Read Ndebele-IBhayibhili Elingcwele 2006 U-eksodusi 25 Bible Online

U-eksodusi 25 - Ndebele-IBhayibhili Elingcwele 2006 bible

U-eksodusi 25

¹I Nkosi yasikhuluma kuMozisi isithi:

²Khuluma kubantwana bakoIsrayeli ukuthi bangithathele umnikelo; uzathatha umnikelo wami kuye wonke umuntu, onhliziyo yakhe imenza avume.

³Njalo yilo umnikelo ozawuthatha kubo: Igolide, lesiliva, lethusi,

⁴lokuluhlaza okwesibhakabhaka, lokuyibubende, lokubomvu, lelembu elicolekileyo kakhulu, lo boya bembuzi,

⁵lezikhumba eziphendulwe zababomvu zezinqama, lezikhumba zikamantswane, lesihlahla sesinga,

⁶amafutha esibane, amakha amafutha okugcoba, lawempepha ethunqayo elephunga elimnandi,

⁷amatshe athiwa ngama-onikse*, lamatshe okubekwa e-efodini* lesembathweni sesifuba.

⁸Njalo kabangenzele indlu engcwele ukuze ngihlale phakathi kwabo.

⁹Njengakho konke engizakutshengisa khona, isibonelo sethabhanekele, lesibonelo sempahla yalo yonke, lenze njalo-ke.

¹⁰Njalo bazakwenza umtshokotsho ngesihlahla sesinga; ubude bawo bube zingalo ezimbili lengxenye eyodwa kwezimbili, lobubanzi bawo yingalo lengxenye eyodwa kwezimbili, lokuphakama kwawo yingalo lengxenye eyodwa kwezimbili.

¹¹Uwuhuqe-ke ngegolide elicwengekileyo, uwuhuqe ngaphakathi langaphandle, wenze phezu kwawo umqolo wegolide inhlangothi zonke.

¹²Uwubumbele ngokuncibilikisa futhi amasongo amane egolide, uwafake emagumbini omane awo, ukuze amasongo amabili abe kolunye uhlangothi lwawo, lamasongo amabili abe kolunye uhlangothi lwawo.

¹³Njalo uzakwenza imijabo ngesihlahla sesinga, uyihuqe ngegolide,

¹⁴uyifake imijabo emasongweni enhlangothini zomtshokotsho, ukuthwala umtshokotsho ngayo.

¹⁵Imijabo izakuba semasongweni omtshokotsho, ayiyikukhutshwa kuwo.

¹⁶Ubusufaka emtshokotshweni ubufakazi engizakunika bona.

¹⁷Njalo uzakwenza isihlalo somusa ngegolide elicwengekileyo, ubude baso bube zingalo ezimbili lengxenye eyodwa kwezimbili, ububanzi baso yingalo lengxenye eyodwa kwezimbili.

¹⁸Ubususenza amakherubi* amabili ngegolide, uzawenza ngomsebenzi okhandiweyo, avele emaphethelweni womabili esihlalo somusa.

¹⁹Wenze elinye ikherubhi livele ephethelweni lwaloluhlangothi, lelinye ikherubhi livele ephethelweni lolunye uhlangothi, uzakwenza amakherubi evela esihlalweni somusa emaphethelweni womabili aso.

²⁰Lamakherubi azakwelula impiko zawo ngaphezulu, ambomboze isihlalo somusa ngempiko zawo, lobuso bawo bukhangelane; ubuso bamakherubi buzakhangela isihlalo somusa.

²¹Njalo uzasibeka isihlalo somusa ngaphezulu, phezu komtshokotsho, ufake emtshokotshweni ubufakazi engizakunika bona.

²²Ngizahlangana-ke lawe lapho, ngikhulume lawe ngingaphezu kwesihlalo somusa, ngiphakathi kwamakherubi amabili aphezu komtshokotsho wobufakazi, konke engizakulaya khona kubantwana bakoIsrayeli.

²³Uzakwenza futhi itafula ngesihlahla sesinga; ubude balo bube zingalo ezimbili, lobubanzi balo yingalo, lokuphakama kwalo yingalo lengxenye eyodwa kwezimbili.

²⁴Uzalihuqa-ke ngegolide elicwengekileyo, wenze kulo umqolo wegolide inhlangothi zonke.

²⁵Uzakwenza kulo inhlangothi zonke ibhanti elingangobubanzi besandla, ulenzele ibhanti lalo umqolo wegolide inhlangothi zonke.

²⁶Ulenzele futhi amasongo amane egolide, uwafake amasongo emagunjini amane asenyaweni zalo zozine.

²⁷Amasongo azakuba ngasebhantini ukuze abe zindawo zemijabo, ukuthwala itafula.

²⁸Njalo uzakwenza imijabo ngesihlahla sesinga, uyihuqe ngegolide, ukuze itafula lithwalwe ngayo;

²⁹wenze futhi imiganu yalo lenkezo zalo lezitsha zalo lenditshi zalo abathela ngazo, uzenze ngegolide elicwengekileyo.

³⁰Uzabeka-ke etafuleni izinkwa zokubukiswa phambi kwami njalonjalo.

³¹Uzakwenza njalo uluthi lwesibane ngegolide elicwengekileyo; uluthi lwesibane luzakwenziwa ngomsebenzi okhandiweyo, isidindi salo, lezinti zalo, imbizana zalo, induku zalo, lamaluba alo, kuvele kulo.

³²Njalo izinti eziyisithupha zizaphuma enhlangothini zalo; izinti ezintathu zoluthi lwesibane kolunye uhlangothi, lezinti ezintathu zoluthi lwesibane kolunye uhlangothi.

³³Imbizana ezintathu ezenziwe zafanana lamaluba esihlahla se-alimondi* kolunye uluthi, isiduku leluba; lembizana ezintathu ezenziwe zafanana lamaluba esihlahla se-alimondi kolunye uluthi, isiduku leluba; kube njalo ezintini eziyisithupha eziphuma oluthini lwesibane.

³⁴Oluthini lwesibane kube khona imbizana ezine ezenziwe zafanana lamaluba esihlahla se-alimondi*, iziduku zalo lamaluba alo;

³⁵kube lesiduku ngaphansi kwezinti ezimbili ezivela kulo, lesiduku ngaphansi kwezinti ezimbili ezivela kulo, futhi isiduku ngaphansi kwezinti ezimbili ezivela kulo, njengezinti eziyisithupha eziphuma oluthini lwesibane.

³⁶Iziduku zazo lezinti zazo zizavela kulo, lonke lube ngumsebenzi munye okhandiweyo wegolide elicwengekileyo.

³⁷Uzakwenza futhi izibane zalo eziyisikhombisa, njalo bazalumathisa izibane zalo, bazazenza zikhanyise ehlangothini oluphambi kwalo.

³⁸Njalo indlawu zalo lemiganu yalo yomlotha kuzakuba ligolide elicwengekileyo.

³⁹Kalwenziwe ngethalenta* legolide elicwengekileyo, kanye lazo zonke lezizinto.

⁴⁰Nanzelela-ke ukuthi uzenze njengomfanekiso wazo, owatshengiswa wona entabeni.