Read Ndebele-IBhayibhili Elingcwele 2006 Ujobho 1 Bible Online

Ujobho 1 - Ndebele-IBhayibhili Elingcwele 2006 bible

Ujobho 1

¹Kwakukhona indoda elizweni leUzi, ibizo layo lalinguJobe. Leyondoda yayiphelele-ke, iqondile, imesaba uNkulunkulu, ixwaya okubi.

²Yasizalelwa amadodana ayisikhombisa lamadodakazi amathathu.

³Lemfuyo yayo yayiyizimvu eziyizinkulungwane eziyisikhombisa, lamakamela ayizinkulungwane ezintathu, lezipane zenkabi ezingamakhulu amahlanu, labobabhemi abasikazi abangamakhulu amahlanu, lenceku ezinengi kakhulu. Ngakho lowomuntu wayemkhulu okwedlula bonke abantu bempumalanga.

⁴Njalo amadodana akhe ahamba enza idili endlini yaleyo laleyo ngosuku lwayo; athuma abiza odadewabo abathathu ukuze badle banathe lawo.

⁵Kwakusithi lapho esephelile amazopha ensuku zedili, uJobe athume, awangcwelise, avuke ekuseni kakhulu, anikele iminikelo yokutshiswa ngokw enani lawo wonke, ngoba uJobe wathi: Mhlawumbe amadodana ami onile, amthuka uNkulunkulu enhliziyweni yawo. Wenza njalo uJobe zonke izinsuku.

⁶Kwasekusiba losuku lapho amadodana kaNkulunkulu eza ukuzimisa phambi kwe Nkosi, loSathane laye wafika phakathi kwawo.

⁷I Nkosi yasisithi kuSathane: Uvela ngaphi? USathane wasephendula i Nkosi wathi: Ekuzulazuleni emhlabeni lekuhambahambeni kuwo.

⁸I Nkosi yasisithi kuSathane: Ubekile yini inhliziyo yakho encekwini yami uJobe, ngoba kakho onjengayo emhlabeni, umuntu opheleleyo loqondileyo, owesaba uNkulunkulu loxwaya ububi?

⁹USathane wasephendula i Nkosi wathi: UJobe umesabela ize uNkulunkulu yini?

¹⁰Kawumbiyelanga yini yena lendlu yakhe lakho konke alakho inhlangothi zonke? Ubusisile umsebenzi wezandla zakhe, lezifuyo zakhe zanda kakhulu elizweni.

¹¹Kodwa isibili yelula isandla sakho khathesi, uthinte konke alakho; sibili uzakuthuka ebusweni bakho.

¹²I Nkosi yasisithi kuSathane: Khangela konke alakho kusesandleni sakho; kuphela kuye ungeluleli isandla sakho. Wasephuma uSathane phambi kwe Nkosi.

¹³Kwasekusiba losuku lapho amadodana lamadodakazi akhe ayesidla enatha iwayini endlini yomfowabo, izibulo.

¹⁴Kwasekufika isithunywa kuJobe sathi: Inkabi bezilima labobabhemi besidla emaceleni azo;

¹⁵kwasekutheleka amaShebha, akuthatha, atshaya izinceku ngobukhali benkemba, njalo yimi ngedwa kuphela engiphephileyo ukuze ngikubikele.

¹⁶Lesi sisakhuluma, kwafika lesinye, sathi: Umlilo kaNkulunkulu uwile uvela emazulwini, watshisa phakathi kwezimvu laphakathi kwezinceku, waziqeda; njalo yimi ngedwa kuphela engiphephileyo ukuze ngikubikele.

¹⁷Lesi sisakhuluma, kwafika lesinye, sathi: AmaKhaladiya amise amaxuku amathathu atheleka phezu kwamakamela, awathatha, atshaya izinceku ngobukhali benkemba, njalo yimi ngedwa kuphela engiphephileyo ukuze ngikubikele.

¹⁸Lesi sisakhuluma, kwafika lesinye, sathi: Amadodana akho lamadodakazi akho bebesidla benatha iwayini endlini yomfowabo, izibulo.

¹⁹Khangela-ke, umoya omkhulu wafika uvela ngaphetsheya kwenkangala, watshaya amagumbi womane endlu, yawela phezu kwamajaha, afa; njalo yimi ngedwa kuphela engiphephileyo ukuze ngikubikele.

²⁰UJobe wasesukuma, wadabula ibhatshi lakhe, waphuca ikhanda lakhe, wawa emhlabathini, wakhonza;

²¹wasesithi: Ngaphuma ngize esiswini sikamama, njalo ngizabuyela khona ngize; i Nkosi yapha, i Nkosi ithethe; kalibusiswe ibizo le Nkosi.

²²Kukho konke lokhu uJobe konanga, kambalelanga ubuwula uNkulunkulu.