Read Ndebele-IBhayibhili Elingcwele 2006 Ujobho 10 Bible Online

Ujobho 10 - Ndebele-IBhayibhili Elingcwele 2006 bible

Ujobho 10

¹Umphefumulo wami ukhathele yimpilo yami; ngizatshiya insolo yami phezu kwami; ngizakhuluma ekubabeni komphefumulo wami.

²Ngizakuthi kuNkulunkulu: Ungangilahli; ngazisa ukuthi kungani uphikisana lami.

³Kuhle yini kuwe ukuthi ucindezele, ukuthi udelele umsebenzi wezandla zakho, ukhanye phezu kwecebo lababi?

⁴Ulamehlo enyama yini? Ubona njengokubona komuntu?

⁵Insuku zakho zinjengensuku zomuntu na? Iminyaka yakho injengensuku zomuntu yini,

⁶ukuthi udinge ngobubi bami, uhlolisise ngesono sami?

⁷Ngoba usazi ukuthi kangikhohlakalanga, lokuthi kakho ongakhulula esandleni sakho.

⁸Izandla zakho zangibumba zangenza kanyekanye inhlangothi zonke, kanti uyangiginya.

⁹Ake ukhumbule ukuthi wangenza njengebumba. Pho, uzangibuyisela ethulini?

¹⁰Kawungithululanga njengochago, wangijiyisa njengamasi yini?

¹¹Ungigqokise isigogo lenyama, wangihlanganisa ndawonye ngamathambo langemisipha.

¹²Ungenzele impilo lomusa, lokunakekela kwakho kulondolozile umoya wami.

¹³Kanti lezizinto uzifihlile enhliziyweni yakho; ngiyazi ukuthi lokhu kukuwe.

¹⁴Uba ngisona, ungiqaphele, kawuyikungiyekela ngingelacala esonweni sami.

¹⁵Uba ngimubi, maye kimi! Uba ngilungile, bengingayikuphakamisa ikhanda lami. Ngigcwele ihlazo, ngakho bona inhlupheko yami.

¹⁶Ngoba kuyaziphakamisa; uyangizingela njengesilwane; ubuye uzenze okumangalisayo kimi.

¹⁷Uyavuselela abafakazi bakho abamelene lami, wandise ulaka lwakho kimi; izinguquko lempi kulami.

¹⁸Pho kungani wangikhupha esizalweni? Kungathi ngabe ngaphela, lelihlo lingangibonanga!

¹⁹Ngangizakuba njengokungathi kangikho; ngangizathwalwa ngisuswe esizalweni ngisiwe engcwabeni.

²⁰Insuku zami kazinlutshwana yini? Khawula phela, ungiyekele ukuze ngithokoze kancinyane,

²¹ngingakayi - ngingabuyi - elizweni lomnyama lethunzi lokufa,

²²ilizwe lomnyama, njengobumnyama, ithunzi lokufa, elingelahlelo, lokukhanya kunjengobumnyama.