Read Ndebele-IBhayibhili Elingcwele 2006 U-eksodusi 35 Bible Online

U-eksodusi 35 - Ndebele-IBhayibhili Elingcwele 2006 bible

U-eksodusi 35

¹UMozisi wasebuthanisa inhlangano yonke yabantwana bakoIsrayeli, wathi kubo: La ngamazwi i Nkosi ewalayileyo ukuthi li wenze.

²Insuku eziyisithupha kuzakwenziwa umsebenzi, kodwa ngosuku lwesikhombisa kuzakuba yibungcwele kini, isabatha lokuphumula e Nkosi ni; loba ngubani owenza umsebenzi ngalo uzabulawa.

³Lingabasi umlilo ngosuku lwesabatha kuyo yonke imizi yenu.

⁴UMozisi wasekhuluma kunhlangano yonke yabantwana bakoIsrayeli esithi: Yile into i Nkosi eyilayileyo isithi:

⁵Thathani phakathi kwenu umnikelo ube ngowe Nkosi; loba ngubani olenhliziyo evumayo kawulethe, umnikelo we Nkosi, igolide lesiliva lethusi,

⁶lokuluhlaza okwesibhakabhaka lokuyibubende lokubomvu, lelembu elicolekileyo kakhulu, loboya bembuzi,

⁷lezikhumba eziphendulwe zababomvu zezinqama, lezikhumba zikamantswane, lezihlahla zesinga,

⁸lamafutha ezibane, lamakha amafutha okugcoba lempepha elephunga elimnandi,

⁹lamatshe ama-onikse*, lamatshe okubekwa awe-efodi lawesembatho sesifuba.

¹⁰Labo bonke abalenhliziyo ehlakaniphileyo phakathi kwenu kabeze benze konke i Nkosi ekulayileyo;

¹¹ithabhanekele, ithente lalo, lesifulelo salo, ingwegwe zalo, lamapulanka alo, imithando yalo, insika zalo, lezisekelo zalo;

¹²umtshokotsho, lemijabo yawo, isihlalo somusa, leveyili lesembeso;

¹³itafula, lemijabo yalo, lezitsha zalo zonke, lezinkwa zokubukiswa;

¹⁴loluthi lwesibane sesikhanyiso, lezitsha zalo, lezibane zalo, lamafutha esikhanyiso;

¹⁵lelathi lempepha, lemijabo yalo, lamafutha okugcoba, lempepha elephunga elimnandi, lesilenge somnyango emnyango wethabhanekele;

¹⁶ilathi lomnikelo wokutshiswa, lesihlengo sethusi elilaso, imijabo yalo, lazo zonke izitsha zalo, inditshi yokugezela lonyawo lwayo;

¹⁷amakhetheni eguma, insika zalo, lezisekelo zazo, lesilenge sesango leguma;

¹⁸izikhonkwane zethabhanekele, lezikhonkwane zeguma, lentambo zazo;

¹⁹izembatho ezifekethisiweyo zokukhonza endaweni engcwele, izembatho ezingcwele zikaAroni umpristi, lezembatho zamadodana akhe, ukusebenza njengabapristi.

²⁰Lenhlangano yonke yabantwana bakoIsrayeli yaphuma phambi kukaMozisi.

²¹Beza-ke, wonke onhliziyo yakhe eyamvusayo, laye wonke omoya wakhe owamenza wavuma, baletha umnikelo e Nkosi ni emsebenzini wethente lenhlangano lowenkonzo yonke yalo lowezembatho ezingcwele.

²²Beza-ke abesilisa kanye labesifazana, bonke abavumayo ngenhliziyo, baletha iziceco lamacici lendandatho lamasongo, zonke izinto zegolide; laye wonke owazunguza umnikelo wokuzunguzwa wegolide e Nkosi ni.

²³Laye wonke okwatholakala kuye okuluhlaza okwesibhakabhaka lokuyibubende lokubomvu lelembu elicolekileyo kakhulu loboya bembuzi lezikhumba eziphendulwe zababomvu zenqama lezikhumba zikamantswane bakuletha.

²⁴Wonke owanikela umnikelo wesiliva lowethusi bakuletha kungumnikelo we Nkosi; laye wonke okwatholakala kuye izihlahla zesinga ezawo wonke umsebenzi wenkonzo baziletha.

²⁵Labo bonke abesifazana ababehlakaniphile ngenhliziyo baphotha ngezandla zabo, baletha okuphothiweyo, okuluhlaza okwesibhakabhaka, lokuyibubende, okubomvu, lelembu elicolekileyo kakhulu.

²⁶Labo bonke abesifazana abanhliziyo zabo zabavusa enhlakaniphweni baphotha uboya bembuzi.

²⁷Lezinduna zaletha amatshe ama-onikse* lamatshe okubekwa, awe-efodi lawesembatho sesifuba,

²⁸la makha lamafutha awesibane, lawamafutha okugcoba, lawempepha elephunga elimnandi.

²⁹Abantwana bakoIsrayeli bawuletha umnikelo wesihle e Nkosi ni. Bonke abesilisa labesifazana abanhliziyo zabo zabenza bavuma ukulethela wonke umsebenzi i Nkosi eyayiwulayile ukuthi wenziwe ngesandla sikaMozisi.

³⁰UMozisi wasesithi ebantwaneni bakoIsrayeli: Bonani, i Nkosi imbizile ngebizo uBhezaleli indodana kaUri, indodana kaHuri owesizwe sakoJuda;

³¹imgcwalisile ngoMoya kaNkulunkulu enhlakaniphweni, ekuqedisiseni, lelwazini, lemisebenzini yobungcitshi yonke,

³²lokuthi acebe ubungcitshi ukusebenza ngegolide langesiliva langethusi,

³³lekubazeni amatshe okufakwa, lekubazeni izigodo, ukusebenza emisebenzini yonke yeminwe ngobungcitshi.

³⁴Ifakile laye enhliziyweni yakhe ukufundisa, yena loOholiyaba indodana kaAhisamaki owesizwe sakoDani.

³⁵Ibagcwalisile ngokuhlakanipha kwenhliziyo, ukwenza wonke umsebenzi wombazi, lowengcitshi, lowomfeketisi ngenalithi, ngokuluhlaza okwesibhakabhaka langokuyibubende, ngokubomvu langelembu elicolekileyo kakhulu, lowomeluki; besenza wonke umsebenzi beceba ubungcitshi.