Read Ndebele-IBhayibhili Elingcwele 2006 U-eksodusi 16 Bible Online

U-eksodusi 16 - Ndebele-IBhayibhili Elingcwele 2006 bible

U-eksodusi 16

¹Basebesuka eElimi, lenhlangano yonke yabantwana bakoIsrayeli yafika enkangala yeSini, ephakathi kweElimi leSinayi, ngosuku lwetshumi lanhlanu lwenyanga yesibili emva kokuphuma kwabo elizweni leGibhithe.

²Lenhlangano yonke yabantwana bakoIsrayeli yakhonona imelana loMozisi loAroni enkangala.

³Abantwana bakoIsrayeli basebesithi kubo: Kungathi ngabe safa ngesandla se Nkosi elizweni leGibhithe lapho sasihlezi embizeni zenyama, lapho sadla isinkwa sasutha; ngoba lisikhuphele kulinkangala ukuze libulale lelibandla lonke ngendlala.

⁴I Nkosi yasisithi kuMozisi: Khangela, ngizalinisela isinkwa sivela emazulwini; labantu bazaphuma ukubutha isabelo sosuku ngosuku lwaso, ukuze ngibalinge ukuthi bazahamba ngomlayo wami yini kumbe hayi.

⁵Kuzakuthi-ke ngosuku lwesithupha bazalungisa lokho abakulethileyo, njalo kuzabe kuphindwe kabili kulokho abakubuthayo insuku ngensuku.

⁶UMozisi loAroni basebesithi kubo bonke abantwana bakoIsrayeli: Kusihlwa, khona lizakwazi ukuthi i Nkosi ilikhuphile elizweni leGibhithe;

⁷njalo kusisa, khona lizabona inkazimulo ye Nkosi, ngoba izwile ukukhonona kwenu limelene le Nkosi. Thina-ke siyini ukuthi lisikhononele?

⁸UMozisi wasesithi: Lapho i Nkosi ilinika inyama yokudla kusihlwa, lesinkwa ekuseni, ukuze lisuthe, ku ngoba i Nkosi izwile ukukhonona kwenu elikukhonona limelene layo. Ngoba thina siyini? Ukukhonona kwenu kakumelananga lathi, kodwa kumelene le Nkosi.

⁹UMozisi wasesithi kuAroni: Tshono kunhlangano yonke yabantwana bakoIsrayeli uthi: Sondelani phambi kwe Nkosi, ngoba izwile ukukhonona kwenu.

¹⁰Kwasekusithi uAroni esakhuluma kunhlangano yonke yabantwana bakoIsrayeli, bakhangela ngasenkangala, khangela-ke, inkazimulo ye Nkosi yabonakala eyezini.

¹¹I Nkosi yasikhuluma kuMozisi isithi:

¹²Sengizwile ukukhonona kwabantwana bakoIsrayeli; batshele uthi: Kusihlwa lizakudla inyama, lekuseni lisuthe isinkwa, njalo lizakwazi ukuthi ngiyi Nkosi uNkulunkulu wenu.

¹³Kwasekusithi ntambama kwenyuka izagwaca, zasibekela inkamba; lakusisa kwakulomlalela wamazolo uzingelezele inkamba.

¹⁴Kwathi umlalela wamazolo usuwenyukile, khangela-ke, phezu kobuso benkangala into eyisigaqa encinyane, incinyane njengongqwaqwane emhlabathini.

¹⁵Kwathi abantwana bakoIsrayeli be zi bona bathi omunye komunye: Kuyini lokhu? Ngoba babengazi ukuthi kuyini. UMozisi wasesithi kubo: Kuyisinkwa i Nkosi elinike sona ukuze lidle.

¹⁶Le yinto i Nkosi elilaye ngayo yathi: Ngulowo lalowo kabuthe kuyo okulingene ukudla kwakhe, i-omeri* ngekhanda, njengenani lemiphefumulo yenu, ngulowo uzathathela abasethenteni lakhe.

¹⁷Abantwana bakoIsrayeli basebesenza njalo, babutha, omunye okunengi lomunye okulutshwana.

¹⁸Sebelinganise nge-omeri*, lowo owayebuthe okunengi kabanga lokusalayo, lowayebuthe okulutshwana kaswelanga; babutha, ngulowo lalowo okulingene ukudla kwakhe.

¹⁹UMozisi wasesithi kubo: Kakungabi lamuntu otshiya kukho kuze kube sekuseni.

²⁰Kodwa kabamlalelanga uMozisi; kodwa abanye batshiya kukho kwaze kwaba sekuseni, kwasekuphethuza impethu, kwaba levumba. Ngakho uMozisi wabathukuthelela.

²¹Bakubutha ukusa ngokusa, ngulowo lalowo okulingene ukudla kwakhe; lapho ilanga selitshisa, kwancibilika.

²²Kwasekusithi ngosuku lwesithupha babutha isinkwa esiphindwe kabili, ama-omeri* amabili ngamunye. Njalo zonke izinduna zenhlangano zeza zamtshela uMozisi.

²³Wasesithi kuzo: Lokhu yikho i Nkosi ekutshiloyo: Kusasa yikuphumula, isabatha elingcwele le Nkosi. Bhakani elizakubhaka, lipheke elizakupheka, konke lokho okuseleyo lizibekele kugcinwe kuze kube sekuseni.

²⁴Basebekubeka kwaze kwaba sekuseni njengokulaya kukaMozisi. Njalo kakubanga levumba, kwakungelampethu kukho.

²⁵UMozisi wasesithi: Dlanini lokhu lamuhla, ngoba lamuhla kulisabatha le Nkosi; lamuhla kaliyikukuthola egangeni.

²⁶Lizakubutha insuku eziyisithupha; kodwa ngosuku lwesikhombisa, isabatha, kakuyikuba khona kulo.

²⁷Kwasekusithi ngosuku lwesikhombisa abanye babantu baphuma ukubutha, kodwa kaba ku tholanga.

²⁸I Nkosi yasisithi kuMozisi: Koze kube nini lisala ukugcina imilayo yami lemithetho yami?

²⁹Bonani, ngoba i Nkosi ilinikile isabatha, ngakho ilinika ngosuku lwesithupha isinkwa sensuku ezimbili; hlalani kube ngulowo lalowo endaweni yakhe, kakungaphumi muntu endaweni yakhe ngosuku lwesikhombisa.

³⁰Ngakho abantu baphumula ngosuku lwesikhombisa.

³¹Indlu yakoIsrayeli yasibiza ibizo lakho ngokuthi yimana; njalo kwakunjengenhlanyelo yekhoriyanderi* emhlophe, lokunambitheka kwayo kwakunjengezinkwana eziyizipatalala eziloluju.

³²UMozisi wasesithi: Le yinto i Nkosi elaye ngayo ukuthi: Gcwalisani i-omeri ngayo igcinelwe izizukulwana zenu, ukuze zibone isinkwa engalinika sona ukuthi lidle enkangala ekulikhupheni kwami elizweni leGibhithe.

³³UMozisi wasesithi kuAroni: Thatha inqayi eyodwa, ufake kuyo i-omeri* eligcwele imana, uyibeke phambi kwe Nkosi, igcinelwe izizukulwana zenu.

³⁴Njengokulaya kwe Nkosi kuMozisi, uAroni wayibeka phambi kobufakazi ukuze igcinwe.

³⁵Abantwana bakoIsrayeli-ke badla imana iminyaka engamatshumi amane baze bafika elizweni elakhiweyo. Badla imana baze bafika emngceleni welizwe leKhanani.

³⁶I-omeri-ke* iyingxenye yetshumi ye-efa*.