Read Ndebele-IBhayibhili Elingcwele 2006 U-eksodusi 10 Bible Online

U-eksodusi 10 - Ndebele-IBhayibhili Elingcwele 2006 bible

U-eksodusi 10

¹I Nkosi yasisithi kuMozisi: Yana kuFaro, ngoba mina ngenze inhliziyo yakhe yaba nzima lenhliziyo yenceku zakhe, ukuze ngenze lezizibonakaliso zami phambi kwakhe,

²lokuthi ulandise endlebeni zendodana yakho lendodana yendodana yakho ukuthi ngenze kabuhlungu kumaGibhithe lezibonakaliso zami engizenze phakathi kwawo, ukuze lazi ukuthi ngiyi Nkosi.

³UMozisi loAroni basebesiya kuFaro, bathi kuye: Itsho njalo i Nkosi, uNkulunkulu wamaHebheru, ithi: Koze kube nini usala ukuzithoba phambi kwami? Yekela isizwe sami sihambe, bangikhonze.

⁴Ngoba uba usala ukuyekela isizwe sami sihambe, khangela, kusasa ngizaletha isikhonyane emngceleni wakho,

⁵njalo sizasibekela ubuso bomhlaba ukuze ungawuboni umhlaba, sizakudla insalela yokwaphephayo, okwalisalelayo esiqhothweni, sidle sonke isihlahla esikhulela wena ensimini.

⁶Sizagcwalisa izindlu zakho lezindlu zezinceku zakho zonke lezindlu zawo wonke amaGibhithe, oyihlo abangazanga basibone laboyise baboyihlo, kusukela ngosuku ababakhona emhlabeni kuze kube lamuhla. Wasetshibilika, waphuma kuFaro.

⁷Lenceku zikaFaro zathi kuye: Koze kube nini lo esiba ngumjibila kithi? Yekela amadoda ahambe, akhonze i Nkosi uNkulunkulu wawo; kawukazi yini ukuthi iGibhithe isichithekile?

⁸UMozisi loAroni babuyiselwa kuFaro; wasesithi kubo: Hambani likhonze i Nkosi uNkulunkulu wenu. Ngobani kanye labo abazahamba?

⁹UMozisi wasesithi: Sizahamba labatsha bethu labadala bethu, lamadodana ethu lamadodakazi ethu, lezimvu zethu lenkomo zethu sizahamba, ngoba silomkhosi we Nkosi.

¹⁰Wasesithi kubo: I Nkosi ibe lani ngokunjalo, njengoba ngizaliyekela lihambe labantwanyana benu! Bonani ngoba kulokubi phambi kwenu.

¹¹Kungabi njalo! Hambani khathesi, madoda, liyikhonze i Nkosi, ngoba yikho elikudingayo. Basebebaxotsha ebusweni bukaFaro.

¹²I Nkosi yasisithi kuMozisi: Yelula isandla sakho phezu kwelizwe leGibhithe, ngenxa yesikhonyane, ukuze senyukele phezu kwelizwe leGibhithe, sidle wonke umbhida welizwe lakho konke isiqhotho esikutshiyileyo.

¹³UMozisi waseyelula intonga yakhe phezu kwelizwe leGibhithe; i Nkosi yasiqhuba umoya wempumalanga elizweni, lonke lolosuku lobusuku bonke; kwasekusithi ekuseni, umoya wempumalanga wenyusa isikhonyane.

¹⁴Isikhonyane sasesisenyukela phezu kwelizwe lonke leGibhithe, sehlela emngceleni wonke weGibhithe, esinzima kakhulu. Phambi kwaso akuzange kube khona isikhonyane esinjalo njengaso, futhi kakuyikuba khona esinjalo emva kwaso.

¹⁵Ngoba sasibekela ubuso belizwe lonke, kwaze kwafiphazwa ilizwe; sadla wonke umbhida welizwe laso sonke isithelo sezihlahla isiqhotho esasitshiyayo; kakusalanga lutho oluluhlaza esihlahleni, lombhida weganga, elizweni lonke leGibhithe.

¹⁶UFaro wasephangisa ukubabiza oMozisi loAroni, wathi: Ngonile e Nkosi ni uNkulunkulu wenu lakini.

¹⁷Khathesi-ke ake lithethelele isono sami okwalesisikhathi kuphela, liyincenge i Nkosi uNkulunkulu wenu ukuthi isuse kimi lokhu ukufa kuphela.

¹⁸Wasephuma kuFaro, wayincenga i Nkosi.

¹⁹I Nkosi yasiphendula umoya wentshonalanga olamandla kakhulu owenyusa isikhonyane, wasiphosela oLwandle oluBomvu; kakusalanga sikhonyane lesisodwa kuwo wonke umngcele weGibhithe.

²⁰Kodwa i Nkosi yayenza lukhuni inhliziyo kaFaro, kazabayekela abantwana bakoIsrayeli bahambe.

²¹I Nkosi yasisithi kuMozisi: Yelulela isandla sakho emazulwini, ukuze kube khona umnyama phezu kwelizwe leGibhithe, ngitsho umnyama ophumputhekayo.

²²UMozisi waseselulela isandla sakhe emazulwini; kwasekusiba khona umnyama wobumnyama elizweni lonke leGibhithe insuku ezintathu.

²³Kababonananga, futhi kakusukumanga muntu endaweni yakhe okwensuku ezintathu; kodwa kubo bonke abantwana bakoIsrayeli kwakukhona ukukhanya emizini yabo.

²⁴UFaro wasembiza uMozisi wathi: Hambani likhonze i Nkosi, kuphela izimvu zenu lenkomo zenu kuzagcinwa, labantwanyana benu bazahamba lani.

²⁵Kodwa uMozisi wathi: Lawe ubonika imihlatshelo leminikelo yokutshiswa ezandleni zethu, esizayenzela i Nkosi uNkulunkulu wethu.

²⁶Njalo lezifuyo zethu zizahamba kanye lathi, kakuyikusala emuva isondo; ngoba sizathatha kuzo ukukhonza i Nkosi uNkulunkulu wethu, ngoba kasikwazi esizakhonza ngakho i Nkosi size sifike khona.

²⁷Kodwa i Nkosi yenza lukhuni inhliziyo kaFaro, njalo kafunanga ukubayekela bahambe.

²⁸UFaro wasesithi kuye: Suka kimi, uziqaphele, ungaboni ubuso bami futhi; ngoba mhla ubona ubuso bami uzakufa.

²⁹UMozisi wasesithi: Ukhulume ngokuqonda, kangisayikubona futhi ubuso bakho.