Read Ndebele-IBhayibhili Elingcwele 2006 U-eksodusi 1 Bible Online

U-eksodusi 1 - Ndebele-IBhayibhili Elingcwele 2006 bible

U-eksodusi 1

¹La-ke ngamabizo amadodana kaIsrayeli afika eGibhithe loJakobe; afika, ileyo laleyo lomuzi wayo,

²uRubeni, uSimeyoni, uLevi, loJuda,

³uIsakari, uZebuluni, loBhenjamini,

⁴uDani, loNafithali, uGadi, loAsheri.

⁵Njalo yonke imiphefumulo eyaphuma ekhalweni lukaJakobe yayiyimiphefumulo engamatshumi ayisikhombisa. Kodwa uJosefa wayeseGibhithe.

⁶UJosefa wasesifa labo bonke abafowabo, lalesosizukulwana sonke.

⁷Njalo abantwana bakoIsrayeli bazalana, baba banengi, banda, baba lamandla kakhulukazi, ilizwe laze lagcwaliswa yibo.

⁸Kwasekuvela inkosi entsha phezu kweGibhithe eyayingamazi uJosefa.

⁹Yasisithi esizweni sayo: Khangela, isizwe sabantwana bakoIsrayeli sinengi, futhi silamandla kulathi.

¹⁰Wozani, asisihlakanipheleni, hlezi sande, njalo kuzakuthi lapho kusehla impi, laso sihlangane lezitha zethu, silwe simelene lathi, senyuke sisuke elizweni.

¹¹Ngakho bamisa phezu kwaso izinduna zesibhalo ukusihlupha ngemithwalo yabo. Njalo samakhela uFaro imizi eyiziphala, iPithoma leRamesesi.

¹²Kodwa kwathi ekusihlupheni kwaso kwangikhona sisanda, kwangikhona sisabalala. Ngakho banengwa ngabantwana bakoIsrayeli.

¹³Njalo amaGibhithe abasebenzisa abantwana bakoIsrayeli ngochuku,

¹⁴aze enza impilo zabo zababa ngomsebenzi onzima, ngodaka langezitina, langawo wonke umsebenzi emasimini; ngomsebenzi wabo wonke, ababenza bawenza ngodlakela.

¹⁵Inkosi yeGibhithe yasikhuluma lababelethisi amaHebherukazi, obizo lowokuqala lalinguShifira, lebizo lowesibili lalinguPhuwa,

¹⁶yasisithi: Nxa libelethisa amaHebherukazi, lapho libabona ezihlalweni zokubeletha, uba kuyindodana, liyibulale; kodwa uba kuyindodakazi, iyekeleni iphila.

¹⁷Kodwa ababelethisi babemesaba uNkulunkulu, kabenzanga njengalokho yakhuluma kubo inkosi yeGibhithe, kodwa babayekela abafana baphila.

¹⁸Inkosi yeGibhithe yasibiza ababelethisi, yathi kubo: Liyenzeleni linto ukuthi liyekele abafana baphile?

¹⁹Ababelethisi basebesithi kuFaro: Ngoba amaHebherukazi kawanjengabafazi bamaGibhithe; ngoba alamandla, umbelethisi engakafiki kuwo, asebelethile.

²⁰Ngalokhu uNkulunkulu wabenzela ababelethisi okuhle, labantu banda, baba lamandla kakhulu.

²¹Kwasekusithi, ngoba ababelethisi bamesaba uNkulunkulu, wabakhela imizi.

²²UFaro waselaya isizwe sakhe sonke esithi: Yonke indodana ezalwayo liyiphosele emfuleni, kodwa yonke indodakazi liyiyekele iphile.