakho ibuthakathaka, wazithoba phambi kukaNkulunkulu usuzwe amazwi akhe amelene lalindawo lamelene labahlali bayo, wazithoba phambi kwami, wadabula izigqoko zakho, wakhala inyembezi phambi kwami, ngitsho lami ngizwile, itsho i Nkosi.

²⁸Khangela, ngizakubuthela kuboyihlo, njalo uzabuthelwa emangcwabeni akho ngokuthula, lamehlo akho kawayikubona konke okubi engizakwehlisela kulindawo laphezu kwabahlali bayo. Basebebuyisela ilizwi enkosini.

²⁹Inkosi yasithuma yaqoqa bonke abadala bakoJuda labeJerusalema.

³⁰Inkosi yasisenyukela endlini kaJehova, kanye labantu bonke bakoJuda labahlali beJerusalema labapristi lamaLevi, labo bonke abantu kusukela komkhulu kusiya komncinyane; yasibala endlebeni zabo wonke amazwi ogwalo lwesivumelwano olwalutholakele endlini kaJehova.

³¹Inkosi yasisima endaweni yayo, yenza isivumelwano phambi kukaJehova ukulandela uJehova, lokugcina imilayo yakhe lezifakazelo zakhe lezimiso zakhe ngayo yonke inhliziyo yayo langawo wonke umphefumulo wayo, ukwenza amazwi esivumelwano abhalwe kulolugwalo.

³²Yasibamisa bonke abatholakala eJerusalema loBhenjamini. Labahlali beJerusalema benza njengokwesivumelwano sikaNkulunkulu, uNkulunkulu waboyise.

³³UJosiya wasesusa zonke izinengiso kuwo wonke amazwe ayengawabantwana bakoIsrayeli, wenza wonke owaficwa koIsrayeli ukuthi akhonze, akhonze i Nkosi uNkulunkulu wabo. Insuku zakhe zonke kabaphambukanga ekuyilandeleni i Nkosi, uNkulunkulu waboyise.